اقش پرەزيدەنتتىك سايلاۋىنا ءتۇسىپ جاتقان رەسپبۋليكاشىلدار وكىلى ترامپ پەن دەموكرات وكىلى كلينتون نيۋ-يوركتەگى ءبىر كاتوليك قورى جايعان داستارحاندا قارسى ۇشىراستى. ولار داستارحاندا بىر-بىرلەرىنە قالجىڭمەن سوقتىعىستى. قايىرىمدىلىق داستارحانىندا نيۋ-يورك باسشىلارى دا بولعان. داستارحان قوناقتارى ارناۋلى شاقىرىلعان 500 كىسى بولىپ، ءار ءبىرى 3000 دوللاردان وتەم جاساۋعا مىندەتتەلگەن.

حابەرتۇرىك سايتى جازۋىنشا، اس ۇستىندەگى پرەزيدەنتتىككە ۇمىتكەرلەر ديالوگى وتىرعاندارعا ەرىكسىز ەزۋ تارتقىزدى. مىنبەرگە ءبىرىنشى شىققان ترامپ، ءباسپاسوزدىڭ ءبىرجاقتى پوزيسيا ۇستانعانىن سىناي سويلەپ، دالەل رەتىندە: «ميشەل وباما ءسوز سويلەسە ونى بارلىعى ۇناتادى، بۇل فانتاستيكا، ونى كەرەمەت دەپ ويلايدى ءبارى. ال، مەنىڭ ايەلىم مەلانيا دا تۋرا سول ءسوزدى سويلەپ ەدى، ءبارىنىڭ قارسىلىعىنا قالدى. تۇسىنە المايمىن»، - دەگەن.

ودان سوڭ ترامپ ءسوزىن جالعاپ، كلينتون مەن وتە مادەني قارسىلاس ەكەنىن تىلگە تيەك ەتكەن. مىنبەرگە شىعار الدىندا  كلينتونمەن سوقتىعىسىپ العانىن ايتقان ول: «ماعان سىپايى تۇردە «كەشىر!» دەدى، ال، مەن وعان «سەنىمەن كەڭسەمە بارعان سوڭ سويلەسۋگە مۇمكىندىك بەر» دەپ ايتتىم، حيللاريدىڭ بۇل كەشتە كوپ كۇلەتىنىنە، ورىنسىز جەردە دە كۇلەتىنەن كۇمانىم جوق» دەدى. سونداي-اق، «حيللاري پاراقور عوي، Watergate كوميسسياسىنان الىندى. Watergate كوميسسياسىنان الىناتىنداي قانداي پاراقور بولدىڭ؟» دەگەن.

ال، كلينتون ۇيقىسىن قيىپ كەلىپ وتىرعانىن ايتا كەلىپ، ءوز كەزەگىندە: «ترامپتىڭ ەنەرگياسى بولماعان سوڭ ءوستىپ قۋادى» دەپ باستاعان. ول ترامپتىڭ رەسەيمەن جاقىندىعىن مىسقىلداپ، «ترامپتىڭ ات سياقتى دەنساۋلىعى بار، قۇددى ۆلاديمير ءپۋتيننىڭ اتى سياقتى» دەپ وتىرعانداردى كۇلدىرگەن.