پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ءماجىلىستىڭ جالپى وتىرىسىنان كەيىن ەڭ تومەنگى ايلىقتى كوتەرۋ تۋرالى دەپۋتات ۇسىنىسىنا جاۋاپ بەردى.

- دەپۋتاتتاردىڭ ءبىرى ەڭ تومەنگى ەڭبەكاقى مولشەرىن 174 مىڭ تەڭگەگە دەيىن كوتەرۋدى ۇسىنعان بولاتىن. بۇل قانشالىقتى مۇمكىن، - دەپ سۇرادى جۋرناليست.

ۆيسە-پرەمەر بۇل ماسەلەگە بايىپپەن كەلمەسە، ينفلياسيانى ءورشىتىپ الۋعا بولاتىنىن ايتتى.

- ەڭ تومەنگى ايلىق – وتە كۇردەلى ماسەلە. ونى كوتەرۋمەن بايلانىستى بىرنەشە تەوريا بار. بۇل جەردە ينفلياسيا تاۋەكەلدەرىن دە ەسكەرۋ كەرەك. ويتكەنى ەڭ تومەنگى ايلىقتى كوتەرۋ، بىرىنشىدەن، ءوندىرىستىڭ شىعىندارىن كوتەرەدى. ەكىنشىدەن، تۇتىنۋ سەكتورىنا قوسىمشا اقشا اكەلەدى. بۇل سۇرانىستى ارتتىرىپ، ينفلياسياعا اسەر ەتەدى. سوندىقتان بۇل ماسەلەگە وتە بايىپپەن كەلۋ كەرەك. ەڭ تومەنگى ايلىقتىڭ ينفلياسياعا ۇزاق مەرزىمدە قالاي اسەر ەتەتىنى تۋرالى ەسەپتەر جوق. دەگەنمەن كەيبىر ساراپشىلار اسەرى ءاردايىم بولاتىنىن ايتادى. كوتەرۋ كەرەك، ءبىراق كۇرت كوتەرۋگە بولمايدى، - دەدى ول.

ايتا كەتۋ كەرەك، قازاقستاندا ەڭ تومەنگى جالاقىنى ەسەپتەۋ ادىستەمەسىن وزگەرتۋ تۋرالى ۇسىنىستار تالايدان بەرى ايتىلىپ ءجۇر.