ءبىلىم مەن عىلىمنىڭ قاسيەتتى قارا شاڭىراعى ءال-فارابي اتىنداعى قازۇۋ-دا اكادەميك، عالىم، تەحنيكا عىلىمدارىنىڭ دوكتورى، پروفەسسور، قازاق كسر مەملەكەتتىك سىيلىعىنىڭ لاۋرەاتى، قازاق كسر عىلىمىنىڭ ەڭبەك سىڭىرگەن قايراتكەرى ومىربەك Aرىسلان ۇلى جولداسبەكوۆتىڭ 85 جاسقا تولۋىنا وراي القالى جيىن ءوتتى، - دەپ حابارلايدى «قامشى» پورتالى.

1970-1986 جىلدارى س.كيروۆ اتىنداعى قازمۋ-دا 16 جىل بويى رەكتورلىق قىزمەت اتقارعان ومىربەك Aرىسلان ۇلىنىڭ بۇگىندە الەمنىڭ ۇزدىك ۋنيۆەرسيتەتتەرى قاتارىنا ىلىككەن قازۇۋ قالاشىعىنىڭ نەگىزىن قالاۋعا سىڭىرگەن ەڭبەگى زور. 39 جاسىندا قازاقستاننىڭ تۇڭعىش ۋنيۆەرسيتەتىنە بەكىتىلگەن رەكتور ەلىمىزدىڭ ءبىلىم بەرۋ ءىسىن جاڭا باعىتقا بۇرىپ، عىلىم ايدىنىنا تىڭ تىنىس اكەلدى. ول كورنەكتى قوعام جانە مەملەكەت قايراتكەرى رەتىندە ەلىمىزدىڭ وركەندەۋىنە سۇبەلى ۇلەس قوستى.

عالىمنىڭ تۋعان كۇنى قازۇۋ رەكتورى عالىم مۇتانوۆ باستاعان ۋنيۆەرسيتەت ۇجىمى مەن بەلگىلى عالىمدار، ومىربەك ارىسلانۇلىمەن قىزمەتتەس بولعان دوستارى، قۇربى-قۇرداستارى، وتباسى مۇشەلەرى، شاكىرتتەرى مەن ستۋدەنتتەرى جينالىپ، عالىم رۋحىنا تاعزىم ەتتى. اكادەميك ەسكەرتكىشىنە گۇل شوقتارىن قويعان سوڭ شارانى قازۇۋ رەكتورى، اكادەميك عالىم مۇتانوۆ اشتى. ول ءبىلىم وشاعىندا بۇگىنگى تاڭدا جالعاسىن تاۋىپ جاتقان جوبالاردى كەزىندە ءو. جولداسبەكوۆتىڭ ءوزى جوسپارلاپ كەتكەنىن جانە اكادەميكتىڭ ۋنيۆەرسيتەت دامۋىنا سىڭىرگەن زور ەڭبەگى ەشقاشان ۇمىتىلمايتىنىن ەرەكشە اتاپ ءوتتى. سونداي-اق ق ر ۇعA پرەزيدەنتى مۇرات جۇرىنوۆ پەن پروفەسسور سۇلتان سارتايەۆ ءسوز الىپ، عالىمنىڭ ونەگەلى ومىرىنەن تاعىلىمدى ەستەلىكتەر ايتتى.

ءىس-شارانىڭ جالعاسى قازۇۋ-دىڭ مەحانيكا-ماتەماتيكا فاكۋلتەتىندەگى ءو. جولداسبەكوۆ اتىنداعى ۇلكەن ءدارىس زالىنىڭ  سالتاناتتى اشىلۋ راسىمىنە ۇلاستى. ءدارىسحانا لەنتاسىن ۋنيۆەرسيتەت رەكتورى عالىم مۇتانوۆ پەن ق ر ۇعA پرەزيدەنتى مۇرات جۇرىنوۆ كەستى.

عالىم مۇتانوۆ ونەگەلى ءومىر يەسىنىڭ اتقارعان قىزمەتى، قايراتكەرلىگى حاقىندا بايانداما وقىدى. «ومىربەك ارىسلان ۇلى قىزمەت قىلعان جىلدارى قازاقتىڭ ءبىلىم كەڭىستىگىنە جاڭاشىلدىق الىپ كەلدى. كوپتەگەن يگى ىستەردىڭ جارشىسى بولعان ومەكەڭنىڭ قازاق ەلىن وزگە باعىتتا دامىتۋ، ءبىلىم مەن عىلىمدى وركەندەتۋ جولىندا جاساعان ەڭبەگى ۇشان-تەڭىز. باستىسى عالىم ءوز ءىزباسارلارىنا ەڭ قۇندى نارسە – ءوزىنىڭ عىلىمي مۇراسىن قالدىردى. ومىربەك جولداسبەكوۆ 25 عىلىم دوكتورىن، 100-دەن اسا عىلىم كانديداتىن دايىندادى. ول – 400-دەن استام عىلىمي ەڭبەكتىڭ،  12 مونوگرافيا مەن 30 وقۋلىقتىڭ اۆتورى. سونىمەن قاتار، ءو. Aرىسلان ۇلى   رەسپۋبليكامىزدىڭ جوعارعى كەڭەسىندە قىزمەت قىلىپ، ونان سوڭ پارلامەنت دەپۋتاتتىعىنا 6 رەت سايلانعان. كەيىننەن ەل ءماجىلىسىنىڭ الەۋمەتتىك دامۋ بويىنشا كوميتەتىنىڭ ءتوراعاسى بولعان ءبىرتۋار  ازاماتتىڭ كەشەگى جۇرگەن جولى مەن قىلعان ەڭبەگى بارشامىزعا ۇلگى-ونەگە. ول كىسىنىڭ ءار ءىسى مەن جەتكەن جەتىستىگى – ءبىز ءۇشىن ۇلكەن مەكتەپ. مەن وسىنداي ارداقتى ازاماتتىڭ ءىسىن جالعاپ، ىزىمەن جۇرگەنىمدى ماقتان تۇتامىن جانە ءىسىمدى ۇلكەن جاۋاپكەرشىلىكپەن اتقارامىن»، – دەدى رەكتور.

قايراتكەردىڭ عۇمىرىنان سىر شەرتكەن دەرەكتى فيلم قازاقتىڭ دارا تۇلعاسى جايلى جاستارعا مول ماعلۇمات بەردى. ۇزدىك ستۋدەنتتەر مەن مەكتەپ وقۋشىلارىنا ومىربەك جولداسبەكوۆ اتىنداعى شاكىرتاقىلار تابىستالدى.

شارا بارىسىندا وقىلعان ق ر پرەزيدەنتىنىڭ كەڭەسشىسى مۇحتار قۇلمۇحاممەدتىڭ قۇتتىقتاۋ حاتى دا ومىربەك ارىسلان ۇلىنىڭ ازاماتتىق كەلبەتىن اشا تۇسكەن ەدى. ودان كەيىن مىنبەگە ق ر ۇعA پرەزيدەنتى، اكادەميك مۇرات جۇرىن ۇلى شىعىپ ءسوز سويلەدى. ول: «ەلىنىڭ قامى ءۇشىن قىزمەت قىلعان ارداقتى ازاماتتىڭ ءومىرى تۋرالى جيىن باستالعالى بەرى ەستىپ-بىلىپ جاتىرمىز. ول كىسىنى مەن ستۋدەنت جاسىمنان بىلەمىن. تالاي ءدارىسىن تىڭدادىق. وتە ءبىر تارتىمدى، قاراپايىم ومىردەن الىنعان مىسالدارمەن ءدارىس وقيتىن. پروفەسسور ءومىرىنىڭ ەڭ ءماندى جىلدارىن ۇستازدىققا ارنادى. ءومىرىنىڭ كوپ بولىگىن وسى قازۇۋ-دا وتكىزدى. جاستىق شاعىن دا وسىنداي ۇلكەن ۋنيۆەرسيتەت قالاشىعىن سالۋعا كۇش جۇمسادى. قازۇۋ قالاشىعى – ول كىسىنىڭ ارتىندا قالدىرعان ەڭ ۇلكەن، ەلەۋلى ەڭبەكتەرىنىڭ ءبىرى. ول كىسىنىڭ قالاعان مەكتەبى، ۋنيۆەرسيتەتى – بۇگىنگى كۇننىڭ قىمبات قازىناسى. ومەكەڭ ىرگەسىن قالاعان قازۇۋ قازىرگى تاڭدا ەرەكشە قارقىنمەن گۇلدەنۋدە. وسى تۇستا تالماي ەڭبەك ەتىپ جاتقان ۋنيۆەرسيتەت ۇجىمى مەن رەكتورى عالىمقايىر مۇتانۇلىنا العىس ءبىلدىرىپ، الداعى ۋاقىتتا ساتتىلىك تىلەيمىن!» – دەدى. مۇرات جۇرىن ۇلىنىڭ ءسوزىن جالعاپ ورتاعا اكادەميكتىڭ قىزمەتتەس بولعان ارىپتەستەرى، شاكىرتتەرى شىعىپ، ەرەكشە ەستەلىكتەرىمەن ءبولىستى.  بۇنان سوڭ اكادەميك، پروفەسسور ومىربەك Aرىسلان ۇلى جولداسبەكوۆتىڭ وتباسى اتىنان پروفەسسور بايان ومىربەك قىزى ءسوز سويلەدى. «ەلىنىڭ جارقىن بولاشاعىنا بار عۇمىرىن ارناعان ومىربەك جولداسبەكوۆتىڭ 85 جىلدىق مەرەيتويىنا جينالعان بارشا قاۋىمعا وتباسىمنىڭ اتىنان العىس ايتامىن.  بۇگىن اكەمنىڭ تۋعان كۇنىندە ارنايى ەسكە الىپ، وسىنداي ۇلكەن شارا وتكىزىپ جاتقان ۋنيۆەرسيتەت باسشىلىعىنا شەكسىز ريزامىن. اكەمىزدىڭ ءومىر جولى مەن ەتكەن ىستەرىنە وزدەرىڭىز كۋاسىزدەر. مەن وسىنداي الىپ تۇلعانىڭ ۇرپاعى بولعانىمدى ماقتان تۇتامىن جانە ءاردايىم زور جاۋاپكەرشىلىك سەزىنەمىن!» – دەدى ول.

بار سانالى عۇمىرىن ەلىنىڭ يگىلىگى جولىنا سارپ ەتكەن تۇعىرى بيىك تۇلعانىڭ ەسىمى مەن ەرلىگى، ەرەن ەڭبەگى ەل ەسىنەن ەشقاشان دا وشپەك ەمەس.