كوبىنە ادامدار 12 مۇشەسى ساۋ، تۇر-الپەتى، دەنە ءبىتىمى ءمىنسىز بولا تۇرا ومىرىنە نالىپ جۇرەدى. نە جەتىسپەيتىنى بەلگىسىز، ايتەۋ وز-وزدەرىن باعالاۋدان قالادى. الايدا، ومىردە كەلبەتى ۇسقىنسىز نەمەسە مۇگەدەكتىككە شالدىققان قانشاما قىز-جىگىتتەر بار. باسقالارىنىڭ جانىندا ولار ومىرگە نالۋعا قۇقىلى. ءبىراق، ولاي ىستەمەيدى. كەرىسىنشە، جىگەرلەنەدى، ومىرگە دەگەن قۇلشىنىسى ەرەكشە بولادى، بويلارىنا ءبارىن جەڭۋگە دايىن باتىلدىق داريدى. سونداي، كەيىپكەردىڭ ءبىرى امەريكالىق ەشلي سوتو.

 ۆيتيليگو اۋرۋىمەن اۋراتىن قىزعا ەلدىڭ ءبارى مازاقتاپ قارايتىن. الايدا، قىز اۋرۋىن جەڭىپ شىقتى. جوق، اۋرۋىنان ايىعىپ كەتتى دەگەن ءسوز ەمەس، ءوز اۋرۋىن ونەر تۋىندىسىنا اينالدىردى.

12 جاسىندا امەريكالىق ەشلي سوتو الەم بويىنشا ادامداردىڭ 1%-ى عانا اۋراتىن ۆيتيليگو اۋرۋىنا شالدىعادى. كىشكەنتاي كەزىندە موينىنا اق داقتاردىڭ تۇسۋىنەن باستاپ، ۋاقىت وتە كەلە دەنەسىنىڭ 75%-ىن جايلادى. ارينە، بۇنداي اۋرۋمەن قىز بالاعا كۇرەسۋ قيىن تيەتىنى انىق. ءاردايىم دوستارىنىڭ مازاعىنا قالاتىن، ونىمەن ەشكىم ارالاسقىسى كەلمەگەن. سول ءۇشىن قىز دەنەسىن تۇگەلدەي جاۋىپ تۇراتىن ۇزىن كويلەكتەر كيىپ جۇرەتىن.

الايدا، ءومىر بويى بۇلاي جاسىرىنۋدان دەنەسىندەگى داقتار كەتىپ قالمايدى عوي. قىز بارىنە كونۋگە بەل بايلايدى. 21 جاسىندا ەشلي ءوز بەينەسىن جاقسى كورە باستايدى. ءوز-وزىن قالاي بار سولاي قابىلدايدى. جۇرتتان جاسىرىنۋىن دوعارادى. ءسويتىپ دەنەسىندەگى داققا اينالعان بولىكتەرىن ءتۇرلى تۇسكە بوياپ، اۋرۋىن ونەر تۋىندىسىنا اينالدىرادى. بۇگىنگى كۇنى ەشليدىڭ دەنەسىنەن الەمنىڭ كارتاسىن كورە الامىز.

ءقازىر بۇل ارۋ ينستاگرامدا 84 مىڭ وقىرمانى بار تانىمال بلوگەر. ءوزىنىڭ دەنەسىنە ءتۇرلى سۋرەتتەر سالىپ جۇرتتى تاڭ قالدىرىپ ءجۇر. ونىڭ قيالىنىڭ شەگى جوق ىسپەتتى.

«مەن ءوز دەنەمنىڭ سۇلۋلىعىن قارا ماركەرمەن سۋرەت سالعان كەزدە كوردىم. وعان دەيىن ءوزىمدى ادەمى دەپ ەسەپتەمەيتىنمىن» -دەيدى ەشلي. ونىڭ ايتۋىنشا، ءوزىن سول كەيپىندە جاقسى كورۋگە ىقپال ەتكەن بودي-ارت ونەرى ەكەن.

ادام ومىرگە سىنالۋ ءۇشىن كەلەدى. ال، سىن مىندەتتى تۇردە قيىندىعىن الا كەلەدى. الايدا، ادامداردىڭ سىنالعانى ەمەس، سول سىندى قالاي وتكەرگەنى ماڭىزدى.