بۇگىنگى كۇنى قىتايداعى باستى احۋالعا اينالعان نارسە گەندەرلىك تەڭسىزدىك بولىپ وتىر. قىتايلىق ەر-ازاماتتار قالىڭدىق ىزدەگەندە وزدەرىنىڭ قاتتى قينالاتىندىقتارىن جەتكىزگەن. ءتىپتى قالىڭدىق تابۋ ءۇشىن ولار نەشە ءتۇرلى ادىس-تاسىلدەر قولدانادى ەكەن.

قىتايدا ۇيلەنبەگەن ەر-ازاماتتاردى «shengnan» دەپ اتايدى،  ياعني «كەرەكسىز»، «قاجەتسىز» «قالىپ قالعان» دەگەن ءسوز. قىتايلىق ەر-ازاماتتار ايەل ادامداردىڭ ازدىعىنا بايلانىستى قالىڭدىق تاڭداۋدا قينالادى.

قىتايداعى ايەلدەر مەن ەرلەردىڭ سانىنىڭ ايىرماسى ميلليونمەن ولشەنەدى. ونىڭ سەبەبى ءبىر جىلدارى ەلدە جۇرگىزىلگەن «جانۇياداعى ءبىر بالا» ساياساتى. 2015 جىلى «جانۇياداعى 1 بالا» ساياساتىنا تىيىم سالىندى.

مامانداردىڭ دەرەكتەرىنشە، 2020 جىلى قىتايداعى جالعىز باستى ەر ادامدار سانى  30 ميلليونعا جەتۋى مۇمكىن. ءتىپتى 2030 جىلى ەر ادامداردىڭ 4/1 بولىگى 30-40 جاستا ۇيلەنبەگەن ازاماتتار بولادى دەگەن بولجامدار ايتىلۋدا.

وسىنداي باسەكەلەسىك ۋاقىتىندا ەر-ازاماتتار قالىڭدىق ىزدەپ، قىزداردىڭ جۇرەگىن جاۋلاپ الۋ ءۇشىن نەشە ءتۇرلى قي-تۇرقى ارەكەتتەرگە بارادى ەكەن.

ماسەلەن، 2015 جىلى 40 جاسار قىتايللىق بيزنەسمەن ادامداردى تانىستىرۋ قىزمەتىمەن اينالىساتىن شانحايلىق  ۇيىمدى سوتقا بەرگەن. ونىڭ سەبەبى قىتايلىق ازامات وزىنە قالىڭدىق تاۋىپ بەرۋگە ۋادە ەتكەن ۇيىمعا 7 ملن يۋان (1ملن دوللار) تولەگەن. الايدا، ۇيىم جۇڭگو ازاماتىنىڭ تالابىن ورىنداي الماعان.

قىتايدىڭ وڭتۇستىگىندەگى گۋانچجوۋ قالاسىنىڭ تۇرعىنى ءوزى ۇناتقان قىزدىڭ جۇرەگىن جاۋلاۋ ءۇشىن 99 ايفون الىپ بەرگەن. الايدا جىگىتتىڭ وكىنىشىنە وراي، قىز ونىڭ ۇسىنىسىن قابىل الماعان.

قىتايدا تويلاناتىن جاڭا جىل مەيرامى قىز-جىگىتتەردىڭ ءجيى تانىساتىن ورنى بولسا كەرەك. تۋىسقاندارىنا كەلگەن جاستار وزدەرىنە سەرىك ىزدەۋگە وسى مەيرامدى پايدالاناتىن. قازىرگى كەزدە بۇل ەجەلدەن كەلە جاتقان مەيرامدى  تويلاۋ توقتاپ قالعان.

قىتايلىق ايەلدەردىڭ ايتۋى بويىنشا، ەر ادامدار پسيحولوگتار مەن سانشىلەردىڭ كومەگىنە جۇگىنەدى ەكەن.  ال تۋىسقاندارىنىڭ تاراپىنان سۇراقتاردان شارشاعان ازاماتتار قالىڭدىق قىزداردى جالعا الىپ جاقىندارىنا كورسەتۋگە مۇمكىندىك بەرەتىن  Hire Me Plz قىزمەتتەرىن قولدانادى. الايدا بۇل قىزمەت وتە قىمبات.

كوبىنەسە، قالىڭدىق ىزدەۋدە، قىزدارمەن تانىسۋدا پروبلەماعا ۇرىناتىن اۋىل-ايماقتا تۇراتىن ازاماتتار. سەبەبى، ايەل ادامدار ءوز كەزەگىندە قارجىلى، جاعدايى جاسالعان ەر ادامدارعا تۇرمىسقا شىققىسى كەلەتىنى جاسىرىن ەمەس.

كوپتەگەن ەر ادامدار كەشىرەك ۇيلەنگىلەرى كەلەتىنىن جاسىرمايدى. ونىڭ سەبەبىن تويعا كەتەتىن شىعىن، قالىڭدىق تاڭداۋعا كەتەتىن ۋاقىتپەن تۇسىندىرەدى.

ودان بولەك قىتايدا قالىڭدىق پەن كۇيەۋ جىگىت جارمەڭكەسى وتەدى. بۇل جارمەڭكەدە ءوز بالالارىن ۇيلەندىرگىسى كەلەتىن اتا-انالاردىڭ تاقتا ۇستىنە جاساعان جاريالانىمدارىن كورۋگە بولادى. الايدا تانىسۋدىڭ بۇل ءتاسىلى دە ءساتسىز بولىپ وتىر.

قىتايداعى جالعىزباستى ەر اداماداردىڭ كوبەيۋىن تۋدىرعان الەۋمەتتىك پروبلەما «جالعىز بالا ساياساتىنىڭ» اسەرىنەن ۋشىعۋدا، سەبەبى 2015 جىلى بۇل ساياساتقا توقتاۋ قويىلسا دا ونىڭ زارداپتارى  قاتتى ءبىلىنىپ جاتىر.  قىتايدا سول جىلدارى ۇل بالانىڭ تۋىلۋى جانۋياعا قۋانىش اكەلىپ،كەرىسىنشە  قىز بالالاردىڭ تۋىلۋى تاستاندى سابيلەر مەن ابورتتاردىڭ سانىن كوبەيتكەن. سوندىقتان بولار، قازىرگى ۋاقىتتا قىزدار، ايەلدەر سانىنىڭ كۇرت تومەندەۋى تاڭقالارلىق جاعداي ەمەس.