الدىمىزداعى اپتانىڭ سوڭىندا، ياعني دەمالىس كۇنى جارتى الەم اسىعا كۇتكەن وتانداسىمىز گەنناديي گولوۆكيننىڭ امەريكالىق  دەنيەل دجەيكوبسكە قارسى جەكپە-جەگى وتەدى. «گيننەستىڭ رەكوردتار كىتابىنا قارسىلاستارىن كوبىرەك نوكاۋتپەن جەڭگەنى ءۇشىن ەنگەن گەنانىڭ نوكاۋتتار سەرياسى ارى قاراي جالعاسا ما؟! وسى ۋاقىتقا دەيىن كىل مىقتىلارمەن قولعاپ تۇيىستىرگەن وتانداسىمىزدىڭ الداعى قارسىلاسى قانشالىقتى مىقتى؟» دەگەن سۇراقتاردىڭ توڭىرەگىندە بوكس ونەرىنىڭ مايتالماندارى مەن ونەر جۇلدىزدارىنان ساۋالناما جۇرگىزىپ كوردىك.

1.   دەنيەل دجەيكوبس گولوۆكينگە قانشالىقتى جانە نەسىمەن قيىن قارسىلاس دەپ ويلايسىز؟

2.   گولوۆكين باستاعان قازاق بىلعارى قولعاپ شەبەرلەرىنىڭ ەلوردادا بوكس كەشىن وتكىزۋى جايلى نە ايتاسىز؟

جانقوش تۇراروۆ، كاسىپقوي بوكسشى:

دجەيكوبس وتە جىلدام بوكسشى

1.   مەنىڭ ويىمشا، دجەيكوبس گولوۆكينگە ەشقانداي دا قيىندىق تۋدىرمايدى. ارينە، بۇل بوكسشى دا وڭاي شاعىلاتىن جاڭعاق ەمەس، سوققىلاردان دەر كەزىندە قاشىپ، بارىنشا قارسىلاستىڭ سوققىسىن تيگىزبەيتىن سياقتى ارتىقشىلىعى بار. گولوۆكيننىڭ باسقا قارسىلاستارىنا قاراعاندا دەنيەل وتە جىلدام جۇدىرىقتاساتىن بوكسشى. دەگەنمەن، 6 مەن 8 راۋندتىڭ اراسىندا گولوۆكين قارسىلاسىن سۇلاتادى دەگەن ويدامىن.

2.   گولوۆكيننىڭ قاتىسىپ-قاتىسپايتىنىن ناقتى بىلمەيمىن، ءبىراق قانات اعالارىمىز باستاعان بوكسشىلار ەكسپو كەزىندە ەلىمىزدە كەرەمەت بوكس كەشىن وتكىزۋى مۇمكىن. ەگەردە بوكس كەشى وتەتىن بولسا، مىندەتتى تۇردە قاتىسامىز دەپ ويلايمىن.

جانىبەك ءالىمحان ۇلى، الەم چەمپيونى:

گولوۆكين دجەيكوبستەن ءبىر باس جوعارى 

1.   جالپى سپورتتا ءالسىز قارسىلاستار بولمايدى. دجەيكوبستىڭ جەكپە-جەكتەرىنە كوز جۇگىرتىپ كوردىم. ءبىر بايقاعانىم: بۇل سپورتشى العاشقى راۋندتا جوعارى قارقىنمەن جۇدىرىقتاسادى ەكەن. دەگەنمەن، گولوۆكينگە ەشقانداي دا قيىندىق تۋعىزا قويماس. تەحنيكالىق تۇرعىدان دا، سوققى جاعىنان دا گولوۆكين دجەيكوبستەن ءبىر باس جوعارى ەكەنى انىق. سوندىقتان دجەيكوبس گولوۆكينگە قارسى تەك بەس راۋند قانا توتەپ بەرە الۋى مۇمكىن.

2.   ەكسپو كەزىندە تاماشا بوكس كەشى ءوتۋى عاجاپ ەمەس. ەلىمىزگە كەلگەن الەمنىڭ الپاۋىت مەملەكەتتەرىنە قازاق بوكسشىلارىنىڭ قايسارلىعىن، جالپى قازاق حالقىنىڭ مىقتىلىعىن تانىتقىمىز كەلەدى. ەگەردە ەكسپو كەزىندە سونداي مۇمكىندىك بولاتىن بولسا، ءبىز مىندەتتى تۇردە قازاق ەلىنە،جالپى الەمگە كەرەمەت بوكس كەشىن تارتۋ ەتەمىز دەپ ويلايمىن. جالپى، ەلىمىزدە بۇنداي دودالاردىڭ ءجيى ءوتىپ تۇرعانىن قالايمىن.

ەسەي جەڭىس ۇلى، جۋرناليست:

دجەيكوبس وتانداسىمىزعا ەرجۇرەكتىگىمەن قيىن

1.   دجەيكوبستىڭ اسا ءقاۋىپتى اۋرۋدى جەڭىپ، بوكسقا قايتىپ ورالۋىنىڭ ءوزى ەرلىككە پارا-پار. مىناداي نارسەنى بايقادىم: جەكپە-جەك الدىندا اۋزىڭا نە كەلسە، سونى ايتۋعا بولادى. ءوزىڭدى مىقتى عىپ، ەرجۇرەك قىپ كورسەت، قارسىلاسىڭدى كومىپ تاستايتىنىڭدى ايتا بەر. ءبىراق شارشى الاڭعا شىققاندا گولوۆكيننىڭ العاشقى اۋىر سوققىسىن كوتەرە الاسىڭ با؟ ستيۆەنس تە، رۋبيو دا، لەمە دە ءسويتتى، كەزدەسۋ الدىندا ۋادەنى ۇيىپ-توكتى. ءبىراق گەنانىڭ العاشقى سوققىسىنىڭ ءوزى-اق ولاردى تاۋبەسىنە ءتۇسىردى. دجەيكوبستى دە ءىس جۇزىندە ءبىر-اق كورگەن دۇرىس. برۋكپەن جۇدىرىقتاسقاندا گولوۆكين اشىق ءجۇردى، كوپ سوققى جەدى. وسىنى ازايتسا ەكەن دەيمىن. دجەيكوبس وتانداسىمىزعا ەرجۇرەكتىگىمەن قيىن. ءبارىن شارشى الاڭ كورسەتەدى.

2.   ەگەر مەملەكەت ءوزى قىزىعۋشىلىق كورسەتىپ جاتسا، ەكسپو اياسىندا ايتۋلى بوكس كەشىنىڭ وتكەنى دۇرىس. بۇل – ءبىزدىڭ جەتىستىكتەرىمىزدىڭ كورمەسى عوي. وندا نەگە بارىمىزدى كورسەتپەسكە؟ «الەم بارىسى» ءتۋرنيرى دە سول ۋاقىتقا جوسپارلانىپ جاتىر. ەندەشە، قانات يسلام، جانات جاقيانوۆ، بەيبىت شۇمەنوۆ، گەنناديي گولوۆكين سەكىلدى مىقتىلار دا، جاڭا بوي كورسەتىپ كەلە جاتقان ماديار اشكەيەۆ، باتىر جۇكەمبايەۆ، يسا اقبەربايەۆ، ءالي احمەدوۆ سەكىلدى جىگىتتەر قاتىساتىن كەش ۇيىمداستىرىلسا، ەلدىڭ رۋحى كوتەرىلەتىن شارا بولاتىنىنا سەنىمدىمىن.

ەرماحان ىبىرايىموۆ، وليمپيادا چەمپيونى:

ەكى قارسىلاس اسا ءبىر اشىلىپ جۇدىرىقتاسا قويماس

1.   دجەيكوبس سوققىسى جويقىن بوكسشىلاردىڭ ءبىرى بولعاندىقتان، العاشقى راۋندتاردا ەكى قارسىلاس اسا ءبىر اشىلىپ جۇدىرىقتاسا قويماس. گەنناديي العاشقى ءۇش راۋند بويى قارسىلاسىنىڭ وسال تۇسىن باعامداپ، تەك 4-5 راۋنتاردا اشىق شابۋىلعا شىعادى. ال 6-7 راۋند-تىڭ ارالىعىندا گەنا قارسىلاسىن نوكاۋتقا جىبەرەدى دەپ ويلايمىن.

2.   ەكسپو قارساڭىندا گولوۆكين مەن قانات يسلام باستاعان بىلعارى قولعاپ شەبەرلەرى شارشى الاڭعا شىعىپ، كۇللى قازاق جانكۇيەرلەرىنە كەرەمەت بوكس كەشىن تارتۋى ءتيىس دەپ ويلايمىن.

باعلان ءابدىرايىموۆ، ءانشى:

گولوۆكين دجەيكوبستەن كىشىگىرىم

نوكداۋن الاتىن سياقتى

1.   راسىندا گولوۆكيننىڭ كارەراسىنداعى ەڭ مىقتى، ءقاۋىپتى قارسىلاس دجەيكوبس بولايىن دەپ تۇر. دجەيكوبستىڭ مەلجەمدى بوكسشى ەكەنى بارشاعا ايان. مەنىڭ پايىمداۋىمشا، گولوۆكين دجەيكوبستەن كىشىگىرىم نوكداۋن الىپ، ەلدىڭ زارەسىن الاتىن سياقتى. سودان كەيىن عانا گولوۆكين قاھارىنا ءمىنىپ، تاماشا جەكپە-جەك شوۋ كورسەتىپ، 6-7 راۋندتا دجەيكوبستىڭ مىسىن باسادى دەپ ويلايمىن.

2.   گولوۆكين، قانات يسلام، جانات جاقيانوۆ، بەيبىت شۇمەنوۆ، ماديار اشكەيەۆ، باتىر جۇكەمبايەۆ، يسا اقبەربايەۆ، ايدار شارىبايەۆ سياقتى كاسىپقوي بوكستىڭ ساڭلاقتارى ەكسپو كەزىندە، ەلوردامىزدىڭ تورىندە بوكس كەشىن وتكىزسە، ەكسپو ءۇشىن دە، قازاق حالقى ءۇشىن دە كەرەمەت دۇنيە بولار ەدى.

دانيار ەلەۋسىنوۆ، وليمپيادا چەمپيونى:

دجەيكوبس گەنانىڭ قاتەلىگىن

ۇتىمدى پايدالانىپ كەتۋى مۇمكىن

1.   دەنيەل دجەيكوبس – اسا قاتەرلى دەرتتى دە جەڭە بىلگەن وتە شىدامدى بوكسشى. شارشى الاڭدا قارسىلاسىنىڭ ىس-ارەكەتىنىڭ دەر كەزىندە ءتۇسىنىپ، اياعىمەن جاقسى جۇمىس ىستەيدى. قاشىپ ءجۇرىپ، ءوزىنىڭ قولايلى ءساتىن كۇتىپ، گەنانىڭ جىبەرگەن قاتەلىگىن ۇتىمدى پايدالانىپ كەتۋى مۇمكىن. ءبىراق گەنناديي ءوزىنىڭ ايلا-تاسىلىمەن، جويقىن سوققىسىنىڭ استىنا الىپ، دجەيكوبسكە ەش مۇمكىندىك بەرمەيدى دەپ ويلايمىن.

2.   ارينە، ەكسپو قارساڭىندا مۇنداي كەش وتسە، وتە تاماشا بولار ەدى. بوكس دەسە، جالپى سپورت دەسە، ىشكەن اسىن جەرگە قوياتىن جانكۇيەرلەردى باقىتقا بولەپ، مارقايىپ قالاتىنى انىق. قازاق بوكسشىلارىنا، قازاق ەلىنىڭ جانكۇيەرلەرىنە بۇكىل الەم تامسانا كوز تىگىپ قارايتىن ءسات تۋاتىن ەدى.

ساۋالنامانى دايىنداعان داۋرەن تۇلكىباي

 «ۇلان»، №11