ايالاي ءبىل...
قازاق قىزى، ەرتەڭ - جار، ەرتەڭ - اناڭ، اياۋلىڭ،
تۇسپەگەنى ابزال عوي، جۇرەگىنە قاياۋدىڭ.
قازاق قىزى، ۇلتىڭنىڭ ايناسى عوي، ايناسى،
بۇگىن، ونى قولداساڭ، ەرتەڭ تيەر پايداسى.
قازاق قىزى، الاۋ گۇل، جارقىراعان كوكتەم عوي،
جۇرەگىنە سۇلۋدىڭ، دالا گۇلىن ەككەن عوي.
قازاق قىزى، قاشان دا ماقتانىشىڭ بولادى،
سۇلۋلارمەن جىگىتتىڭ جانى نۇرعا تولادى.
قازاق قىزى، ۇلتىڭنىڭ ەرتەڭى عوي، ەرتەڭى،
قازاق قىزى، كوركەم ول، ەرتەگى عوي، ەرتەگى!
سىيلاڭدارشى سۇلۋعا، جاقسىلىقتى اياماي،
قازاق قىزىن، ايالاي، بىلىڭدەرشى، ايالاي!..
كوكتەم سۇلۋ، كەلەدى...
...الدىم سونداي دەرەكتى،
دەرەك جانە كەرەكتى.
الماتىعا تاياپتى،
كوكتەم ارۋ جەلەكتى.
جولدا دەيدى، كەشەلى،
سونداي سوزدەر ەسەدى.
التىنداتقان كۇيمەمەن،
كەلە جاتىر دەسەدى.
«اسپانداعى كۇن ،سۇلۋ»،
دالامداعى گۇل، سۇلۋ.
التىنداتقان كۇيمەدە
وتىر دەيدى، ءبىر سۇلۋ.
سونداي كوركەم جامالى،
سۇيگەن جاندار، جارالى.
ونىڭ كوركى، كورگەندى
مۇلدەم ەستەن الادى.
جەلك-جەلك ەتىپ، جەلەگى،
كەلە، سالەم بەرەدى،
كوكتەم سۇلۋ، قازاقتىڭ
دالاسىنا كەلەدى.
قوزىپ بارلىق دەلەبە،
ۋاقىت، جىلدام جەلە مە؟
كوكتەم سۇلۋ، قازاققا،
باقىت الىپ كەلە مە؟..
«اساۋعا، تۇساۋ، كىم ەكەن؟..
شىنىندا دا، قىزدىڭ جانى نازىك، ءا،
دومبىرانىڭ ىشەگىندەي جىڭىشكە.
ارۋلارعا جۇرمەيدى ەش بازىنا،
سۇلۋلاردىڭ ساعان ايتار، سىرى ىشتە...
ءبارى ءمالىم، ول ارۋعا سىرىڭنىڭ،
بەرە سالعان تابيعاتتىڭ سىيىنا.
ءبارى جاتىر، جانارىندا سۇلۋدىڭ،
تىرىسسا دا، جاسىرۋى قيىن، ءا؟
ءبىر-اق ساتتە، باي قىلاتىن جارلىنى،
ىرەنجىسسەڭ، ول تاعدىردىڭ سۇمدىعى – ۋ.
سۇلۋلاردىڭ جۇرەگىندە بارلىعى،
ال، قيىن-اۋ، ول جاقتاعى سىردى ۇعۋ.
ول بەلگىسىز، «تۇساۋ بولعان، اساۋعا»،
ول بەلگىسىز، عاشىق بولعان كىم، كىمگە؟
ءبىز قازاقتىڭ ارۋلارىن قاشان دا،
الاقانعا سالىپ ءجۇرۋ، مۇمكىن بە؟..
جۇماش كەنەباي
