300 مىڭنان استام ازامات زارداپ شەكتى: قارجى مونيتورينگى اگەنتتىگى زاڭسىز مقۇ-لارعا قاتىستى ەسكەرتۋ جاسادى
قارجى مونيتورينگى اگەنتتىگى 2025 جىلدىڭ باسىنان بەرى زاڭسىز ارەكەت ەتكەن 5 ميكروقارجى ۇيىمىنىڭ قىزمەتىن توقتاتقانىن حابارلادى. بۇل ۇيىمداردان 300 مىڭنان استام ازامات زارداپ شەككەن. اگەنتتىكتىڭ مالىمەتىنشە، ولاردىڭ جالپى ارتىق تولەم سوماسى 71 ملرد تەڭگەدەن اسقان.
زاڭسىز ميكروقارجى ۇيىمدارى ءوز قىزمەتىن زاڭدى نەسيەلەۋ تۇرىندە كورسەتكەنىمەن، ءىس جۇزىندە قارىز الۋشىلارعا زاڭسىز قوسىمشا تولەمدەر، جوعارى پايىزدار مەن ساقتاندىرۋ جارنالارىن مىندەتتەگەن. بۇل تاسىلدەر سىياقى مولشەرلەمەسىنە زاڭمەن بەلگىلەنگەن شەكتەۋلەردى اينالىپ وتۋگە مۇمكىندىك بەرگەن.
ناتيجەسىندە ازاماتتار نەسيەنى بىرنەشە ەسە ارتىق تولەۋگە ءماجبۇر بولىپ، قارجىلىق قيىندىققا تاپ بولعان. اگەنتتىك وسىنداي تاۋەكەلدەرگە جول بەرمەۋ ءۇشىن حالىقتى قارىز شارتتارىمەن مۇقيات تانىسۋعا شاقىردى.
— قارىز الماس بۇرىن ونىڭ بارلىق شارتتارىن مۇقيات وقىپ، ءتۇسىنىپ الىڭىز. ءاربىر ازامات قانداي تولەمدى نە ءۇشىن جاسايتىنىن بىلۋگە قۇقىلى. زاڭدى ميكروقارجى ۇيىمدارى "تەكسەرۋسىز" نەمەسە "بارىنە بەرىلەدى" دەگەن ۋادەلەرمەن جۇمىس ىستەمەيدى، – دەلىنگەن اگەنتتىك حابارلاماسىندا.
سونىمەن قاتار اگەنتتىك بىرنەشە ميكروقارجى ۇيىمدارىنىڭ ليسەنزيالارىن ءۇش اي مەرزىمگە توقتاتقان. ولار:
-
مقۇ "Hava Finance" ج ش س
-
مقۇ "POS Credit" ج ش س
-
مقۇ "SF Offline" ج ش س
-
مقۇ "سالەم كرەديت" ج ش س
بۇل ۇيىمدارعا جاڭا ميكروكرەديتتەر بەرۋگە، شارتتاردى ۇزارتۋعا نەمەسە بورىشكەرلەرگە قوسىمشا جۇكتەمە ارتتىرۋعا تىيىم سالىندى. الايدا ولار بۇرىنعى كەلىسىمشارتتار بويىنشا ءوز مىندەتتەمەلەرىن تولىق ورىنداۋى ءتيىس. اگەنتتىك ازاماتتاردىڭ ميكروكرەديتتەرىن وتەۋدى جالعاستىرۋى قاجەت ەكەنىن دە ەسكە سالدى.
