«قامشى» پورتالىنىڭ حات قورجىنىنا جاقسىبەك قاقاننىڭ حاتى كەلىپ ءتۇستى. وزەكتى ماسەلە قوزعالعان ماتەريالدى پورتال وقىرمان نازارىنا ۇسىنۋدى ءجون سانادى.
«ءبىز ءبىلىم جانە عىلىم ءمينيسترىن تەككە جازعىرىپ جاتىرمىز-اۋ شاماسى. باياعىدا ءبىر كىسى ايتتى دەيدى "ۋلاپ-شۋلاپ ءجۇرىپ، ۇل تاباتىن كەلىنشەككە قىز تاپتىردىق" دەمەكشى داۋ-داماي مەن ۋلاپ-شۋلاۋدان تانباعان ءبىزدىڭ قوعامدا بيلىك اسپاندا قالىقتاپ، وزدەرى قۇرعان جوبا مەن جوسپاردىڭ ناتيجەسىنە وزدەرى ماس بولىپ، وزدەرىنەن-وزدەرى شايتتانىپ، ريزا بولىپ جۇرەتىن سياقتى. قوعامنىڭ قوزعالتقىش كۇشى حالىق نە ويلايتىنىندا. ولاردا حالىق دەگەن ۇعىم جوق. ولاردا قانىپەزەر مونوپول كاپيتاليزىنىڭ ماقساتى عانا بار. ءبىزدىڭ بيلىكتى اڭعارساڭىزدار ىشتەن باسقارمايدى. سىرتتان ءبىر قۇدىرەتتى كۇش قاۋسىرىپ، قىسىپ قاداعالاپ تاپسىرما بەرەدى تۇرادى. سىزدەر ويلاماڭىزدار قازىرگى بيلىك ورىس ءتىلدى ءوز ۇرپاقتارى ءۇشىن كۇرەسىپ جاتىر دەپ، ولار ۇلكەن ءبىر وزگەرىسكە زور دايىندىق ۇستىندە. وتە ساۋاتتى تۇردە جۇرگىزىلىپ جاتقان استىرتىن ساياسات قازاقتى ۇشپاققا شىعارمايدى، قازاقتى قوراعا قايتا تىعۋ دايارلىعىندا. ەشبىر مەملەكەت ۇلتتىق تىلىنە قارسى ءبىزدىڭ بيلىكتەي ايارلىق تانىتىپ وتىرعان جوق. ەشبىر ەل ءوز تىلىنە قازاق بيلىگىندەي ساتقىندىق جاساپ جاتقان جوق. قازاق ءتىلىن سويلەي المايتىن ادام بيلىكتە وتىرىپ قازاق مۇددەسىن قورعاي المايدى. اشىنباساق ايعايلاپ نەمىز بار. بيلىك دۇرىس ساياساتىن جۇرگىزىپ، حالىقتىڭ جاعىنان شىعىپ تۇرسا، ساياساتتا نەمىز بار. بيلىك قايتا-قايتا قيتۇرقى مالىمدەمە جاساپ، قيسىنسىز زاڭ قابىلداپ جۇرتتىڭ جۇيكەسىن سىناپ، ويناپ وتىرعان جوق. ولار كەزەڭ-كەزەڭ بويىنشا سۇمدىق جوسپارلارىن تىقپالاپ، زورلاپ بولسا دا ورتاعا سالىپ كەلەدى. حالىق ۋلاپ-شۋلاپ ءبىر بۇلقىنادى، ەكى بۇلقىنادى. اقىرى ەتى ءولىپ ۇيرەنگەن سوڭ قالاعانىڭدى قىلا بەرگە كەلىپ الدى. ايتپەسە نە ۇبت-دان قازاق ءتىلىن الىپ تاستايتىن قانداي قۇدىرەتتەرى بار. قازاق مەملەكەتى مە، قازاق ءتىلى نەگىزىگى ەمتيحاننىڭ ەڭ ماڭىزدى تالابى بولۋى شارت. ول وزگەرمەيتىن پارىز. مەيلى قانداي سىلتاۋ بولسا دا ۇلتتىڭ ءتىلى قۇرباندىققا ۇشىراماۋى ءتيىس. مىنا ازات ەلدە ەشكىمنىڭ وعان شەكتەۋ قويارلىق ۇقىعى جوق. ءبىز تىلمەن عانا قازاق بولا الامىز. باستارى باسقاعا ىستەمەسە دە، وسى تىلگە كەلگەندە، تىلسىزدەنۋگە كەلگەندە بيلىكتىڭ قۋانا زاڭ قابىلداپ، بەلسەنە اتقارا قالاتىنى تىقىردىڭ تەرەڭدە ەكەنىنە كوزىمىز جەتە تۇسەدى. قازاق ەلىندە تۇرىپ ءوزىمىز قازاقتىقتان جەرىسەك، شەتتەگىدەن نە سۇرايسىڭ. يممۋنيتەتىمىز ولمەسە ەكەن. ءار شۋدىڭ استىندا ۇلكەن قىساستىڭ كۇتىپ جاتقانىن جۇيكەمىز سەزىكتەنىپ، سەلت ەتىپ ويانىپ جاتساق ەكەن».
جاقسىبەك قاقان
