"لەنتا.رۋ" كامبودجاعا قونىس اۋدارىپ، سول جاقتا ءومىر ءسۇرىپ جاتقان پاۆلدىڭ اڭگىمەسىن جاريالايدى. پاۆل سول جاقتا ءومىر ءسۇرۋدىڭ وڭ تۇستارى مەن تاعام تۇرلەرى، سالتتارى مەن حالىقتىڭ ال-اۋقاتىمەن ءبولىستى.

بىرنەشە جىل بۇرىن مەن دە كوپتەگەن ساياحاتشىلار سياقتى تايلاندقا دەمالۋعا باردىم. كامبودجادا ءبىر كۇن تۇنەپ، انگكور حرامىنا ەكسكۋرسياعا اتتاندىم. مەملەكەت ماعان بىردەن ۇنادى. اسىرەسە، تۇرعىندارى جايدارى، اشىق جانە اقپەيىل.  بۇدان كەيىن دە بىرنەشە رەت كامبودجاعا بىرنەشە رەت كەلدىم، كەلگەن سايىن بۇل پاتشالىققا عاشىق بولىپ قالدىم.

مەنىڭ دوسىم ماسكەۋدە تاي ماسساجىنىڭ سالونىن اشۋ تۋرالى وي تاستادى. مەن ونى كامبودجاعا الىپ بارعان سوڭ، ول ويىنان باس تارتىپ، كامبودجالىق ماسساج جاسايتىن سالون اشامىن دەپ شەشتى. 2013 جىلى ءبىز ماسكەۋدە ءبىرىنشى بولىپ وسىنداي دەمالۋ ورنىن اشتىق.

قىزمەتكەرلەردى كامبودجادان اكەلدىك. مەن ءمور باسىلعان قاعازداردى الىپ، قىزدارعا بىزبەن بىرگە جۇمىس جاساۋدى ۇسىنىپ، ەكى ورتادا جۇگىرىپ ءجىردىم. بۇل وتە قىزىق بولدى، ويتكەنى جەرگىلىكتى حالىقتار رەسەيدى بىلمەيدى. سوندىقتان ءبىزدىڭ ۇسىنىسىمىز ولارعا قىزىعۋشىلىق تۋعىزدى.

باستاعان ءىسىمىز سالوننىڭ قوناقتارىنا ۇناعانىمەن ءبىر جىلدان سوڭ، جاۋىپ تاستادىق. بۇل ونشا كىرىستى جۇمىس ەمەس.

رەسەيگە كەلگەن قىزداردىڭ بىرىمەن مەن كوڭىل جاراستىرا باستادىم. ءسويتىپ ەكەۋمىز كامبودجاعا قايتۋدى ۇعاردىق. وتباسىن قۇردىق، 2016 جىلى شىلدەدە قىزىمىز تۋىلدى. قىزىمىزدىڭ ەكى ازاماتتىعى بولادى.

قۇجات ماسەلەسىمەن ماعان قيىندىق تۋعىزبايدى. تەك مەملەكەتتىڭ شەكاراسىنا كەلىپ، مىسالى تايلاندقا، سىزگە 35 دوللارعا بيزنەس-ۆيزا جاساپ بەرەدى، ءبىر ايدىڭ ىشىندە ونى 270 دوللارعا ۇزارتا الاسىز. سوندىقتان مەن كامبودجادا ەمىن-ەركىن جۇرە الامىن، جىل سايىن 270 دوللار تولەپ، ۇزارتىپ ءجۇرمىن.

ءقازىر مەن سايتپەن اينالىسىپ ءجۇرمىن جانە 2014 جىلى وسى جەردە شاعىن Snow River Guest House قوناق ءۇيىن اشتىم. ءبىز ەشقانداي تاجىريبەسىز جوبانى باستاپ كەتتىك، بارىنە جۇمىس بارىسىندا ۇيرەندىك. سول ءۇشىن مەن رەسەيگە كەلىپ، 20 مىڭ دوللارعا نەسيە الدىم. باعىمىز جانىپ، ايەلىمىز ەكەۋمىز ءوزىمىزدىڭ ءىسىمىزدى اشتىق.

قوناق ءۇيدىڭ ءبىرىنشى قاباتىندا ءبىز ءوزىمىز تۇرامىز. سوندىقتان جۇمىس ورنىنان 24 ساعات بويى تابىلامىز. مەنىڭشە ءبىز اتاقتى جانە كىرىسى جاقسى جەر اشتىق، ويتكەنى ءبىز وعان جانىمىزدى سالدىق. وعان ءوز ۇيىمىزدەي قارايمىز. مەن كەلۋشىلەرمەن ءوزىمنىڭ ۇيىمە كەلگەن قوناق رەتىندە ارالاسامىن، ولاردىڭ ومىرىنە قىزىعۋشىلىق تانىتىپ، ءوزىم جايلى دا ايتىپ بەرەمىن.

ءبىز ساياحاتشىلار كوپ كەلەتىن اتاقتى سيەم رەاپ قالاسىندا تۇرامىز. بۇل جەرگە الەمنىڭ ءار جەرىنەن: اۋستراليا، ارگەنتينا، برازيليا، جۇڭگو، كورەيا، چيلي، بۇكىل ەۋروپا، جاپونيا، اقش، كانادا جانە تاعى باسقا ەلدەرىنەن ساياحاتشىلار كەلەدى. قوناق ءۇي قالادان ءبىر كيلومەتردەي جەردە ورنالاسقان.  

مەن ادەتتەگى كامبودجالىق ءومىردى ءسۇرىپ ءجۇرمىن. ءبىز اۋىلداعى تاتەمنىڭ ۇيىنە بارىپ تۇرامىز، ول جاقتا جارعاناتپەن تاماقتانامىز، قۇمىرسقالاردى، ۇيرەك ەمبريونىن سورپاعا قوسىپ ىشەمىز. جەرگىلىكتى تۇرعىندار كەز كەلگەن تاعامعا قانت قوسادى جانە باسقاشا تاماق جەي المايدى. العاشىندا ماعان تاڭسىق بولعانىمەن، ءقازىر كامبودجالىق تاعامداردى جاقسى كورەمىن.

كامبودجانىڭ اعا بۋىن وكىلدەرى ساۋاتسىز بولىپ كەلەدى. 1967-1975 جىلدارى ازاماتتىق سوعىستىڭ سالدارىنان ولار مەكتەپكە بارا الماي قالعان. سوندىقتان ۇلكەندەر شامان، باقسى، سيقىرشى سياقتىلارعا جانە ءارتۇرلى سالتتارعا سەنەدى.

اۋىلداردا دارىگەرگە جۇگىنبەي-اق ەمدەلە بەرەدى. ءبىر كۇنى كوشەدە ءبىر ايەلدىڭ اۋىر دەمالىپ، ورنىنان تۇرا الماي تۇرعانىن كوردىم. شاماسى ول ايەلدە ينفاركت بولدى. بالالارى جەدەل جاردەم شاقىرۋدىڭ ورنىنا ونى جاپىراقتىڭ كارتونىمەن جەلپىلدەتىپ تۇردى. ولاردىڭ ايتۋىنشا، اناسىنىڭ ىشىنە جىن كىرىپ كەتكەن. ونى شاماندار عانا شىعارىپ جىبەرۋى ءتيىس ەكەن. مەن قالالىق دارىگەرگە جەتكەنشە، ايەلىم حابارلاسىپ، جىندى شىعارعانىن، ول ءوزىن جاقسى سەزىنەتىنىن، ادامدار جىننىڭ شىققانىن ءوز كوزىمەن كورگەندىگىن ايتتى.

ايەلىم جەرگىلىكتى اۋرۋحانالاردىڭ بىرىندە قىز بوسانعاندا، ءبىز بارلىق شىعىنعا 227 دوللار تولەدىك. جەرگىلىكتى ادامدار كلينيكالاردا سيرەك بوسانادى.

الەۋمەتتىك كونتراست بىردەن بىلىنەدى. جولداعى قىمبات كولىكتەر جانە جاياۋجولدا جۇرەتىن كەدەيلەر – كامبودجا ءۇشىن قالىپتى كورىنىس. ويتكەنى، كوبىسى ءوز يەلىكتەرىندەگى جەرىن شەتەلدىكتەرگە ساتادى، ولار ءجۇز مىڭ دوللارعا دەيىن تەز بايىپ كەتەدى. ولاردى قىمبات زاتتارعا جۇمسايدى. بۇل اينالاسىنداعىلاردىڭ قۇرمەتىن تۋعىزادى. ازيا ەلدەرىندە سولاي قالىپتاسقان. تابىسىڭ كوبەيگەن سايىن، ساعان دەگەن قۇرمەتى دە ارتا تۇسەدى.

وسى ۋاقىتقا دەيىن مەن بىردە-بىر وقىس وقيعالارعا تاپ بولمادىم. تۋريستەردەن سومكەسىن ۇرلاپ اكەتەتىن ۇرىلار بار، ءبىراق ولار بارلىق ەلدە بار عوي.

ماعان شەت ەل ازاماتى بولعاندىقتان، جەرگىلىكتى تۇرعىنداردىڭ نازارى ۇنەمى مەندە، ءبىراق مەن وعان ءمان بەرمەيمىن. ماعان كوڭىل اۋدارعان ادامداردىڭ نازارىن بايقاماۋعا ۇيرەندىم، كەيبىر اۋىل تۇرعىندارى اق ادامدى مۇلدەم كورمەگەن.

مەن وسىنداي تىنىش ومىرگە ۇيرەنىپ قالدىم، مەنىڭ ەش ءىشىم پىسپايدى. ۇيقىدان تۇرعىم كەلگەندە تۇرامىن، ءشاي ىشەمىن، ءارتۇرلى ادامدارمەن ارالاسامىن. بالامنىڭ قالاي ءوسىپ كەلە جاتقانى كوز الدىمدا ءجۇرىپ جاتىر.

كامبودجادا ماعان كەرەكتىنىڭ ءبارى بار: وتباسى، جۇمىس، ينتەرنەت، جاقسى اۋا رايى.

اڭگىمەلەسكەن ەليزا تايان