رەسپۋبليكالىق دونالد ترامپ رەسمي تۇردە اقش-تىڭ 45ء-شى پرەزيدەنتى اتاندى دەپ جازادى lenta.ru. بۇل جولى يناۋگۋراسيا ۇلتتى بىرىكتىرە المادى. ۆاشينگتوندا قارسىلىق اكسيالارى ءوتتى.

پرەزيدەنت يناۋگۋراسياسى كەزىندە دەموكراتتاردىڭ كوبى ۆاشينگتوننان كەتىپ قالعان. سونىمەن قاتار، ۇيلەرى مەن پاتەرلەرىن دە رەسپۋبليكالىق كەلىپ ورنالاسپاۋى ءۇشىن ەشكىمگە جالعا بەرمەگەن. يناۋگۋراسياعا كەلۋدەن 70 كونگرەسمەن، سەناتور جانە كوپتەگەن دەموكراتتار  باس تارتتى.

يناۋگۋراسيا كەزىندە قالانىڭ ءار بۇرىشىندا جالاۋلاردى، ترامپتىڭ سۋرەتى باسىلعان نەمەسە ونىڭ «Make America Great Again» ۇرانى جازىلعان فۋتبولكالارى ساتىلىپ تۇردى.

دەسەك تە، قالادا جاڭا پرەزيدەنت پەن ۆيسە-پرەزيدەنتكە قارسى توپتار دا بولدى. «ترامپ-پەنسا رەجيمىنە جول جوق! ءفاشيزمدى توقتاتامىز!» ۇراندارىمەن مەملەكەتتىك قۇرىلىم جۇمىسىن توتاتۋعا تالپىنعاندار دا كەزدەستى. «فاشيزمگە» قارسى شىققان ادامداردىڭ سانى 30-عا جۋىق بولدى. ءىرى جانە كىشىگىرىم نارازىلىق اكسيالارى ۆاشينگتوننىڭ ءار وڭىرىندە ءوتىپ جاتتى. ءبىرى جاڭا پرەزيدەنتتىڭ ەكولوگيانى قورعاۋعا شاقىرسا، ەندى ءبىرى قىزتەكەلەردىڭ قۇقىعىن قورعاۋدى تالاپ ەتتى.

ترامپ اينالاسىنداعى شۋدى ورشىتە تۇسۋىنە ءوزى دە سەبەپكەر بولدى. ول  يناۋگۋراسياعا ءبىر اپتا قالعاندا twitter-دە حيللاري كلينتوندا سىناپ جازدى.

«بيۋرودا حيللاريعا قارسى كوپتەگەن اقپارات بولدى. شىن مانىسىندە ول پرەزيدەنتتىك سايلاۋعا تۇسپەۋى كەرەك ەدى» دەپ جازدى ترامپ.

كوپ ۇزاماي كلينتوننىڭ باسپا ءسوز حاتشىسى ترامپقا جاۋاپ جازدى. ول ترامپتىڭ وزىنە سەنىمسىزدىگىنەن وسىنداي سوزدەردى جازىپ وتىرعانىن جەتكىزدى.

يناۋگۋراسياعا دەيىن اقش-تا  كوپتەگەن وقيعالار ورىن الدى. ماسەلەن، CNN تەلەارناسى «ترامپ پەن ونىڭ جاقتاستارىن يناۋگۋراسيا كەزىندە ءولتىرىپ تاستاسا نە بولادى؟» دەگەن تاقىرىپتا سيۋجەت جاساپ، شىعاردى.

رەسمي شارا ترامپ پەن ونىڭ وتباسىنىڭ شىركەۋگە بارۋىمەن باستالدى. تابالدىرىقتا ولاردى داللاسە روبەرت دجەففرەس اتتى شىركەۋ قىزمەتشىسى قارسى الدى. ب ا ق ونىڭ بۇعان دەيىن بىرنەشە اراڭداتۋشىلىق مالىمدەمەلەرىمەن كوزگە تۇسكەنىن جازدى. ونىڭ ىشىندە شىركەۋ قىزمەتكەرلەرىنىڭ يسلام تۋرالى ايتقانى دا بار. ول يسلامدى شايتان جاساپ شىعارعان ءدىن دەپ اتاعان.

شىركەۋدەن شىققاننان كەيىن مەملەكەت باسشىسىمەن ونىڭ جاقىندارى باراك جانە ميشەل وبامالار مەن بىرگە شايعا شاقىرىلدى. ودان كەيىن كاپيتولياعا بارىپ جۇزدەگەن وتانداستارىنىڭ الدىندا انت بەرىپ، حالىقتىڭ الدىندا ءسوز سويلەدى.

«بۇعان دەيىن داۋلەتتى ەمەس وتباسىلار قيىنشىلىق كورىپ كەلدى. ۋادە بەرەمىن، بۇل جاعداي تۇبىرىمەن وزگەرەدى» دەدى دونالد ترامپ.

سونىمەن قاتار، جاڭا پرەزيدەنت اقش بيلىگى باسقا ەلدەرگە ءوز قالاۋىن تاڭاتىن ساياساتىن وزگەرتەتىنىن جانە وزگە ەلدەر اقش-تان ۇلگى الاتىنداي ساياسات جۇرگىزەتىنىن ايتتى.

كاپيتولياداعى ترانسلياسيا اياقتالعاننان كەيىن تەلەارنالاردا ترامپتىڭ ايتقاندارىن سىناعان ساراپشىلاردىڭ ءسوزىن بەردى. MSNBC جۇرگىزۋشىسى كريس مەتيۋس جاڭا پرەزيدەنتتىڭ ءسوزىن ادولف گيتلەردىكىمەن سالىستىردى. «ەڭ الدىمەن امەريكا» ۇرانى 1940 جىلى ۇلتشىلدارمەن ارىپتەستىك ورناتقان امەريكالىقتاردىڭ ۇرانى ەكەنى ايتىلدى.

ۆاشينگتون كوشەلەرىندە تارتىپسىزدىكتەر ورىن الدى. يناۋگۋراسيادان كەيىن پوليسەيلەر 90 ادامدى ۇستادى. ولار يناۋگۋراسيا بولاتىن جەرگە ادامداردى وتكىزبەۋى ءۇشىن كوشەلەردىڭ ءبىرىن جاۋىپ تاستاعان.

جەرگىلىكتى جۋرناليستەردىڭ مالىمەتىنشە، استانا كوشەلەرىندە 500-دەن 1000-عا دەيىن ءتارتىپ بۇزۋشىلار بولعان. ولارعا قارسى پوليسەيلەر ارنايى گاز قولدانعان. الايدا ءتارتىپ بۇزۋشىلار سوندا دا تاراسپادى.

ترامپ پرەزيدەنتتىك قىزمەتىنىڭ باستاۋى وڭاي بولمايتىنىن سەزەتىن بولار. جاقىن كۇندەرى ەل تاريحىنداعى ءىرى ايەلدەر مارشى وتپەك. ب ا ق تاراتقان حابارعا ساي كوپتەگەن ايەلدەر جولاۋشى ۇشاعىمەن ۆاشينگتونعا كەلە جاتىر. جۇزدەگەن ايەل كەلەدى دەپ كۇتىلۋدە. ترامپتىڭ امەريكانى بىرىكتىرىپ، ونى جاڭا ۇلى ەلگە اينالدىرۋ تۋرالى ۋادەسىندە تۇرا الادى ما؟  سونى باقىلاۋ عانا قالدى.  

اۆتور: الەكسەي ناۋموۆ (ۆاشينگتون)