Constella، Damiani جانە LaPerla ساۋدا ماركالارى ۇيىمداستىرعان قوس بىردەي اۋكسيوننان 25 100 000 تەڭگە پايدا ءتۇستى. 6 جەلتوقساندا استانادا جانە 8 جەلتوقساندا الماتىدا وتكەن وسىناۋ شارالار «دارا» قورىنىڭ باستاماسىمەن جۇزەگە اسىپ وتىر.

اۋكسيوندا ساۋداعا شىعارىلعان لوتتاردىڭ قاتارىندا تانىمال مەسەناتتار مەن ونەر جۇلدىزدارى ۇسىنعان كارتينالار دا بار. اتاپ ايتقاندا، جاننا كان، گۇلنار مەرگالييەۆا جانە ەركەش شاكەيەۆ وزدەرىنە تيەسىلى قۇندى جادىگەرلەرىن ۇيىمداستىرۋشىلارعا تەگىن سىيلادى. ال، ولاردىڭ ساتىلىمىنان تۇسكەن قاراجاتقا جاڭا بالالار الاڭقايلارى سالىناتىن بولادى.

بالالارعا ارنالعان وسىناۋ ارنايى الاڭقايلاردى سالۋ يدەياسى «دارا» قورىنا تيەسىلى. ولار كومەككە مۇقتاج بالالارعا لايىقتالعان. ياعني، دامۋىندا تەجەۋى بار سابيلەردىڭ ويناپ، ءتىپتى ءبىلىم الۋىنا دەيىن جاعداي جاسالعان.

«مۇنداي الاڭقايلار تەك پاندۋسپەن شەكتەلمەيدى. مۇندا سونداي-اق، وزدىگىمەن قوزعالا المايتىن، كورۋ جانە ەستۋ قابىلەتتەرى دامىماعان بالالارعا دا جاعدايلار قاراستىرىلعان. سونىمەن قاتار، قاراپايىم بالالارعا دا ويناي بەرۋگە بولادى. جالپى، سالاۋاتتى ءومىر سالتىن قالىپتاستىرۋ ءۇشىن قاجەتتىنىڭ ءبارى بار»، — دەلىنگەن «دارا» قورىنىڭ باسپا ءسوز قىزمەتى تاراتقان حابارلامادا.

قازىرگى تاڭدا مۇنداي الاڭقايلار قازاقستاندا جوقتىڭ قاسى. سوندىقتان، دەنساۋلىعىندا اقاۋى بار بالالار ۋاقىتىنىڭ كوبىن ءتورت قابىرعانىڭ ىشىندە وتكىزەدى. سالدارىنان ولار قاتارىنان قالىپ، وقشاۋلانىپ قالادى.