ءۇندىنىڭ قاي فيلمدەرىن الىپ قاراساق تا، ايەلدەرى كۇيەۋلەرىنىڭ استى-ۇستىنە ءتۇسىپ جاتادى. كۇيەۋى اۋىرىپ قالسا، اۋىز بەكىتەدى، اتىمەن اتامايدى، سەبەبى داۋىستاپ اتىن اتاسا، كۇيەۋىنىڭ ءومىرى قىسقارادى دەگەن تۇسىنىك بار ەكەن ءۇندىستاندا. ەشقاشان دا كۇيەۋىمەن قاتار جۇرمەيدى، ءبىر قادام ارتتا جۇرەدى. «ءسىز» دەپ سويلەيدى، اياعىن ءجيى جۋىپ تۇرادى. فيلمدەردەن قارايسىڭ دا، نەتكەن ماحاببات، نەتكەن سىيلاستىق دەپ قالاسىڭ. ال شەتەلدىك باق-تىڭ مالىمەتىنشە، مۇنداي قامقورلىقتىڭ استارىندا ماحاببات جاتقان جوق، ءبارى «اق جەسىر» اتانۋدان قورىققان ايەلدەردىڭ ارەكەتى ەكەن.

نەكە ينستيتۋتى جانە پاتريارحالدى ءداستۇر

«اق جەسىر» ءداستۇرى ساقتالعان ءۇندى شتاتىنىڭ تۇرعىندارى وتباسىندا قىز بالا دۇنيەگە كەلسە، وعان دەرەۋ كۇيەۋ جىگىت ىزدەستىرەتىن كورىنەدى. ال قىز 6-7 جاسقا تولعاندا، ءدال تۇرمىسقا شىعاتىن ۋاقىتى كەلەدى ەكەن. كۇيەۋىنىڭ نەشە جاستا بولاتىنى ماڭىزدى ەمەس.

قىزدى تۇرمىسقا بەرگەن وتباسى تەرەڭىنەن دەمالىپ، اۋىر جۇكتەن، ازاپتان قۇتىلعانداي كۇيدە بولادى. قالىڭدىق پەن كۇيەۋ جىگىت ءبىرىن-بىرى العاش رەت تەك تويدا كورەدى.

ءسويتىپ بۇلدىرشىندەرىڭ وتباسىلىق ءومىرى باستالىپ كەتەدى. كۇيەۋ دەگەن جەردەگى قۇداي، كۇيەۋ دەگەن تاعدىر، كۇيەۋ دەگەن ايەلدىڭ بارى، ول ادام ەمەس، ايەل ءۇشىن ەرەكشە تۇلعا. ايەلى كۇيەۋىن جاقسى كورمەسە دە، وعان دەگەن «جوق» ماحابباتىن ۇنەمى كورسەتىپ تۇرۋى ءتيىس، كوڭىلىن كوتەرۋ كەرەك.

«اق جەسىرلەر»

جوعارىدا ايتىپ وتكەنىمىزدەي، كۇيەۋى مەن ايەلىنىڭ جاس ايىرماشىلىقتارى ماڭىزدى ەمەس. ايەلىنىڭ جاسى 6-دا، كۇيەۋى 20-دا، نە 30-دا بولۋى مۇمكىن. ارينە، مۇنداي جاعدايدا ەرتە قارتايعان كۇيەۋى ايەلدەن بۇرىن قازا تابادى. ال كۇيەۋى دۇنيەدەن وتكەن ءۇندى ايەلى «اق جەسىر» اتانادى. اق جەسىرلەر – تىنىش ومىردەن باز كەشكەندەر.

الدىمەن جەسىرلەردىڭ شاشىن قىسقارتادى، ۇستىلەرىنە اق ساري كيەدى. اق ءتۇستى ساريدەن وزگە كيىم كيۋگە تىيىم سالىنادى. كوزدىڭ جاۋىن الاتىن القالارىمەن جارقىراپ جۇرگەن ءۇندى قىزدارى «اق جەسىر» اتانعان سوڭ ءبارىن دە ۇمىتادى، كوڭىل-كوتەرۋ، قوعامدىق ورتادا ءجۇرۋ، قىدىرۋ، ءان ايتۋ، جالپى قۋانۋ – ولار ءۇشىن ارماندا قالعان دۇنيەلەر.

كۇنىنە ءبىر ۋاقىت تاماقتانادى، ءتاتتى جەۋگە تىيىم سالىنعان. ادامدار ءتىپتى ولاردىڭ كولەڭكەسىنەن قورىققان، ۇيلەرىنىڭ ماڭىنا جولاتپاعان، باقىتسىزدىق اكەلەدى دەپ تۇسىنگەن. اق جەسىرلەر كوبىنە كوشە كەزىپ، قايىر تىلەپ جۇرەدى.

قاسيەتتى ۆرينداۆان قالاسى – جەسىرلەردىڭ مەكەنى

جەسىرلەردىڭ كوبى قاسيەتتى ۆرينداۆان قالاسىنا اتتانادى، ول جەردە جەسىرلەر مۇنداي قورلىق كورمەيدى.

قالداعى «اشراما» دەپ اتالاتىن جاتاقحانالار وتباسىنان قاشىپ كەلگەن «اق جەسىرلەرگە» ارنالعان. جاتاقحانادا جەسىرلەر ەرىكتىلەردىڭ كومەگىنە جۇگىنەدى، تىگىن تىگەدى، قۇدايعا سىيىنادى. ەرىكتىلەر جەسىرلەرگە قامقورلىق تانىتادى، كيىندىرەدى، تاماقتاندىرادى، تولىققاندى ءومىر سۇرۋلەرىنە مۇمكىندىك بەرەدى.

بۇگىندە ءۇندىستاندا ايەلدەردىڭ قۇقىعىن قورعايتىن ورتالىقتار اشىلدى. جەسىر قالعان، وتباسى بولەكتەگەن، كۇيەۋىنەن وپىق جەگەن ءۇندى ايەلدەرى سونداي ورتالىقتارعا جۇگىنەدى. الايدا، ناتيجەسى وڭتايلى بولار ەمەس. «بۇل تەك باستاماسى عانا» دەيدى ورتالىق قىزمەتكەرلەرى.

شولۋشى: سابينا رامازان