قازاقتىڭ ءبىر تۋار ۇلى، كەمەڭگەر اقىن اباي قۇنانباي ۇلىنىڭ بالالىق شاعى 104 سەريالى 3D فورماتىنداعى انيماسيالىق فيلمگە ارقاۋ بولماق، - دەپ حابارلايدى «قامشى» پورتالى. بۇل تۋرالى جوبا پروديۋسەرى، «اباي جولى» كومپانياسىنىڭ پرەزيدەنتى عۇسىمان قاجىتاي ۇلى ايتىپ بەردى.

قحر ءۇرىمجى قالاسىندا ورنالاسقان «اباي جولى» كومپانياسى وسى جوبامەن 2 جىلدان بەرى اينالىسىپ جاتقان كورىنەدى. ع. قاجىتاي ۇلى ۋاقىتتىڭ كوپ بولىگى دايىندىق جۇمىستارىنا، سەناريي مەن پىسىقتاۋ جۇمىستارىنا كەتكەنىن ايتادى.

«العاش رەت اينالىسىپ جاتقان جوبا بولعاندىقتان ەكى جىلداي ۋاقىت العاشقى ەكى سەريانى ازىرلەۋ مەن سەنارييدى پىسىقتاۋعا كەتتى. فيلم سەنارييىن قازاقستاندىق سەناريستەر، جايلىباي جانات، حاليوللا رامازان، باقىتجان قۇلجاباي ۇلى مەن قىتايداعى قانداسىمىز قاسيەت ساقيوللا جازىپ جاتىر. سەناريي، بەينەلەۋ جۇمىستارىنا اقىل-كەڭەس بەرەتىن كەڭەسشىلەرىمىز بار. مادەنيەت، ءداستۇر ماسەلەسىندە ەتنوگرافتاردىڭ كومەگىنە جۇگىنەمىز»، - دەيدى عۇسىمان قاجىتاي ۇلى.

جوبا پروديۋسەرىنىڭ ايتۋىنشا، انيماسيالىق فيلم سەريالارى كەزەڭ-كەزەڭمەن ازىرلەنبەك. بيىلعى جىلى جوبانىڭ 15-20 سەرياسىن تامامداۋ جوسپارلانۋدا.

«جوباداعى نەگىزگى ماقسات – ساپاعا ءمان بەرۋ. بۇل فيلم كەيىنگى قازاق انيماسيالىق فيلمدەرىنە ۇلگى بولاتىن، 3D فورماتىنداعى انيماسيالىق فيلمدەردى ازىرلەۋدىڭ ستاندارتىنا اينالۋى ءتيىس. وسى سەبەپتەرگە بايلانىستى ءبىز دايىندىق، پىسىقتاۋ جۇمىستارىنا كوپ اينالدىق. ءاربىر قيمىل، سەكۋندتتىق قوزعالىستارى بەينەلەۋگە قىرۋار ەڭبەك كەتەتىنىن بىلەسىزدەر. ەندىگى كەزەڭدە ءبىرشاما قارقىندى جۇمىس ىستەيمىز دەپ وتىرمىز. جىل سوڭىنا دەيىن 15-20 سەريانى دايىنداۋ ويىمىزدا بار»، - دەيدى ع. قاجىتاي ۇلى.

كوپ سەريالى انيماسيالىق جوباعا اباي قۇنانباي ۇلىنىڭ بالالىق شاعى، دانا ابايدىڭ بالا بەينەسى ارقاۋ بولماق. كورەرمەندەردى بالا ابايدىڭ اقىلدىلىعى، تاپقىرلىعى مەن شەشەندىگى ارقىلى تاربيەلەۋ، فيلم بارىسىندا قانداي دا قيىندىقتاردان ەرەكشە اقىلدىلىعى مەن تاپقىرلىعى ارقاسىندا جول تابا بىلەتىن ابايدى ۇلگى ەتۋ – باستى ماقسات.

«ابايدى بىلمەيتىن قازاق جوق. وسى كۇنگە دەيىن ءبىز «اباي جولى» باستاعان شىعارمالار ارقىلى اقىنىمىزدىڭ بوزبالا شاعى، ءومىرىنىڭ اقىل توقتاتقان، تولىسقان، ەل اعاسى بولعان كەزەڭدەرىمەن تانىسساق، مىنا انيماسيالىق جوبادا ابايدىڭ 8 جاسقا دەيىنگى ءومىرى سۋرەتتەلەدى. «اباي جولىندا» اتالاتىن كەيىپكەرلەر مەن دانا اقىنىمىزدىڭ تۋىستارىنىڭ، دوستارى مەن جاقىندارىنىڭ اتتارى، جەر-سۋ اتاۋلارى وزگەرتىلمەيدى. بارلىعى سول كۇيىندە ساقتالادى»، - دەگەن جوبا جەتەكشىسى انيماسيالىق فيلم ءتيىمدى تاربيە قۇرالى عانا ەمەس، بىرنەشە تىلگە اۋدارىلىپ، ۇلكەن تابىس كوزىنە اينالاتىنىنا دا سەنىمدى.

«ەگەر وسى جوبانى بىرنەشە تىلگە اۋدارىپ، استانامىزدا وتەتىن ەكسپو-2017 كورمەسىنە ۇسىنساق ۇلكەن وقيعا بولعان بولار ەدى. الەم قازاقتى مۇناي مەن مەتالدان، گاز بەن كومىردەگ باسقا، تاعى ءبىر قىرىنان تانىلار ەدى»، - دەگەن ع. قاجىتاي ۇلى انيماسيالىق ءفيلمدى جاقىن بولاشاقتا قىتايدىڭ ەڭ ءىرى CCTV تەلەكومپانياسىنىڭ بالالار ارناسىنان كورسەتۋگە ازىرلىك جاساپ جاتقاندارىن ايتتى. انيماسيالىق ءفيلمنىڭ ساپاسى مەن تەحنيكالىق سيپاتتامالارى تەلەارنانىڭ قوياتىن نەگىزگى تالاپتارىنا تولىقتاي ساي كەلەدى ەكەن. قىتايدا CCTV-دان باسقا قانشاما تەلەارنا بارىن ەسكەرسەك، بۇل باستامانىڭ بولاشاعىنىڭ زور ەكەنىن پايىمداۋ قيىن ەمەس. وسىلايشا انيماسيالىق ءفيلمنىڭ ءازىر بولعان العاشقى 20 سەرياسىن ءبىر ۋاقىتتا بىرنەشە ەلدە كورسەتۋدى ماقسات ەتىپ وتىر جوبا اۆتورلارى.

قىتايدا ءجۇرىپ قازاق رۋحانياتىنا قامقورلىق تانىتىپ جۇرگەن عۇسىمان قاجىتاي ۇلى قازاقستانمەن بايلانىس ماسەلەسىنە دە ەرەكشە ءمان بەرۋ كەرەك دەپ سانايدى. الماتى كاسىپكەرلەر قاۋىمداستىعى ۇيىمداستىرعان باسقوسۋعا ارنايى كەلگەن ول قازاقستاندىق فيلمدەردىڭ پروكاتىنا قاتىستى دا تىڭ ويلارىمەن ءبولىستى. ونىڭ ايتۋىنشا، قازاق كينوگەرلەرى تۇسىرگەن فيلمدەردى شەت تىلدەرىنە اۋدارىپ، حالىقارالىق پروكاتقا شىعارۋدى قولعا الۋ كەرەك. بۇل ىستە جۇڭگو نارىعىنا ەركىن كىرىپ، مادەني ونىمدەردى ساۋدالاۋعا بولاتىنىن ايتىپ وتىر.

«قىتايدا مادەني ونىمدەردىڭ نارىعى ۇلكەن. الەمنىڭ كوپتەگەن ەلدەرى اينالاسىنا كينوسىمەن، مۋلتفيلمدەرىمەن، باسقا دا مادەني ونىمدەرىمەن تانىلۋدا. تانىلىپ قانا قويماي پايداعا كەنەلۋدە. ءبىز دە قازىرگىدەي مادەنيەت تۇتىنۋشى قالپىمىزدا قالماي، مادەنيەت تاراتۋشى ەلگە اينالۋدى ماقسات ەتۋىمىز قاجەت»، - دەيدى عۇسىمان قاجىتاي ۇلى.

پروديۋسەردىڭ بۇعان دەيىن ساۋدا، ەكونوميكالىق سالادا بايلانىس ورناتىپ، تەك شيكىزات پەن تاۋار تاسىمالىن عانا جۇزەگە اسىرىپ كەلگەن قازاقستان مەن جۇڭگو اراسىندا جاقىن بولاشاقتا مادەني بايلانىستاردىڭ دا جاڭا بەلەسكە شىعارىنا سەنىمى زور. قوس تاراپ تا وسى ماقساتتا بىرلەسە جۇمىس ىستەۋگە مۇددەلى دەپ وتىر.

دارحان مۇقانتەگى