ەلىمىزدىڭ ەڭ قارت تۇرعىنىنىڭ جاسى بۇگىنگى كۇنى 115-تە. عاسىردان دا ۇزاق عۇمىر كەشكەن كەيۋانانىڭ دەنساۋلىعى ءبىرقالىپتى. وزدىگىنەن ءجۇرىپ-تۇرا الادى. قيمىلى دا شيرا، ويى دا سەرگەك. ساناۋلى جالداردان كەيىن قوستانايلىق مارفۋعا سەلتەتكەنوۆانىڭ ەسىمى گيننەس كىتابىنا عالامشارىمىزدىڭ «ەڭ قارت تۇرعىنى» ەسەبىندە جازىلۋى مۇمكىن، دەپ حابارلايدى «قازاقستان-قوستاناي» تەلەارناسى.

3-ناۋرىز كۇنى 115 جاس مەرەيتويىن قارسى العان مارفۋعا اجەيدىڭ جۇرەگىنە ءالى دە ءاجىم تۇسپەگەن. 112-گە تولعانشا 5 ۋاقىت نامازىن قازا قىلماپتى. لت-ازاتتىق كوتەرىلىس، ناۋبەت پەن سوعىس جىلدارىنىڭ كۋاسى بولعان كەيۋانانىڭ تۇڭعىش قىزى 97 جاستا. وسكەمەن شاھارىندا تۇرادى. كەلىنى 93-تە.  115-تەگى ەل اناسىنىڭ كۇتىمى، التىنشى قىزى جىبەكتىڭ ەنشىسىندە.

قازاقستانداعى ەڭ قارت تۇرعىننىڭ 1902 جىلى، 3-ناۋرىزدا تۋعانىن راستايتىن ءتولقۇجاتتارىن دا ءوز كوزىمىزبەن كوردىك. كوردىك تە، عاجايىپقا ەرىكسىز سەندىك. ونىنشى مۇشەل جاسقا اياق باسقان قارت انا شوبەرە-شوپشەك تۇرماق، جەتىنشى ۇرپاعى نەمەنەسىنىڭ الاقانىنان سۋ ىشكەن. ءبىر اۋلەتتىڭ ماۋەلى بايتەرەگى بارشا قازاق ەلىنە ءوزىنىڭ اق باتاسىن بەردى.

اللا اۋزىنا سالعان شىعار اسىل اجە «150 جاساۋعا ال-دارمەنىم جەتەدى»، - دەپ قالدى. گيننەستىڭ رەكوردتار كىتابىنا ەنگەن الەمدەگى ەڭ ۇزاق جاساعان ايەل وساكالىق ميساو وكاۆا جاپون ەلىنەن شىققان. ال، قوستانايلىق عاسىر-انا جاپوندىق كەمپىردىڭ رەكوردىن جاڭارتاتىندىعىنا سەنىمدى. ويتكەنى، مارفۋعا اجەيدىڭ اناسى 123 جاسىندا دۇنيەدەن وزعان. ءبىز دە مارفۋعا اجەيگە شۋاقتى دا ۇزاق عۇمىر تىلەدىك!