اۋىل شارۋاشىلىعى سالاسىنىڭ ساراپشىسى تولەۋتاي راحىمبەكوۆ ەت باعاسىنىڭ 15-20 مىڭعا دەيىن وسەتىنىن ايتتى. ول "Tenge Talks" يۋتۋب ارناسىنا بەرگەن سۇحباتىندا وزبەكستاننان ەت ساتىپ الۋعا تۋرا كەلەتىنىن ايتتى. 

"الداعى ۋاقىتتا ءبىز قازاقتىڭ ۇلتتىق تاعامى بەشبارماققا وزبەكتىڭ ەتىن سالاتىن بولامىز. ءبىراق ەتتىڭ باعاسى ول كەزدە 15-20 مىڭ بولادى. مەن 2019 جىلى ەتتىڭ باعاسى 5-6 مىڭ تەڭگە بولادى دەپ ەسكەرتكەنمىن. ايتقان پىكىرلەرىم قانشا سىنعا الىنسا دا، بولجامدارىم ورىندالىپ جاتىر. جاعدايدى ءبىلىپ وتىرعاندىقتان وسىنداي قورىتىندى جاسادىم. ءقازىر مالدىڭ 80-90 پايىزى ۇساق شارۋاشىلىقتاردىڭ قولىندا. ءونىمنىڭ وزىندىك قۇنىنىڭ باستى بولىگى – جەم-شوپ. تەحنولوگيا بويىنشا كوپ نارسە بار، ءبىراق ءبىز ونى ۇمىتىپ كەتتىك، قولدا بار جالعىز نارسە – ءشوپ. ۇساق شارۋاشىلىقتاردىڭ تەحنيكاسى جوق، سوندىقتان ولار ءشوپتى فەرمەرلەردەن ساتىپ الادى. قۋاڭشىلىق بولعان بويدا باعا وسە باستايدى"، دەيدى ساراپشى تولەۋتاي راحىمبەكوۆ.