بۇگىن عالامتور جەلىسىندە الماتى قالاسىنىڭ تۇرعىنى ق ر ءبىلىم جانە عىلىم ءمينيسترى ەرلان ساعادييەۆكە وقۋلىقتارداعى تاپسىرمالارعا قاتىستى ءوز شاعىمىن ۆيدەوعا ءتۇسىرىپ، عالامتورعا جۇكتەگەن. وندا 1ء-شى سىنىپ وقۋشىلارىنا ارنالعان وقۋلىقتاعى تاپسىرمالاردىڭ  وتە كۇردەلى ەكەنىن ايتقان. ءبىلىم جانە عىلىم مينيسترلىگى ءبىرىنشى سىنىپقا ارنالعان وقۋلىقتا نەلىكتەن قيىن تاپسىرمالار كەزدەسەتىنىن ءتۇسىندىرىپ بەردى.

«وقۋشىلار تەك وقۋ مەن جازۋدى عانا ۇيرەنىپ قويماي، ويلاۋ قابىلەتىن دامىتۋ قاجەت. سوندىقتان جاڭا وقۋلىقتار قازىرگى زامان تالابىنا لايىقتالىپ قۇراستىرىلعان. بالانىڭ جاسى دا ەسكەرىلدى. "فيزيكا"، "حيميا"، "بيولوگيا"، "گەوگرافيا" پاندەرىن قابىلداۋ بالاعا قيىن سوعادى. سوندىقتان باستاۋىش سىنىپتاردا الەمنىڭ عىلىمي كارتاسىن قابىلداپ، قيىن تەرميندەردى ءتۇسىنۋى ءۇشىن «جاراتىلىستانۋ» ءپانى ەنگىزىلدى. باعدارلاما كىشكەنتاي قادامدارمەن وقۋشىنىڭ  ءبىلىمى مەن قابىلداۋىن كەڭەيتۋگە نەگىزدەلگەن» دەپ ءتۇسىندىردى پەداگوگتار.

ال وقۋلىقتاردىڭ اۋىر سالماعىنا بايلانىستى ق ر ءبىلىم جانە عىلىم مينيسترلىگى ءبىرىنشى سىنىپقا ارنالعان بارلىق وقۋلىقتار 300-400 گراممنان اسپايتىنىن مالىمدەدى.