ساۋىردەن باستاپ ءموبيلدى اۋدارىمدار جونىندەگى دەرەكتەردى بانكتەر سالىق ورگاندارىنا جولداي باستايدى. كىمنىڭ شوتى باقىلاۋعا ىلىگەتىنىن مەملەكەتتىك كىرىستەر كوميتەتى ءتۇسىندىردى.
العاشقى مالىمەت قاشان جىبەرىلەدى؟
2026 جىلدىڭ ءبىرىنشى توقسانى بويىنشا اقپاراتتى بانكتەر 15 ساۋىرگە دەيىن مەملەكەتتىك كىرىستەر كوميتەتىنە ۇسىنباق.
كىمدەرگە سۇراق تۋىنداۋى مۇمكىن؟
كريتەريي ءۇش شارتتان تۇرادى: ءۇش اي قاتارىنان جەكە شوتقا 100 نە ودان كوپ ءارتۇرلى ادامنىڭ اۋدارىمى ءتۇسۋى ءتيىس؛ سول ءۇش ايداعى جيىنتىق سوما 1 020 000 تەڭگەدەن اسۋى كەرەك؛ تۇسىمدەر جۇيەلى سيپاتقا يە بولۋى قاجەت.
وسى شارتتار سايكەس كەلسە، بانكتەر سالىق ورگاندارىنا حابار بەرەدى. پروسەستى مكك-نىڭ ارنايى سالىق رەجيمدەرىن اكىمشىلەندىرۋ باسقارماسىنىڭ باسشىسى ەركانات شىنبەرگەن ءتۇسىندىردى.
جەكە ماقساتتاعى اقشا اۋدارىمى بولسا نە ىستەۋ كەرەك؟
كوميتەت دەرەۋ سانكسيا قولدانبايدى: كامەرالدىق باقىلاۋ ناتيجەسى بويىنشا حابارلاما جولدانادى. سالىق تولەۋشى تۇسىنىكتەمە بەرىپ، اقشانى كاسىپكەرلىككە ەمەس، جەكە قاجەتىنە پايدالانعانىن قۇجاتپەن دالەلدەي الادى.
اۋدارىمدار كاسىپكەرلىك تابىس ەكەنى راستالسا، قوسىمشا ەسەپتىلىكتى تاپسىرۋ قاجەت. جەكە كاسىپكەر رەتىندە تىركەلمەگەن ادام تىركەلۋى كەرەك.
شوت قاشان بۇعاتتالۋى مۇمكىن؟
حابارلاما العاننان كەيىن ءبىر اي ىشىندە سالىق ورگانىنا كەلمەگەن ادامعا قاتىستى 41-كۇنى شوتتى بۇعاتتاۋ شاراسى قولدانىلۋى مۇمكىن. بۇعاتتاۋ سالىق كودەكسىندە كورسەتىلگەن تارتىپپەن عانا جۇرگىزىلەدى.
ەرەجەنىڭ ماقساتى كولەڭكەلى اينالىمدى قىسقارتۋ جانە بارىنە ورتاق سالىق ادىلدىگىن كۇشەيتۋ بولىپ وتىر، ال ادەتتەگى تۋىس-تۋعان اراسىنداعى تۇرمىستىق اۋدارىمدار ءۇشىن بىردەن ايىپپۇل سالىنبايدى.
بۇل تۋرالى Qamshy.kz اقپارات اگەنتتىگى حابارلايدى.
