قازاقستاندىق ءانشى ءارى پروديۋسەر ءقىدىرالى بولمانوۆ سۋرەتشى مۇرات ءدىلمانوۆتى كاريكاتۋرا سالعانى ءۇشىن سوتقا بەرەتىنىن مالىمدەدى. ءارتىس سۋرەتشى قوعام الدىندا كەشىرىم سۇراۋىن تالاپ ەتىپ وتىر. بۇل تۋرالى Tengrinews.kz تىلشىسىنە ونىڭ زاڭگەرى امانبول ابەۋوۆ حابارلادى.

مۇرات ءدىلمانوۆتىڭ سۋرەتىندە ەر ادام توسەكتە وتىر، ال ايەل جالاڭاش جاتىر. ءبىراق سۋرەتتە ءقىدىرالى بولمانوۆ بەينەلەنگەن دەپ ەش جەردە ايتىلماعان. دەسەك تە، ادۆوكات ابەۋوۆ سوت ارقىلى اقشا وندىرۋگە نيەتتى.

"بۇل كاريكاتۋرانىڭ اۆتورىن جاۋاپكەرشىلىككە تارتۋعا جەتكىلىكتى نەگىز بار جانە سۋرەتتە ايتىلعان وي قورلاۋ مانىندە. ءقىدىرالىنىڭ بەينەلەنگەنى ماماندارسىز-اق تۇسىنىكتى. ءبىراق مەن ماتەريالدى ساراپشىلارعا جىبەردىم، ولار وسى كاريكاتۋرانى زەرتتەيدى (...) ءقىدىرالى توسەكتە جاتقان ايەلدىڭ الدىندا وتىر. بۇل ول ايەلدىڭ قاراقات ەكەنىن بولجايمىز، مۇندا قورلاۋ سيپاتىنداعى بەلگىلەر بار. وسى جاعدايدا ولاردىڭ بالالارىنا مورالدىق اۋىرتپالىقتار ءتۇسۋى مۇمكىن - ولاردىڭ اناسى جالاڭاش كورسەتىلگەن. ال ەگەر ول قاراقات بولماسا، باسقا ايەل بولسا، مۇنداي جاعدايدا دا جاۋاپقا تارتۋعا بولاتىن بەلگىلەر بار - بۇل دەگەنىڭىز سۋرەتشى ءقىدىرالىنى اشىناسىمەن جاتتى دەپ كورسەتكەن. بۇل جەكە ومىرگە قول سۇعۋشىلىق. ءبىز سۋرەتشىدەن وسى سۋرەتتى جاريالاعان الاڭدا مۇنى جوققا شىعارۋدى جانە كەشىرىم سۇراۋىن تالاپ ەتەمىز. سونىمەن قاتار، وسى سۋرەتتى جەلىدە جاريالاعاندارعا سوتقا دەيىنگى شاعىم ءتۇسىردىم، كوبىسى ءوشىرىپ جاتىر"، - دەدى زاڭگەر.