اقش-تا قازاقستاندىق دارىگەر نۇربول دانياروۆ وسىدان بىرەر كۇن بۇرىن ءىز-تۇسسىز جوعالىپ كەتكەن. بۇل تۋرالى «قامشى» پورتالى ktk.kz-كە cىلتەمە جاساي وتىرىپ  حابارلايدى.

الماتىلىق گينەكولوگ دارىگەر ءوزىنىڭ ماماندىعىن  كاسىبي ءتۇرعىدا جەتىلدىرۋ باعدارلاماسى بويىنشا شەتەلگە بارعان.  الايدا، ەلگە قايتىپ ورالۋعا ءبىر كۇن قالعاندا ول ءىز-تۇسسىز جوعالىپ كەتكەن.  الەۋمەتتىك جەلىلەردە نۇربولدىڭ جوعالعانى تۋرالى اقپارات 7 ناۋرىز كۇنى جاريالانىپ، تاراي باستادى. قازاقستاندىق دارىگەردى ىزدەستىرۋگە تەك وتانداستارى عانا ەمەس، شەتەلدىك ازاماتتار مەن امەريكاندىق پوليسەي قىزمەتكەرلەرى دە ات سالىسقان. الايدا، كوپ ۇزاماي جوعالعان نۇربول دانياروۆ ءوزىنىڭ امان-ساۋ ەكەندىگىن حابارلاعان. بەلگىلى بولعانداي، ول باسقا  ەلدە ءوزىنىڭ دەمالىسىن جالعاستىرماق بولعان.  قازاقستاندىق دارگەرلەردىڭ بىلىكتىلىگىن كوتەرۋ ماسەلەسىن ۇيىمداستىرۋشى نۇرگۇل سالييەۆا دانياروۆتىڭ ەلگە ورالۋعا 1 كۇن قالعاندا جوعالىپ كەتكەنىن راستادى:

«تاڭەرتەڭ نۇربولدى تاڭعى اسقا شاقىرعاندا، ول تومەنگە تۇسپەي قويدى. وتا جاساۋىمىز كەرەك بولعان. سوندىقتان قاتتى اسىعىس ەدىك. نۇربولدىڭ بولمەسىنە كىرگەندە ونىڭ جوق ەكەنىن بىلدىك. پوليسيا قىزمەتكەرلەرىن شاقىرتقاندا، ولار نۇربولدىڭ كيىمدەرىن قاراپ، ىزدەپ كورىڭدەر دەدى. ءبىز ىزدەگەندە، شىنىمەن دە ونىڭ كيىم-كەشەكتەرى جوق بولىپ شىقتى».

25 اقپاندا وسىندا كەلگەن 3 دارىگەر وزدەرىنىڭ كاسىبي بىلىكتىلىكتەرىن جەتىلدىرۋ ماقساتىندا امەريكاندىق حيرۋرگتاردان شەبەرلىك ساعاتىن الىپ، وتا جاساۋدى ۇيرەنىپ جۇرگەن. الايدا شەبەرلىك ساعاتىنىڭ سوڭعى كۇنىندە قاتىسۋشىلاردىڭ ءبىرى دانياروۆ قاشىپ كەتكەن.

ۇيىمداستىرۋشىلاردىڭ ايتۋى بويىنشا، دانياروۆ الدىن-الا ريچموند-چيكاگو رەيسىنە بيلەتىن شىعارىپ الىپتى. دەمەك، ءوزىنىڭ بۇل ساپارىن الدىن-الا ويلاستىرىپ، جوسپارلاعان.

الەۋمەتتىك جەلىلەردە وسى وقيعاعا قاتىستى ءبىراز داۋ-داماي، شۋ شىققان. بىرەۋلەر دانياروۆتى قولداسا، ەكىنشىلەرى ونى جازاعا تارتۋدى ۇسىنعان.

ال وسىنداي شۋدىڭ شىعۋىنا نەگىزگى سەبەپشى بولعان نۇربول دانياروۆ ءوزىنىڭ ىسىندە تۇرعان ۇياتتى دا، قىلمىستى دا ەشتەڭە جوق دەپ وتىر:

«مەن ەشقايدا قاشقان جوقپىن. ۇيىمداستىرۋشىلارعا كەلگەن كۇنى-اق قاراجاتتارىن تولەپ تاستادىم. ەشكىمگە ەشتەڭە مىندەتتى ەمەسپىن. ولار مەنى ەلىمنىڭ الدىندا جەكسۇرىن ەتىپ كورسەتىپ وتىر. ولاردىڭ ماعان، مەنىڭ جەكە تۇلعاما دەگەن قارىم-قاتىناسى ۇناعان جوق. اۋەلى  بىلاي بولادى دەپ تۇسىندىرگەن، كەيىن كەلگەن سوڭ مۇلدە باسقاشا سويلەدى. مەن ولاردى دا، ەلىمدى دە الداعام جوق» -دەيدى ن.دانياروۆ. ونىڭ ايتۋىنشا ول بيلەتتى ءوز اقشاسىنا ساتىپ العان. سونىمەن بىرگە،  جاقىن ارادا تۋعان ەلىنە قايتاتىندىعىن، ءقازىر ەڭبەك دەمالىسىندا جۇرگەنىن جەتكىزدى.

الايدا، وسى جاعدايدان كەيىن ۇيىمداسىرۋشىلاردا اقش-تا قازاقستاندىق مامانداردىڭ بىلىكتىلىگىن جەتىلدىرۋ باعدارلاماسىن جاۋىپ تاستاي ما دەگەن قورقىنىش تۋىپ وتىر.