ءبىلىم ءمينيسترى بولعالى سىننان كوز اشپاعان ەرلان ساعادييەۆتىڭ كەزەكتى باستاماسىنا دەپۋتاتتار قارسى شىقتى، - دەپ حابارلايدى «قامشى» پورتالى كتك ارناسىنا سىلتەمە جاساپ.

ەلىمىزدىڭ باس ءمۇعالىمى ۋنيۆەرسيتەت ستۋدەنتتەرىنە 1991 جىلدىڭ 16 جەلتوقسانىنان باستالاتىن تاۋەلسىز قازاقستاننىڭ تاريحىن عانا وقىتۋعا بەكىنىپ وتىر. ال حالىق قالاۋلىلارى ساعادييەۆ قازاقتىڭ تەرەڭ شەجىرەسىن ءبىر كۇندە شورت كەسپەك دەپ الاڭداۋلى. ماجىلىسمەندەر بۇگىن بالاعا ەكپە سالۋدى بيزنەسكە اينالدىرىپ العاندارعا دا شۇيلىكتى. ويتكەنى، تولىق زەرتتەلمەگەن پرەپاراتتاردى قابىلداعاننان كەيىن، مۇگەدەك بولىپ قالعان ۇل-قىزدىڭ سانى ارتىپ كەتكەن.   

بۇگىن جالپى وتىرىسقا جينالعان دەپۋتاتتار اشۋلى. ولاردىڭ ىزاسىنا تيگەن ءبىلىم ءمينيسترىنىڭ كەزەكتى رەفورماسى ەكەن. ماجىلىسمەندەر ەرلان ساعادييەۆتىڭ «ستۋدەنتتەرگە تەك تاۋەلسىز قازاقستان تاريحىن وقىتامىن» دەگەن باستاماسىنا نارازى. باس ۇستاز تولارساقتان قان كەشىپ، قازاققا بوستاندىق الىپ بەرگەن اتا-بابامىزدى جاس ۇرپاقتىڭ ساناسىنان ءبىر كۇندە سىزىپ تاستاماق دەپ قاۋىپتەنەدى دەپۋتاتتار. سوندىقتان، ءبىلىم ءمينيسترىنىڭ  ءالى دە رايىنان قايتۋىن تالاپ ەتتى.

بەرىك دۇيسەنبينوۆ، ءماجىلىس دەپۋتاتى:

ء-بىز ءوزىمىزدىڭ ءتول تاريحىمىزعا وسىنشاما ءىشتارلىق جاساپ وتىرعانىمىزدى ءتۇسىنۋ قيىن.تاريح ءپانىن مەيلىنشە كەڭ كولەمدە تەرەڭدەتىپ وقىتۋ قاجەت. كەيبىر كورشىلەس مەملەكەت باسشىلارىنىڭ اۋزىنان:«قازاقستاندا بۇرىن مەملەكەتتىلىك بولماعان» دەگەن سۋىق سوزدەردى ەستىپ قالىپ جاتىرمىز. ەگەر ءبىز ءوز تاريحىمىزدى بىلمەسەك، باسقا مەملەكەتتەرگە ءبىزدىڭ تاريحىمىزدى قالاي مويىنداتىپ، قالاي سىيلاتا  الامىز؟

ءبىراق، ءمينيستردىڭ بۇل جانايقايعا قۇلاق اساتىن ءتۇرى جوق. ءقازىر ءۇش ۋنيۆەرسيتەتتە «تاۋەلسىز قازاقستان تاريحى» اتتى جاڭا ءپان سىناق رەتىندە وقىتىلىپ جاتىر. ياعني، ونداعى ستۋدەنتتەر ەلىمىزدىڭ تەك 1991 جىلدان بەرگى شەجىرەسىن تانىپ-بىلۋدە. ءتىپتى قازاقستاننىڭ تاريحى مەملەكەتتىك ەمتيحاننان دا الىنىپتى. دەپۋتاتتار وتكەنىمىزدى تۇگەندەپ بولعان سوڭ، بولاشاقتىڭ ماسەلەسىنە اۋىستى. «اق جول» پارتياسىنداعىلار مۇگەدەك بالالاردىڭ تاعدىرىنا الاڭداپ وتىر. ايتۋلارىنشا، ەكپەدەن كەيىن مايىپ بولىپ قالعان ۇل-قىزدىڭ سانى ارتقان. ءاربىر مۇگەدەك ءۇش بالانىڭ ءبىرى دارىگەردىڭ قاتەلىگىنەن دەنساۋلىعىنان ايىرىلسا، 3 پايىزى ەكپەنىڭ كەسىرىنەن جارىمجان بولىپ قالعان.

مەرۋەرت قازبەكوۆ، ءماجىلىس دەپۋتاتى:

-ماسەلەن، بىزدە پايدالانىلاتىن پاپيلليوماعا قارسى پرەپارات تولىق زەرتتەلمەگەن. بۇل دارىگە اقش-تا جۇرت جاپپاي نارازىلىق تانىتقان بولاتىن. ال، مۇنداي تۇسىنىكسىز پرەپاراتتىڭ ەلىمىزگە قالاي ءوتىپ كەتكەنى بەلگىسىز. ارينە، بۇنىڭ ارتىندا بىرەۋلەردىڭ تۇرعانى انىق.

دەپۋتاتتاردىڭ بۇگىن اياق استى ەكپەگە قارسىلىق ءبىلدىرۋىنىڭ ءوز سەبەبى بار. ويتكەنى، ءۇش كۇننەن كەيىن ەمحانالاردا ءتۇرلى اۋرۋعا قارسى جاپپاي ەكپە سالۋ ناۋقانى باستالادى. ءدارىنى ەكى ايلىق بالادان باستاپ، ون التىداعى جاسوسپىرىمدەرگە دەيىن قابىلداۋى ءتيىس. ەكپە مەملەكەت ەسەبىنەن تەگىن جاسالادى.

دەپۋتاتتار دارىگەرلەر بالاعا ەكپە سالماس بۇرىن، اتا-انالارعا مىندەتتى تۇردە پرەپاراتتىڭ كەرى اسەرى بولاتىنىن دا ەسكەرتۋى قاجەت دەيدى. ياعني، ۇلكەندەر قاۋىپ-قاتەردەن حاباردار بولعان سوڭ، جازباشا تۇردە كەلىسىم بەرۋى ءتيىس. سونداي-اق، بۇگىن داۋ تۋعىزعان «قازاقستاننىڭ تاريحىنا» كەلسەك، ماجىلىسمەندەر ستۋدەنتتەر تۇگىلى، شەتەلدىكتەرگە ازاماتتىق بەرمەس بۇرىن، سىرتتان كەلگەندەردەن ەل شەجىرەسىنە قاتىستى ەمتيحان قابىلداۋدى تالاپ ەتپەك.