«ورال اكىمىنىڭ كەزەكتى زاشاعانداعى كەزدەسۋى №30 مەكتەپتە ءوتتى. ونىڭ ءماجىلىس زالىنا شاعىن اۋداندى كوركەيتۋ تۋراسىندا ءبىراز ساۋالدارى بار جەرگىلىكتى حالىق  جينالدى دەپ حابارلايدى ratel.kz.

بارلىق قىزىق اكىم ءوزىنىڭ ەسەبىن بىتىرگەننەن كەيىن باستالدى. ءوزىن مۇرات دەپ تانىستىرعان جەرگىلىكتى تۇرعىن زاشاعان اۋدانىنىڭ اكىمى ادىلبەك قادىروۆقا ايماقتى جاسىلداندىرۋ تۋرالى سۇراق جولدادى. تۇرعىن اعاشتى وتىرعىزۋعا ميلليونداپ اقشا جۇمسالىپ، ونىڭ جارتىسىنان كوبى كۇتىم كورمەگەندىكتەن قۋراپ قالاتىنىن ايتىپ، نەلىكتەن بۇلاي ەكەنىن بىلگىسى كەلدى.  قالا اكىمى ناريمان تورەعالييەۆ زاشاعان اكىمىنەن «سۇراقتى ءتۇسىندىڭىز بە؟» دەپ سىبىرلاپ سۇرادى. ادىلبەك قادىروۆ تۇسىنگەنىن ءبىلدىرىپ، باسىن يزەدى دە سۇراققا ورىسشا جاۋاپ بەرە باستادى.

 مۇرات ەسىمدى تۇرعىن اكىمنىڭ ءسوزىن ءبولىپ جىبەرىپ، ورىس ءتىلىن تۇسىنبەگەندكىتەن قازاقشا جاۋاپ بەرۋىن سۇرادى. زالدا تىنىشتىق ورنادى. زاشاعان اكىمىنىڭ ماڭدايىنان تەر شىعىپ، جاعاعا شىعىپ قالعان بالىقتاي كۇي كەشكەنى كورىنىپ تۇردى. تىنىشتىق ۇزاققا سوزىلدى. ادىلبەك قادىروۆ كوپ كۇتتىرتىپ ءسوزىن باستادى.

«مەن ءسىزدىڭ سۇراعىڭىزعا ورىسشا جاۋاپ بەرە الامىن. ساۋالىڭىز ماعان تۇسىنىكتى بولدى. اعاشتى وتىرعىزۋ جۇمىستارى جۇرگىزىلىپ جاتىر. كۇتىم ناشار بولعاندىقتان ولار قۋراپ قالادى. ماسەلەنى شەشەمىز» دەدى دە، سۇراققا ناقتى جاۋاپ بەرمەدى.