24-25 كۇندەرى الماتى قالاسىنداعى «بورالداي» ارحەولوگيالىق پاركىندە «ۇلى دالا رۋحى-2017» حالىقارالىق ەتنوفەستيۆالى وتەدى دەپ جازادى قامشى اقپاراتتىق اگەنتتىگى.
فەستيۆالعا الەمنىڭ 10 ەلى قاتىسادى. باستى ماقساتى – قازاقستاندىقتار مەن شەت ەلدىك قوناقتارعا كوشپەندىلەر مادەنيەتىن، قازاقتىڭ ەجەلگى تاريحى مەن ءسالت-داستۇرىن كورسەتۋ.
باعدارلامانىڭ اۋقىمى كەڭ. ەكى كۇنگە سوزىلاتىن فەستيۆال ۋاقىتتى كەرى اينالدىرىپ، وتكەن تاريحقا ساياحات جاساتادى.
«ۇلى دالا رۋحى-2017» ەكىنشى حالىقارالىق فەستيۆالدا:
*قاز-قاتار تىگىلگەن ون ەكى قاناتتى اقشاڭقان 60 ءۇي
*كوشپەندىلەر شەرۋى
*10 مەملەكەتتەن كەلگەن ات قۇلاعىندا وينايتىن شاباندوزداردىڭ سان ءتۇرلى ونەرى
*ەڭ ۇزدىك ەتنومۋزىكانتتار
*كوكپار
*اۋدارىسپاق
*قىز قۋۋ
*اساۋعا تۇساۋ سالۋ
*قول ونەرشى مەن شەبەرلەردىڭ، ۇستالاردىڭ ونەرى
*بالالار الاڭى
*التىباقان
*كۇي تارتىس
*قىران قۇس
*قۇماي-تازى ت.ب .ۇلتتىق قۇندىلىقتار مەن اتا-بابا مۇراسى
*تۇنگى الاۋ باسىنداعى ويىندار مەن مۋزىكا
سونداي-اق، كورەرمەندەر اراسىنان «ەڭ ادەمى ۇلتتىق كيىم»تاڭدالىپ، ءتۇرلى ۇلتتىق ويىندار وينالىپ، سان-الۋان سايىستار ۇيىمداستىرىلادى! ىستىق باۋىرساق پەن ۇلتتىق تاعامداردان ءدام تاتاسىز!
تاقىرىپقا بايلانىستى سەكتورلار جۇمىس ىستەيدى. ماسەلەن، «المالى» اتتى قولونەرشىلەر اۋىلىندا شەبەرلىك ساباقتارى وتكىزىلەدى. كورەرمەندەر تەك تاماشالاپ قانا قويماي، ماماننىڭ كومەگىمەن سازدان قۇمىرا جاساپ كورەدى. ال «شابىت» مۋزىكانتتار اۋىلىندا بايقاۋ ۇيىمداستىرىلادى. كورەرمەندەر ءتۇرلى اسپاپتاردا ويناپ، باقتارىن سىنايدى، ۇلتتىق تاعامداردان ءدام تاتىپ، جاساۋ قۇپياسىمەن تانىسادى، كاسىبي بۇركىتشىلەر مەن پالۋانداردىڭ ونەرىن تاماشالايدى. وسىلايشا، كەلگەن كورەرمەندەر، مەيماندار كوشپەندىلەر ءومىرىن ءوز كوزدەرىمەن كورىپ، تۇرمىسىمەن تانىسادى. سونداي-اق، كورەرمەندەر اراسىنان «ەڭ ادەمى ۇلتتىق كيىم» تاڭدالىپ، سىيلىق بەرىلەدى.
فەستيۆالعا كىرۋ تەگىن.
وتەتىن ورنى: الماتى قالاسى، الاتاۋ اۋدانى، «بورالداي» ارحەولوگيالىق پاركى. تۇرعىنداردى جەتكىزۋ جاعى دا قاراستىرىلعان. «ورتالىق ستاديون» ايالداماسى مەن «الاتاۋ» ءداستۇرلى ونەر تەاترىنىڭ جانىنان ءار ساعات سايىن ارنايى اۆتوبۋستار جۇرەدى.
بۇل – ءسىز بەن ءبىزدىڭ تاريحىمىز! ۇلى دالا رۋحىن كوتەرۋگە ءسىز دە اتسالىسىڭىز!
پىكىر قالدىرۋ