جالاقى قورىنا تۇسەتىن جۇك ارتتى. 2026 جىلدىڭ 1 قاڭتارىنان جۇمىس بەرۋشى قىزمەتكەرى ءۇشىن ەنپف-كە 3،5 پايىز كولەمىندە مىندەتتى زەينەتاقى جارناسىن تولەي باستادى.

بۇل وزگەرىس بيزنەستىڭ شىعىنىنا جانە بولاشاق زەينەتاقى تولەمدەرىنىڭ قۇرىلىمىنا تىكەلەي اسەر ەتتى.

جۇمىس بەرۋشى قانشا تولەيدى

ەنپف دەرەگىنە سۇيەنسەك، بيىلعى ستاۆكا 3،5 پايىز بولىپ بەكىتىلدى. ءار ايداعى قىزمەتكەر تابىسىنان وسى مولشەردى جۇمىس بەرۋشى اۋدارىپ وتىرادى.

جۇيە كەزەڭ-كەزەڭمەن ءوسىپ كەلەدى: 2024 جىلى – 1،5%، 2025 جىلى – 2،5%، 2026 جىلى – 3،5%، 2027 جىلى – 4،5%، 2028 جىلى – 5% بولادى.

مىسال ءۇشىن: ايلىعى 300 000 تەڭگە قىزمەتكەر ءۇشىن اي سايىن 10 500 تەڭگەنى جۇمىس بەرۋشى ەنپف-كە اۋدارادى.

كىمدەرگە قاتىستى، كىمدەرگە جۇرمەيدى

وپۆر 1975 جىلى جانە ودان كەيىن تۋعان قىزمەتكەرلەر ءۇشىن كوزدەلگەن. بۇل توپتىڭ 1998 جىلعا دەيىنگى ەڭبەك ءوتىلى از نەمەسە جوق بولعاندىقتان، بولاشاقتا ولاردىڭ زەينەتاقىسى ءۇش بولىكتەن تۇرادى: بازالىق (مەملەكەتتەن)، جيناقتىق (قىزمەتكەردىڭ 10% جارناسىنان)، جانە شارتتى-جيناقتىق (جۇمىس بەرۋشىنىڭ جارناسىنان).

جۇمىس بەرۋشى مىنا ساناتتار ءۇشىن وپۆر تولەمەيدى: 1975 جىلعا دەيىن تۋعاندار، زەينەتكەرلەر، ءى–ءىى توپ مۇگەدەكتىگى بار ازاماتتار، اسكەري قىزمەتشىلەر جانە ولارعا تەڭەستىرىلگەندەر. تولەمنىڭ ءتۇسۋىن مەملەكەتتىك كىرىستەر كوميتەتى باقىلايدى.

تولەم قالاي بەرىلمەك

جۇمىس بەرۋشى جارناسى ەسەبىنەن تولەمدەر ءومىر بويى تولەنەدى. الايدا ازامات تۇراقتى تۇرۋ ءۇشىن شەتەلگە كەتكەندە نەمەسە ازاماتتىعىن وزگەرتكەندە بۇل تولەمدەر توقتاتىلادى.

وپۆر قاراجاتى قىزمەتكەردىڭ جەكە مەنشىگىنە جاتپايدى، مۇراعا قالدىرىلمايدى. ازامات ءوز جيناقتىق (10%) جارناسىن عانا الا الادى، ال جۇمىس بەرۋشى جارناسى ەنپف ىشىندە قايتا بولىنەدى.

نەگە الىپ تاستالمادى

وتكەن جىلى ۇكىمەت ققس مولشەرلەمەسىن 20 پايىزعا دەيىن ءوسىرۋ سەنارييىن قاراستىرسا، الەۋمەتتىك سالىق پەن جۇمىس بەرۋشى جارناسىن الىپ تاستاۋعا بولاتىنىن ۆيسە-پرەمەر سەرىك جۇمانعارين ايتقان. بۇل ارقىلى جالاقى قورىنا تۇسەتىن قىسىمدى ازايتۋ كوزدەلگەن.

كەيىن ققس 16 پايىز دەڭگەيىندە بەكىتىلگەن سوڭ، الەۋمەتتىك تولەمدەر مەن وپۆر-دى ساقتاۋ تۋرالى شەشىم قابىلداندى. ەڭبەك جانە حالىقتى الەۋمەتتىك قورعاۋ مينيسترلىگى بۇل جارنا قىزمەتكەرگە كارىلىك كەزەڭىندە قوسىمشا شارتتى-جيناقتىق تولەم بەرەدى دەپ ءتۇسىندىردى.

2028 جىلعا دەيىنگى كەستە ساقتالىپ تۇر: كەلەسى جىلى ۇلەس 4،5% بولادى، 2028 جىلى 5% دەڭگەيىنە جەتەدى.

بۇل تۋرالى Qamshy.kz اقپارات اگەنتتىگى حابارلايدى.