استاناداعى پارلامەنت عيماراتىنىڭ الدىندا قاراعاندىلىق بەلسەندى عالىمبەك اقىلبەكوۆ ۇكىمەتتىڭ اۋىل شارۋاشىلىق جەرلەرىن اۋكسيون ارقىلى ساتۋ جوسپارىنا قارسىلىعىن ءبىلدىرۋ ءۇشىن جالعىز ادامدىق پيكەت وتكىزدى، - دەپ حابارلايدى «قامشى» پورتالى ازاتتىققا سىلتەمە جاساپ.

«دەپۋتاتتاردىڭ اتىنا توپتاپ حات قالدىرۋعا بولمايدى ەكەن. سوندىقتان تەك مۇحتار تىنىكەيەۆكە ۇندەۋ جازىپ، ءماجىلىستىڭ حات بولىمىنە قالدىردىم. ەندى شەتەلدىكتەرگە جەر ساتۋعا، جالعا بەرۋگە قارسىلىعىمدى وسىلاي اشىق تۇردە كورسەتكىم كەلدى»، - دەيدى عالىمبەك اقىلبەكوۆ.

بەلسەندى پارلامەنت پەن ۇكىمەت ءۇيىنىڭ ورتاسىندا اقوردانىڭ ماڭىندا «جەر ساتىلماسىن» دەگەن جازۋى بار قاعازدى بەس مينۋتتاي ۇستاپ تۇردى. وسى ۋاقىتتىڭ ىشىندە وعان ارنايى جاساق كيىمىندەگى قىزمەتكەرلەر ەسكەرتۋ جاسادى. عالىمبەك اقىلبەكوۆ ەسكەرتۋدەن كەيىن قولىنداعى قاعازىن جيناپ قويۋعا ءماجبۇر بولدى. بەلسەندى ارنايى جاساق قىزمەتكەرلەرىنە جالعىز ادامدىق پيكەت وتكىزۋ زاڭعا قايشى ەمەستىگىن تۇسىندىرۋگە تىرىستى. ءبىراق بەلسەندىنى پوليسيا كولىگى ەسىل اۋداندىق ىشكى ىستەر بولىمىنە الىپ كەتتى.

2016 جىلعى ناۋرىز ايىنىڭ سوڭىندا ۇلتتىق ەكونوميكا ءمينيسترى ەربولات دوسايەۆ 1 شىلدەدەن باستاپ قازاقستانداعى اۋىل شارۋاشىلىعى جەرلەرىنىڭ اۋكسيون ارقىلى ساتىلاتىنى تۋرالى مالىمدەمە جاساعان سوڭ بۇل جوسپارعا قاتىستى قوعامدىق نارازىلىق جيىلەدى.