اقتوبەدە تاعى دا دۇربەلەڭ. پوليسەيلەردىڭ ءتول مەرەكەسى قارساڭىندا ءتارتىپ ساقشىلارى مەن قىلمىسكەرلەر اراسىنداعى اتىستان ەكى قىلمىسكەر وققا ۇشىپ، ءوز قىزمەتىن ورىنداۋ بارىسىندا تاعى ەكى پوليسيا قىزمەتكەرى جاراقات الىپ، اۋرۋحاناعا جەتكىزىلدى. قالا ىرگەسىندەگى كىرپىشتى اۋدانىنداعى ۇيلەردىڭ بىرىنە تىعىلعان كۇدىكتىلەر ءوز ەرىكتەرىمەن بەرىلۋگە قارسىلىق كورسەتىپ، وق جاۋدىرعان. قارۋلى توپتىڭ ءدىني ۇيىمعا قاتىسى بارىن قۇزىرلى ورگان راستاپ وتىر. 

وسىدان ءتورت كۇن بۇرىن پوليسياعا تاكسيستى بەلگىسىز بىرەۋلەر پىشاقتاپ كەتكەنى تۋرالى حابار تۇسەدى. الايدا، قىلمىسكەر وقيعا ورنىنا كەلىپ جەتكەن ءتارتىپ ساقشىسىنىڭ ءوزىن، بىرنەشە جەردەن اتىپ كەتەدى. وسى وقيعادان كەيىن شۇعىل اسا ءقاۋىپتى قارۋلى توپتى ۇستاۋ وپەراسياسى باستالادى. قاسكويلەر اكتوبە ىرگەسىندەگى مىنا ۇيلەردە جاسىرىنىپتى. ارنايى جاساق پەن قارۋلى توپتىڭ اراسىندا التى ساعاتقا جۋىق اتىس بولدى. كۇدىكتىلەر ولىسپەي بەرىسپەۋگە بەكىنگەن. سوندىقتان، ارنايى جاساق ساربازدارى مەن ىشكى اسكەري ءبولىم سولداتتارى، بتر تەحنيكاسىمەن مەرگەندەر تارتىلىپ، سوعىس الاڭىنا اينالدى اپ-ساتتە. العاشىندا ەشتەڭە تۇسىنبەي قالعان تۇرعىندار، اتىلعان وقتىڭ جاڭعىرىعى جيىلەگەن كەزدە بارىپ، كوشەگە شىققان. -جۇگىرىپ شىقتىم. مىلتىقتاردىڭ داۋىسى ەستىلدى. اسكەري كيىنگەن ادامدار ءجۇر ەكەن. كۋاگەرلەر سۇننەت كيىم كيگەن ءدىن وكىلدەرى قىلمىستىق توپپەن كەلىسسوز جۇرگىزگەندىگىن ايتادى. ال، ماڭايداعى تۇرعىنداردىڭ ايتۋىنشا، ساقالدى ادامدار بۇل جەرگە ءجيى جينالادى ەكەن. -ساقالى بار، باسىندا تاقياسى بار جىگىتتەردىڭ جۇگىرىپ بارا جاتقانىن كورگەنمىن. وسى ارادا ۆاحابيستەر دەي مە، بىردەڭەلەر ءجۇر دەيدى. ولاردى تۇسىنبەسەك تە ۆاحابيست دەسە قاتتى قورقامىز ەندى. پوليسياعا ءوز ەركىمەن بەرىلمەي، وق جاۋدىرعان 3 قىلمىسكەردىڭ ەسىمى دە بەلگىلى بولدى كەلەسى كۇنى. 1991-جىلى تۋعان جولامان بەكباۋوۆ، 1994-جىلى تۋعان عابيت قۇرمانقۇل، ەڭ ەرەسەگى 1989-جىلى تۋعان ەرنازار مىرزاعالي. اتىس كەزىندە ولاردىڭ ەكەۋى قازا تاۋىپ، بىرەۋى اۋرۋحاناعا جەتكىزىلدى.تاعى ەكى پوليسيا قىزمەتكەرى وپەراسيا كەزىندە جارالاندى. ال، قىزمەتىن ورىنداۋ بارىسىندا وققا ۇشقان تەمىربەك جاقسىلىقوۆ كۇنى كەشە جەر قوينىنا تاپسىرىلدى. ونىڭ ارتىندا ءتورت جاسار ۇلى مەن جارى قالدى. -جاس سارباز ەدى. ءتىرى بولسا تامىز ايىندا 33-كە تولاتىن. ونىڭ اتاسى دا 40 جىل بويى پوليسيا قاتارىندا قىزمەت ەتكەن. جۇمىستىڭ بابىمەن بولعان جاعداي عوي ەندى. امال جوق. كونەمىز. بەيبىت تۇرعىندار اراسىندا قازا بولعاندار مەن جابىرلەنۋشىلەر جوق. جارالى پوليسەيلەردىڭ جاعدايى دا ءبىرقالىپتى ءقازىر.

ماقسات تولىقباي.

31 تەلەارنا