شىعىس قازاقستاننىڭ تارباعاتاي اۋدانىنىڭ تۇرعىنى ءبىر دوربا التىن تاۋىپ الدىم دەپ ارنامىزعا حابارلاستى دەيدى 31 ارنا.. شالقار ساعادييەۆ قىزىلكەسىك اۋىلىنىڭ ماڭىنداعى قۋباس اسۋىندا كولىگى بۇزىلىپ، تاس ىزدەپ تاۋعا شىعادى. سول ساتتە جول جيەگىنەن 100 مەتر قاشىقتىقتا ەسكى كەنەپ قاپ ىشىنەن بەلگىسىز زات تابىلعان.

شالقار ساعادييەۆ، ەكپىن اۋىلىنىڭ تۇرعىنى:

- Cودان تاس ىزدەپ توبەگە شىعىپ كەتكەنمىن. جارتاستىڭ تۇبىنەن ءبىر موشەك تاۋىپ الدىم. ءىشىن اشىپ قاراسام، قۇيىلعان ەكى زات. ساپ-سارى. تاس سياقتى قاتتىلاۋ. شيفرى، جازۋى بار سىرتىندا.

قاپتىڭ ىشىنەن تارى تەكتەس ۇساق جانە پىشىندەلگەن قالىبى بار مىنانداي زاتتار شىققان. سونىمەن قاتار 1968 جىلى باسىلعان "ۋرالسكيي رابوچيي" گازەتىنىڭ كەيبىر دانالارى بار. ازامات جەدەل جاقىن ماڭداعى ەلدى مەكەننىڭ ۋچاسكەلىك پوليسياسىنا حابارلاپ، التىن دەپ ويلاعان زاتتى ساراپتامادان وتكىزۋ ءۇشىن تابىستاپ بەرەدى. ءبىر قىزىعى، اۋداندىق ىشكى ىستەر ءبولىمى مۇنداي جايتتىڭ تىركەلمەگەنىن ايتىپ وتىر. ياعني، ساراپتاما جاسالماعان. ال سيليندر فورمالى زاتتىڭ سىرتقى كورىنىسىن قاراعان ماماندار مەتالل قۇيمالارىن بىلايشا بوياۋمەن تاڭبالاۋ سيرەك كەزدەسەدى دەيدى. ايتۋلارىنشا مينەرالدىڭ ءبىر ءتۇرى بولۋى ىقتيمال.