"قازاقستان حالقىنا" قوعامدىق الەۋمەتتىك قورىنىڭ ءتوراعاسى بولات جامىشيەۆ قىزمەتىنەن كەتتى. ورنىنا ءلاززات شىڭعىسبايەۆا جاڭا باسشى بولىپ تاعايىندالدى.
ايتا كەتەيىك، "قازاقستان حالقىنا قورى" 2022 جىلى قۇرىلىپ، ونى سودان بەرى بولات جامىشيەۆ باسقارىپ كەلەدى.
بولات جامىشيەۆ وكىلەتتىك مەرزىمىنىڭ اياقتالۋىنا بايلانىستى قورداعى جۇمىسىن توقتاتۋ تۋرالى شەشىم قابىلدادى.
"قازاقستان حالقىنا" قورىنىڭ مالىمەتىنشە، بولات جامىشيەۆ باسشىلىق كەزىندە "قوردىڭ قۇرىلۋى مەن دامۋىنا زور ۇلەس قوستى". قور 104 قايىرىمدىلىق باعدارلاماسى مەن جوباسىنا باستاماشى بولدى، ونىڭ 62ء-سى ىسكە اسىرىلدى.
"قوردا جۇمىس ىستەۋ مەن ءۇشىن ۇلكەن مارتەبە جانە جاۋاپكەرشىلىك بولدى. ءبىزدىڭ باستامامىزدا قوردى قولداعانداردىڭ بارلىعىنا شىن جۇرەكتەن العىس ايتامىن. بىرگە ايتارلىقتاي ناتيجەلەرگە قول جەتكىزدىك جانە قور الداعى ۋاقىتتا دا دامي بەرەتىنىنە سەنەمىن. بارلىق سەرىكتەستەرگە، دونورلارعا جانە قىزمەتكەرلەرگە ورتاق يگى ىسىمىزگە قوسقان ۇلەسى ءۇشىن العىس ايتامىن"، – دەدى بولات جامىشيەۆ.
"قازاقستان حالقىنا" قوعامدىق قورى قامقورشىلىق كەڭەسىنىڭ شەشىمىمەن قوعام قايراتكەرى، قازاقستانداعى قايىرىمدىلىق، الەۋمەتتىك جوبالاردى باسقارۋ جانە ۇكىمەتتىك ەمەس ۇيىمداردى ينستيتۋسيونالدىق دامىتۋ سالاسىنداعى ساراپشى لاززات شىڭعىسبايەۆا ءتوراعا بولىپ سايلاندى.
بۇعان دەيىن شىڭعىسبايەۆا "قازاقستان حالقىنا" قورى باسقارما ءتوراعاسىنىڭ ورىنباسارى قىزمەتىن اتقارعان. "ەرەن ەڭبەگى ءۇشىن" جانە "اتامەكەن" ۇلتتىق كاسىپكەرلەر پالاتاسىنىڭ قۇرمەتتى قىزمەتكەرى" مەدالدارىمەن ماراپاتتالعان.
پىكىر قالدىرۋ