فرانسيالىق Le Monde باسىلىمى قازاقستاندىق ءانشى ديماش قۇدايبەرگەن جايلى ماقالا جاريالادى، - دەپ حابارلايدى tengrinews.kz. 

"قىتايلىق تەلەجوبا قازاقتىڭ شوۋىنا اينالدى" دەگەن تاقىرىپپەن جاريالانعان ماقالادا ديماش قۇدايبەرگەننىڭ فرانسۋزدىڭ SOS d'un terrien en detresse ءانىن ورىنداپ، سەنساسيا جاساعانى ايتىلادى. 

"ديماش قۇدايبەرگەن قىتايلىق Hunan TV ارناسىندا شىعاتىن Geshou 2017 جوباسىندا (بۇرىنعى I'm a Singer) قىز-قىركىننىڭ جۇرەگىن جاۋلاپ الدى. 1994 جىلى تۋعان قازاق ديماش قۇدايبەرگەن فرانسۋزشا Sos d'un terrien detresse ("مەن نەگە كۇلەمىن، مەن نەگە جىلايمىن") ءانىن ورىنداۋ بارىسىندا سوزدەردى دۇرىس ايتۋى اسا جاقسى بولماعانىمەن، كورەرمەنگە بۇل كەدەرگى بولمادى، ول ناعىز وت بولدى. ول 21 قاڭتاردا كورسەتكەن ونەرىنەن كەيىن الەۋمەتتىك جەلىنىڭ تريۋمفىندا"، - دەلىنگەن ماقالادا.

سونداي-اق، "وسى ۋاقىتقا دەيىن ءوز ەلىندە بەلگىلى بولسا، ال ەندى جۇڭگو جۇلدىزدارى ىشىندە تانىمال بولعان" ديماش قۇدايبەرگەن جايىندا Lam Yiceng دەگەن 25 جاستاعى جانكۇيەرىنىڭ ءسوزى كەلتىرىلەدى. "كوپتەگەن قىتايلىق قازاقستاننىڭ كايدا ەكەنىن بىلمەگەن بولسا، بۇدان سوڭ قازاق دەگەننىڭ كىم ەكەنىن بىلەتىن بولدى" دەيدى جانكۇيەر.  

ماقالانىڭ "Xiexie بارلىق ماسەلەنى شەشپەيدى" اتتى بولىمىندە اۆتور ەندىگى كەزەڭدەردە ديماش قۇدايبەرگەننىڭ قىتايدا حيتكە اينالعان اندەردى ورىنداۋشىلارىمەن جارىسقا تۇسەتىنىن جازادى. 

"18 اقپاندا برۋنو مارس پەن مارك رونسوننىڭ Uptown Funk ءانىن ورىنداعان ديماش قۇدايبەرگەن 22 ساۋىردە بولاتىن فينالدا جەڭىسكە كول جەتكەزە مە ەكەن؟ ول جۇڭگو تىلىندە بىردە-بىر ءسوز بىلمەيدى، تەك ءان ورىنداپ بىتكەن سوڭ "xiexie" ("راقمەت") دەپ قايتالايدى. ەندى ول وتە ۇلكەن بەلەستەن ءوتۋ كەرەك، ياعني اندەرى ۇنەمى جەرگىلىكتى كاراوكەدە جارىسا ايتىلاتىن قىتايلىق جۇلدىزدارمەن جارىسقا تۇسەدى. ەڭ العاش جۇڭگو تىلىندە ءان ايتقاندا فونەتيكادان قينالعانىن بايقايمىز، كورەرمەننىڭ كوزايىمىنا اينالۋ ءۇشىن وسى تىلدە ءان ايتۋعا مىندەتتى ەدى. دەگەنمەن بار ماسەلەنى شەشەتىن ءتىل ەمەس"، - دەپ جازعان ماقالا اۆتورى.

وسىدان كەيىن قازاقستاندىق ءانشىنىڭ ونەرىنە باس يگەن تاعى ءبىر جۇڭگو جانكۇيەرى - شانحايلىق جاس شەن لينگتىڭ ءسوزى كەلتىرىلەدى: "ونىڭ داۋسىنا تاڭعالعانىم سونشا، ءقازىر سونىمەن بىرگە ۋايىمدايتىن بولدىم". 

اۆتوردىڭ ايتۋىنشا، ونىڭ قازاقستان حالقىنىڭ سانىنان (18 ميلليون) ارتىق قىتايلىقتاردىڭ قولداۋىنا يە بولاتىنى انىق. "كارەراسىن جاساپ، بولاشاقتا قالتاسىن قالىڭداتۋعا وسى دا جەتكىلىكتى"، - دەپ قورىتادى ويىن اۆتور.

ال وسى ماقالاعا قاتىستى پىكىرىندە ءانشىنىڭ PR-ديرەكتورى ءارى دوسى الپامىس شاريموۆ فرانسيادان كوپتەگەن ۇسىنىستىڭ ءتۇسىپ جاتقانىن حابارلادى. "راسىندا دا، فرانسيادان كوپ ۇسىنىستار كەلىپ جاتىر. فرانسۋزداردىڭ قىزىعۋشىلىعى وتە جوعارى. ەۋروپادان كەلەتىن xاتتاردىڭ كوبى وسى ەلدەن. جاقىن ارادا فرانسياعا بارىپ قالۋىمىز مۇمكىن. بۇل ازىرشە قۇپيا!"، - دەدى شاريموۆ.

ايتا كەتەيىك، Le Monde - كۇن سايىن 364 240 دانامەن شىعاتىن جۋرنال. باسىلىمنىڭ شتاب-پاتەرى ءپاريجدىڭ 13ء-شى وكرۋگىندە ورنالاسقان. Le Monde گازەتىنىڭ نەگىزىن يۋبەر بوۆوم-مەري́ شارل دە گوللدىڭ تاپسىرىسىمەن 1944 جىلى قۇرعان. گازەتتىڭ ءبىرىنشى سانى 1944 جىلدىڭ 19 جەلتوقسانىندا شىققان. ال 1995 جىلدىڭ 19 جەلتوقسانىنا باستاپ باسىلىمدى ونلايندا وقۋعا بولادى.

ەسكە سالايىق، الداعى سەنبىدە، ياعني 11 ناۋرىزدا Hunan TV ارناسىندا ديماش قۇدايبەرگەن I'm a Singer بايقاۋىنىڭ سەگىزىنشى كەزەڭىندە ونەر كورسەتەدى.