ق ر پارلامەنتى ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى. وتىرىستا دوپينگ ماسەلەسىن كوتەرگەن دەپۋتات ازات پەرۋاشيەۆ تىيىم سالىنعان ءدارىنى قولدانعاندار سىياقىسىن قايتارىپ بەرۋى ءتيىس ەكەنىن ايتتى، دەپ حابارلايدى Baq.kz ءتىلشىسى بەك تولەۋوۆ.
اتالعان زاڭ جوباسى تۋرالى ق ر مادەنيەت جانە سپورت ءمينيسترى ارىستانبەك مۇحامەدي ۇلى بايانداما جاسادى.
جالپى، بۇل زاڭ جوباسى پارلامەنت ءماجىلىسىنىڭ جۇمىس توبىنىڭ 4 وتىرىسىندا تالقىلاندى. وندا دەپۋتاتتار 56 تۇزەتۋ ەنگىزدى. سونىڭ ىشىندە 41 تۇزەتۋ بويىنشا ۇكىمەتتىڭ وڭ قورىتىندىسى الىنىپتى.
ءماجىلىس دەپۋتاتى ازات پەرۋاشيەۆ جالپى وتىرىستا دوپينگ ماسەلەسىن كوتەردى. «اقجول» پارتياسىنىڭ ءتوراعاسى سپورتشىلاردان دوپينگ تابىلىپ جاتسا، سىياقىسىن مەملەكەتكە قايتارىپ بەرۋى ءتيىس دەپ وتىر.
«وليمپياداعا قاتىساتىن سپورتشىلار بالا ەمەس. ەلىمىزدىڭ نامىسىن قورعاپ جۇرگەن مىقتىلار عوي. دەگەنمەن ءوز ىسىنە جاۋاپ بەرۋى كەرەك. سول ءۇشىن وليمپيادا الدىندا سپورتشىلارمەن كەلىسىمشارتقا وتىرۋىمىز قاجەت. ياعني، كەيىن قانىنان دوپينگ تابىلىپ جاتسا، مەدالىن عانا ەمەس، مەملەكەت بەرگەن سىياقىنى دا قايتارىپ بەرۋى ءتيىس»، – دەيدى ا.پەرۋاشيەۆ.
ەگەر، دوپينگپەن ۇستالعان سپورتشى زاڭ جۇزىندە جازالاناتىن بولسا، جاتتىقتىرۋشىسى دا سىياقىسىنان ايىرىلۋى مۇمكىن.
«قازىرگى كەزدە ءبىز حالىقارالىق تاجىريبەنى زەرتتەپ جاتىرمىز. سەبەبى بۇل ماسەلە پىسىقتاۋدى قاجەت ەتەدى. جاۋاپكەرشىلىك دەڭگەيى بويىنشا دوپينگ سالاسىنا قاتىستى وزگەرىستەردى پارلامەنتكە ەنگىزبەكپىز. تاياۋدا اۆستريادا ءبىزدىڭ بياتلونشىلارعا قاتىستى وقيعا ورىن العان بولاتىن. وندا تەك دارىگەردىڭ تەحنيكالىق كىناسى بار. دارىگەرگە قاتىستى قانداي شارا قولدانا الامىز؟ ول تەك كەشىرىم سۇرادى دا، قىزمەتىنەن كەتەتىندىگى تۋرالى ءوتىنىم جازدى. ال وسى جاعدايدا ىقپال ەتۋ شارالارى جوق. ءبىز زاڭ نورماسىن جازعاننان كەيىن، ءاربىرىنىڭ جاۋاپكەرشىلىگى ارتادى. وسى ورايدا، اكىمشىلىكتەن باستاپ، قىلمىستىق جاۋاپكەرشىلىككە دەيىن بارلىق نورمالاردى قامتيمىز»،– دەدى ا.مۇحامەدي ۇلى.
ءماجىلىس دەپۋتاتتارى اتالعان زاڭ جوباسىن ءبىرىنشى وقىلىمدا ماقۇلدادى.
