2022 جىلدىڭ قىركۇيەگىندە مەملەكەت باسشىسى قاسىم-جومارت توقايەۆ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا جولداۋى اياسىندا «ۇلتتىق قور – بالالارعا» باستاماسىن كوتەرگەن بولاتىن. وسى باستامانىڭ اياسىندا 2025 جىلى 18 جاسقا تولماعان قازاقستاندىق بالالارعا 129،38 دوللارى كولەمىندە قاراجات اۋدارىلدى.
وسكەلەڭ ۇرپاققا قامقورلىق كورسەتۋ – مەملەكەتتىك ساياساتتاعى باسىمدىققا يە باعىتتاردىڭ ءبىرى. ءقازىر ەلىمىزدەگى وتباسىلار بالانىڭ دۇنيەگە كەلگەن ساتىنەن باستاپ ونىڭ ەر جەتكەنىنە دەيىن مەملەكەتتىڭ قولداۋىنا سەنىمدى بولا الادى. ايتالىق، ق ر پرەزيدەنتى قاسىم-جومارت توقايەۆتىڭ باستاماسى جاس ازاماتتاردىڭ ءال-اۋقاتىن ارتتىرۋعا، سونداي-اق ءبىلىم الۋىنا جان-جاقتى جاعداي جاساپ، تابىستى بولۋلارىنا باعىتتالعان. 2024 جىلدان باستاپ جىلما-جىل قازاقستاندىق بالالارعا 18 جاسقا تولعانعا دەيىن ينۆەستيسيالىق تابىستى قوسا العاندا، ۇلتتىق قوردان قاراجات اۋدارىلىپ كەلەدى.
«ءبىز ازاماتتارىمىزدىڭ ءومىر ءسۇرۋ ساپاسىن جاقسارتىپ، بالالارىمىزعا كەمەل كەلەشەكتى قۇرۋدىڭ نەگىزىن قالاپ جاتىرمىز»،- قاسىم-جومارت توقايەۆ، ق ر پرەزيدەنتى.
«ۇلتتىق قور – بالالارعا» جوباسىنىڭ باستى ميسسياسى – كەلەر ۇرپاققا ارنالعان جيناقتاردى قالىپتاستىرۋ ارقىلى قارجى رەسۋرستارىن ۇنەمدەۋ جولىمەن ءار بالاعا ۇلتتىق بايلىقتان تيەسىلى ۇلەستى بەرۋدى كوزدەيدى.
2024 جىلى اتالعان باعدارلاماعا 6 919 131 ادام قاتىسىپ (2006-2023 ج.ج. تۋعان بالالاردى قوسا العاندا)، ولاردىڭ ءاربىرىنىڭ شوتىنا 100،52 دوللار جىبەرىلدى. اۋدارىلعان اقشانىڭ جالپى سوماسى – 695،5 ملن دوللار. تۇتاستاي العاندا، وسى باعدارلامامەن قامتىلعانداردىڭ جالپى سانىنان 304 815 ادام 2024 جىلى 18 جاسقا تولىپ، ولارعا جالپى سوماسى 30،6 ملن دوللار اۋدارىلدى.
2025 جىلى ءار بالاعا جاپلى 129،38 دوللار اۋدارىلدى.
باعدارلاماعا ەكى جىلدان بەرى قاتىسىپ كەلە جاتقان بالالاردىڭ (ينۆەستيسيالىق كىرىستى قوسا العاندا) جيناقتارىنىڭ جالپى سوماسى 232،94 دوللارعا ۇلعايدى.
«ۇلتتىق قور – بالالارعا» باعدارلاماسى بويىنشا اۋدارىمدار تۋرالى اقپارات eGov.kz پورتالىندا جانە eGov Mobile ءموبيلدى قوسىمشاسىندا 2025 ج. 1 اقپاندا كورسەتىلەدى.
تولەم تەتىگى بارىنشا قاراپايىم. بالانىڭ باعدارلاماعا قاتىسۋى مەن ەسەپتەلگەن اقشا تۋرالى اقپاراتتى بالانىڭ جسن ەنگىزە وتىرىپ، ارنايى قۇرىلعان kids.enpf.kz سايتىنان كورۋگە بولادى. وندا باعدارلامانىڭ شارتتارىمەن تانىسىپ، نۇسقاۋلىقتار، سول سەكىلدى وزەكتى سۇراقتاردىڭ جاۋاپتارىن الا الاسىز. بۇدان بولەك بالاعا ارنالعان اۋدارىمدار تۋرالى دەرەكتەردى eGov.kz پورتالىنداعى جەكە كابينەتكە كىرىپ، سونداي-اق Kaspi.kz، Halyk قوسىمشالارى ارقىلى دا كورۋگە بولادى.
مەملەكەتتىڭ ماڭىزدى مىندەتتەرىنىڭ ءبىرى – ءبىلىم مەن باسپانا الۋعا بارشاعا تەڭ مۇمكىندىك بەرۋ. وسى تۇرعىدان العاندا، «ۇلتتىق قور – بالالارعا» باستاماسى جاس قازاقستاندىقتار ءۇشىن ايتارلىقتاي قولداۋعا اينالدى.
جيناقتالعان سومانى كەز كەلگەن جاس ازامات 18 جاسقا تولعاندا پايدالانا الادى. جيناقتار بجزق-داعى شوتتارعا اۋدارىلادى جانە جوبانىڭ رەسوندەنتتەرى ۋاكىلەتتى وپەراتورلاردىڭ (وتباسى بانكى جانە حالىق بانكى) قوسىمشاسى ارقىلى ءوتىنىش بەرە وتىرىپ، ءتيىستى سومانى تۇرعىن ءۇي جاعدايلارىن جاقسارتۋعا جانە (نەمەسە) ءبىلىم الۋعا جۇمساي الادى.
2025 جىلدىڭ 1 قاڭتارىندا بۇل ماقساتقا 66 571 ءوتىنىم بەرىلىپ، ونىڭ ىشىندە جالپى سوماسى 5 316،7 مىڭ دوللارعا 53 001 ءوتىنىم ورىندالدى. تۇرعىن ءۇي جاعدايىن جاقسارتۋعا 34 388 ءوتىنىم بەرىلدى، ونىڭ ىشىندە 29 542ء-سى ورىندالىپ، 2 964 مىڭ دوللارى تولەندى. ءبىلىم بەرۋ بويىنشا 32 183 ءوتىنىم جولدانىپ، ونىڭ ىشىندە 23 459 ءوتىنىم قاناعاتتاندىرىلىپ، 2 352،7 مىڭ دوللار تولەندى.
بيىل باعدارلاماعا 6 921 035 بالا قاتىسىپ جاتىر (2007 جىلدان 2024 جىلعا دەيىن تۋعان بالالار). ولاردىڭ ىشىندە 324 430 ازامات 2025 جىلى 18 جاسقا تولادى.
ۇلتتىق قوردىڭ قاراجاتىن جاس وتانداستارىمىزدى قولداۋ ماقساتىندا پايدالانۋ – ەلىمىزدىڭ ورنىقتى دامۋىنا باعىتتالعان ستراتەگيالىق شەشىم. اتالعان باستاما ءومىر ءسۇرۋ ساپاسىن جاقسارتۋعا وڭ اسەر ەتىپ، كەيىنگى ۇرپاققا بولاشاققا زور سەنىممەن قاراۋعا مۇمكىندىك بەرەدى.
ق ر قارجى مينيسترلىگىنىڭ باسپا ءسوز قىزمەتى
پىكىر قالدىرۋ