4 ناۋرىز كۇنى الماتى قالاسى مەدەۋ اۋدانى اكىمدىگى «8 ناۋرىز حالىقارالىق ايەلدەر» مەرەكەسىنە بايلانىستى قۇتتىقتاۋ كەشىن وتكىزدى.
جامبىل اتىنداعى قازاق مەملەكەتتىك فيلارمونياسىندا وتكەن مەرەكەلىك شارادا پرەزيدەنت جارلىعىنا ساي «التىن القا» جانە «كۇمىس القامەن» ۋيكاسوۆا سۆەتلانا ديكانبايەۆا جانە ابديگانييەۆا زۋلفيا جۋمابايەۆا ماراپاتتالدى. ماراپاتتاۋ راسىمىنە مەدەۋ اۋدانى اكىمى جىلقىبايەۆ ەرجان جۇمات ۇلى قاتىسىپ، انالارعا توسبەلگىلەر تاقتى. سونداي-اق بارشا ايەلدەر قاۋىمىنا جىلى لەبىزىن ايتىپ، قۇتتىقتاۋىن جەتكىزدى. ءىس-شارا «ايەلدىڭ جۇرەگى – الەمنىڭ تىرەگى» كونسەرتتىك باعدارلاماسىمەن جالعاستى.
«قامشى» پورتالى وقىرماندارى نازارىنا ەرجان جۇمات ۇلىنىڭ قۇتتىقتاۋىن ۇسىنادى.
«ارمىسىزدار اياۋلى ارۋلار!
قىمباتتى دا ءقادىرلى انالار!
سىزدەردى كوكتەمنىڭ شۋاعىمەن بىرگە كەلگەن 8 ناۋرىز – حالىقارالىق ايەلدەر كۇنى مەرەكەسىمەن شىن جۇرەكتەن قۇتتىقتايمىن!
«ايەل - ءومىر تىرەگى عانا ەمەس، ايەل - ءومىردىڭ ءوزى». ويتكەنى ومىرگە ءنار بەرىپ، وشاقتىڭ باق-بەرەكەسى مەن جىلۋىن ساقتايتىن سىزدەر، قىمباتتى ارۋلار.
«ىزگىلىك اتاۋلىنىڭ ءبارى كۇننىڭ نۇرى مەن انانىڭ اق سۇتىنەن جارالعان» وسىنى ۇمىتپاي، ءبىز سىزدەرگە ءاردايىم باس ءيىپ تاعزىم ەتۋ ءبىزدىڭ مىندەت.
ءبىز قاشاندا قوعامنىڭ دامۋىن، ومىردە – نازىك، ال ىستە – مىعىم ايەلدەر قاۋىمىمەن تىعىز بايلانىستىرامىز.
تاۋەلسىزدىكتىڭ العاشقى جىلدارى انالارىمىز بەن اپالارىمىز ەل مەن ەرگە سىن بولعان شاقتا قوعام جۇگىن قايىسپاي كوتەرە ءبىلدى.
تاريحىمىزدا باتىرلار مەن اقىنداردى دۇنيەگە اكەلگەن، اقىلىمەن ەل بيلەگەن جانە ايباتىمەن جاۋ قاشىرعان انالار – قاي كەزدە دە قوعامنىڭ باعى مەن باقىتى، تىرەگى مەن جۇرەگى، ارمانى مەن جاۋاپكەرشىلىگى بولا بىلگەن.
مىنە سول ۇرپاقتار ساباقتاستىعىنىڭ كۋاسى رەتىندە بۇگىن ارامىزدا ۆەرا ۆاسيليەۆنا، شامشا كوپباي قىزى، اياگۇل تورە قىزى، ماريام نۇرعالي قىزى، مارفۋعا ايتقوجينا سياقتى اۋدانىمىزدىڭ قۇرمەتتى ازاماتشالارى وتىر.
وتانىمىزدىڭ ءار قۇتتى قادامى مەن تابىستى ىستەرى سىزدەردىڭ ارقالارىڭىزدا كەلگەن اسىل دۇنيە. ەلباسىمىز ايتقانداي: «ايەل – وشاقتىڭ ۇيىتقىسى، التىن بەسىكتىڭ يەسى. ەل بولاشاعىنىڭ بارلىعى ايەل ازاماتتارىنىڭ قولىنان وتەدى» دەگەن ءسوزى بارشامىز ءۇشىن ۇلكەن ونەگە.
مەملەكەتىمىزدىڭ بۇكىل تىنىس-تىرشىلىگىنىڭ باسى – قاسىندا بولىپ، بىرلىك پەن تۇراقتىلىقتىڭ ساقتالۋىنا، ەل الەۋەتىن كوتەرۋگە انالارىمىز بۇگىندە دە ەر ازاماتتارىمىزبەن يىق تىرەسە ەڭبەك ەتىپ كەلەسىزدەر.
سوندىقتان دا بارشاڭىزدىڭ ەل دامۋى جولىنداعى ەرەن ەڭبەكتەرىڭىزگە زور ىقىلاسپەن ريزاشىلىعىمدى بىلدىرەمىن!»
