شىندىعىن ايتۋ كەرەك، "قازاقتىڭ جارتىسى ءوز ءتىلىن بىلمەيدى"، "سانىمىز ءالى از" دەيتىن قۇرداڭعازا سوزدەردىڭ داۋرەنى ءوتتى. قازاقتىڭ ءوزى تۇگىلى وزگە ۇلتتاردىڭ كوبى مەملەكەتتىك تىلدە ەركىن سويلەيدى. بىرەن-ساران سوۆەت وداعىنىڭ سالقىنى تيگەن شال-كەمپىر بولماسا، قازىرگى جۇرت قازاق تىلىنە قىرىن قارامايدى. الاش ەلىنىڭ نانىن جەپ، سۋىن ءىشىپ وتىرىپ، ونىڭ تىلىندە سويلەمەۋدىڭ "ساتقىندىق" ەكەنىن بىلەدى. بولاشاقتا قازاق جەرىندە باي-باقىتتى، بەيبىت تۇرمىس كەشىرەمىن دەسە مەملەكەتقۇرۋشى ۇلتتىڭ ءتىلى مەن ءداستۇرىن سىيلاۋ قاجەتتىگىن انىق اڭعارادى.
مىنە، سولاردىڭ ءبىرى - ۇلتى ورىس، استانا قالاسىنىڭ تۇرعىنى ەۆگەنيي رۋرا. ول ءوزىنىڭ فب-داعى پاراقشاسىندا مىناداي پىكىر قالدىرىپتى: «تامىز ايىنىڭ سوڭى مەن قىركۇيەك ايىنىڭ باسىنا قاراي قازاقشا پوست جازسام با دەپ جوسپارلاپ وتىرمىن. سول كەزدە دوستار سەندەر مەنىڭ باقىلاۋشىم بولاسىزدار. نەگىزى ءتىل ۇيرەنۋ وتە قىزىقتى ەكەن. مەن الدىمەن قازاقتىڭ ءداستۇرى جايىندا وقىپ باستادىم ( جاسىرارى جوق ازىرشە ورىس تىلىندە وقىپ جاتىرمىن). ال، بۇگىندە مەكتەپ قابىرعاسىندا جۇرگەندەرگە ايتارىم: ءتىل ۇيرەنىڭدەر، كەيىن كەش بولادى. «حالىقتىڭ جانىن ءتىلى ارقىلى عانا تۇسىنەسىڭ». ءبىز قازاقستاندا ءومىر سۇرەتىن ءارتۇرلى ۇلت وكىلدەرىمىز، ءبىزدى توعىستىراتىن ءبىر-اق دۇنيە – ءبىزدىڭ ەلىمىز. ەندەشە، ءبىر جاعادان باس، ءبىر جەڭنەن قول شىعارىپ قازاقستاننىڭ وركەندەۋىنە كومەكتەسەيىك. ءبارى جاقسى بولادى. جاماندىققا ءبارىن جوري بەرمەۋ كەرەك. بىزدە كورىكتى تابيعات تا بار. مۇنداي تابيعات الەمدە جوق. بىزدە قانشا ما ۇلتتار دوستىقپەن ءومىر سۇرەدى. ءدال وسىنداي كوپۇلتتى ەلدىڭ بەرەكەلى ءومىر سۇرگەنىن بۇرىن سوڭدى كورگەن ەمەسپىن. ەلىمىزگە جارقىن جاعىمىزبەن قارايىق!» .
ەلدى سىيلاعان، جەردى سىيلاعان دەگەن وسى. ال ءوزىن سىيلاعاندى قازاق ءارقاشاندا توبەسىنە كوتەرىپ، توردەن ورىن بەرگەن. سول جايساڭدىعىمەن ءبىراز جۇرتتى باۋىرىنا باسىپ وتىر.
قازىبەكشە ايتساق:
دوس بولعانعا قۇشاق اشىق تۋىسپىز،
قاس قىلعانعا قيىپ تۋسەر قىلىشپىز!
مارعۇلان اقان
پىكىر قالدىرۋ