وڭتۇستىك قازاقستان وبلىسىنداعى "ىنتىماق" شەكارا بەكەتىنىڭ لەيتەنانتىنا  بەلگىسىز بىرەۋلەر شابۋىل جاساعان. وزبەكستانمەن ىرگەمىزدى بولەتىن بەكەتتىڭ وفيسەرى ول ۋاقىتتا كوكتەرەك اۋىلىندا بولىپتى. كولىكپەن كەلگەن  بەلگىسىز بەسەۋ قارۋ كەزەپ، وفيسەردى سوققىنىڭ استىنا العان. ول ازداي، وزدەرى مىنگەن كولىككە كۇشتەپ وتىرعىزۋعا ارەكەت ەتكەن كورىنەدى. الايدا، سول ساتتە قورعانۋ ءۇشىن، قارۋ قولدانعان لەيتەنانتتىڭ وعى، سول ماڭايدان ءوتىپ بارا جاتقان اۋىل تۇرعىنىن جاراقاتتاپتى. سالدارىنان، وق تيگەن ازامات اۋرۋحانا توسەگىندە تىلگە كەلمەي، كوز جۇمدى.

ارقانكەرگەننەن باستالعان ادام ءولىمى، ايعا تولماي جاتىپ، تاعى قايتالاندى. ىرگەمىزدە تاعى دا مىلتىق اتىلىپ، تاعى ءبىر ازامات قاڭعىعان وقتىڭ قۇربانى بولدى. شەكارا قىزمەتكەرىنە  قارۋ كەزەپ، شابۋىل جاساعان توپ،  وفيسەردىڭ الدىمەن اسپانعا، ارتىنشا كولىك دوڭگەلەگىنە اتقان وعىنان سوڭ، وقيعا ورنىنان ىزدەرىن سۋىتىپ ۇلگەرگەن. ۇلتىق قاۋىپسىزدىك كوميتەتى باسپا ءسوز قىزمەتىنىڭ حابارلاۋىنشا، قاراقشىلىق جاساعان توپ مىنگەن كولىكتەن سۋىق قارۋ تابىلعان. ال، ءتۇرلى دارەجەدەگى جاراقات العان وفيسەرگە مەديسينالىق كومەك كورسەتىلگەن.  ءقازىر بۇل وقيعاعا قاتىستى تەرگەۋ باستالىپ، پوليسيا بەلگىسىز بەسەۋدىڭ اتى ءجونىن انىقتاپ، قاماۋعا الۋ شاراسىن قولعا الدى.

31 تەلەارنا