قىتايعا، سول سەكىلدى ەلدەن جىراققا كەتىپ، قايتادان ورالعان قانداستارىمىزدىڭ 70 پايىزى — ساۋاتسىز. ونىڭ ۇستىنە، مەنىڭ ەستۋىمشە، ولارعا مەملەكەت 1 ميلليون تەڭگەگە دەيىن اقشا، ءۇي-جاي بەرەدى. ءبىراق ونىڭ بارلىعىنا بىردەي ورالمان اعايىن قول جەتكىزە الماي ءجۇر. دەگەنمەن اۋىلدىڭ قازاعى وسىعان قاراپ: „ءبىز كىمنەن كەمبىز„ دەپ ولارعا قىزىعا قاراپ، كورە المايتىن سەكىلدى دەپ حابارلايدى 365info.kz

الماس احمەتبەك ۇلى:

 — وكىنىشكە قاراي، قوعامدا ونداي پىكىر بار.  „ورالماندار قاشقىندار، ورالماندار ساتقىندار، ورالماندار ساۋاتسىزدار„ دەگەندى قازاقتىڭ قازاق جەرىندە توپتاسا تۇسىنەن قاۋىپتەنگەندەردىڭ ادەيى شىعارعانى، داقپىرتى دەپ بىلەمىن.

قازاق ماڭگىلىك ەل بولۋ ءۇشىن، قازاقستان ۇلتتىق مەملەكەت رەتىندە قالىپتاسىپ، دامۋى، ونىڭ توپىراعىنىڭ تۇتاستىعى ءۇشىن ءوزىنىڭ، بولاشاق ۇرپاعىنىڭ، وتكەن اتا-باباسىنىڭ مۇددەلەرى توپتاسا ءتۇسۋى اسا ماڭىزدى. مۇنداي قۋاتتى مەملەكەتتىڭ پايدا بولۋى بىرەۋلەرگە ۇناماۋى مۇمكىن. سوندىقتان قازاقتاردىڭ توپتاسۋىن الدىن الۋ ءۇشىن ءتۇرلى ارەكەتتەر بولدى دەپ ويلايمىن. سونىڭ ءبىرى — ورالمانداردى كەمسىتۋ، اعاش باسىنا ءىلۋ، „دايىن اسقا تىك قاسىق„ بولدى دەگەن داقپىرتتى تاراتۋدان تۋادى.

بۇگىنگە دەيىن قازاقستانعا 1 ميلليون قازاق كەلدى. بۇل قازاقستانداعى نەگىزگى ۇلتتىق قۇرامدى — قازاقتىڭ سانىن 10 پايىزعا ارتتىردى.

ورالماندار نەگە شەنەۋنىك بولعىسى كەلمەيدى؟

الماس احمەتبەك ۇلى: 

— سىرتتان كەلگەن سوڭ، ولاردا ۇقىپتىلىق، ساقتىق، جيناقىلىق دەگەن بار. سەبەبى قونىس اۋدارىپ كەلدى، جاڭا قونىسقا كەلدى. بالا-شاعالارىن ورنالاستىرۋ كەرەك، وقىتۋ، مال تابۋ، جان باعۋ، وتباسىن اسىراۋ كەرەك. سودان كەيىن دە ولار قارىز سۇراسا بەرمەيدى، ەسىك الدىندا كولىگى تۇرسا دا بەنزين سۇرايدى. مۇنداي مىنەز بار.

ماعان ءبىر جىگىت: „كورشىم بار ورالمان، كولىگىڭمەن ءبىر جاققا بارىپ كەلەيىك دەسەم، بەنزين سۇرايدى„ دەپ ايتتى. ەندى ول سەن ءۇشىن بەنزين شىعىندايدى دەيمىن عوي. ول سەن سەكىلدى تۇراقتى ورىندا ەمەس، ەندى عانا كوشىپ كەلدى، ەلەڭ-الاڭ، سوندىقتان اقشاسىن تۇگەسىپ قويعىسى كەلمەيدى.

ءدال ءوز باسىم دەپۋتات تا، مينيستر دە بولعىم كەلمەيدى. نەگە؟..

ويتكەنى شەتەلدەگى قازاقتاردىڭ كوبى جەكە كاسىپكەرلىككە بەيىمدەلىپ كەلەدى، سوعان قۇلشىنىپ تۇرادى. جەكە كاسىپكەرلىك دەگەن نە؟ ەگەر كاسىبى جاقسى جۇرەتىن بولسا، ول مەملەكەتتىك قىزمەتكەردەن الدەقايدا باي، الدەقايدا ەركىن ادام. مەن مەملەكەتتىك قىزمەتكەر بولسام، وسى اراعا سۇقبات بەرۋگە كەلە دە الماس ەدىم. وندايدا باسشىلىعىمنان رۇقسات سۇراۋعا تۋرا كەلەدى. ەسكەرتۋ الۋىم دا مۇمكىن.

جۇڭگو كونسۋلدىعى كۇنىنە 300-400 ادامعا ۆيزا بەرەدى

الماس احمەتبەك ۇلى: — وسىدان 3-4 اي بۇرىن ۇرىمشىدە بولدىم. مارعۇلان دەگەن ازامات كەلگەن ەكەن كونسۋلدىققا. كۇنىنە 300-400 ادامعا ۆيزا بەرىپ جاتىرمىز دەيدى. ءبىر جىلدىق كوپ رەتتىك ۆيزا بەرىپ جاتىر. ال ەندى كەزەكتە تۇرعاندار ماسەلەن، 300-400 مىڭ ادام. نەمەسە 10 مىڭ، 20 مىڭ، 30 مىڭداپ كەزەكتە تۇر. ال ولاردىڭ كەزەگىنىڭ الشاقتىعىنا بايلانىستى ۆيزا 6 ايدان، 7 ايدان كەيىن كەلەدى، ياعني ونداي پروبلەما بارى راس…