قاراشادا ءبىر اۋىل بار، ايتارى كوپ.
قولدى بولعان نەسىبەنىڭ قايتارى جوق.
جالدانىپ ءوز جەرىڭدە جالشى بولساڭ،
جىلاعاننان «جالشى ءۇيىنىڭ» جايدارى جوق.
جالشىنىڭ جەگەنىدە جارىم ىرىس
ايدايتىن مالى باردا، «باعارى» جوق.
ساراڭ بايدان، سارى مايدا بۇيىرماسا،
بۇيىرماستىڭ قازانىنىڭ قاينارى كوپ.
اقشا ءۇشىن بيشىگى ماقتاۋ ايتسا، 
اللا ءۇشىن اقيقاتتى ايتارى جوق
قاراشادا «باتىر» بار، سويىلى جوق.
باسىنعان «بايلارىنىڭ» تويىمى جوق.
«جاعىمپازدىڭ» جاعىنا جىلان قونار،
«بيشىكتەردىڭ» بەرەكەسىز، جيىنى كوپ.
ءسوز تۇبىنەن شىندىققا شىرماۋ بولسا،
اتا زاڭدى بۇرمالار، ويىنى كەپ.
تۋرا سوزدەن اينىسا «تورەلەرى»
ادامزاتتان «ار» بەزەر، قايىرى جوق.
قاراشادا ءبىر ءۇي بار اۋ، ەسىگى كوپ. 
 ەسىگى كوپ، توسەگى «لاڭ» بەسىگى جوق.
جەل كەتپەس، ەتەك اشىپ، شاشىن جايسا،
جەسىرى جوق ەلىنىڭ، جەتىمى كوپ.
قاراشادا ءبىر ءۇي بار اۋ، تەنگەسى كوپ.
تويلارى كوپ، اعايىنعا بەرگەنى جوق.
شالدارى شاراپ ءىشىپ شالبار شەسسە، 
جەلىكەننەن جەرگە اۋنار، جەڭگەسى كوپ.
قاراشادا ءبىر اۋىل با اۋ، جازارى كوپ.
جىلاعان قاراشانىڭ اجارى جوق.
ساۋاتتى دا، ساقالدى دا، ساۋدا دا ءجۇر،
ساناسى از، ساۋابى جوق، بازارى كوپ.
تالاپتى دۇنيەمەن مالعا قويسا،
ادامنىڭ جاقسىسى از، ازارى كوپ.
ادامدا اقشا قۇرلى قۇن بولماسا. 
قۋ دۇنيەنىڭ پەرىشتەدەن، تاجالى كوپ.
قاراشادا ءبىر ەل بار اۋ، جەرلەرى كوپ.
ەركەگى بار، جەر قورعار «ەرلەرى» جوق.
ەل باسقارار «ەرسىماعى» ەسسىز بولسا، 
ەڭىرەگەن ەلدىڭدە كەرەگى جوق.
ەسەرسوعى ەلەرىپ، تەڭگە تەرسە،
تەلمىرگەن ەلىنە دە بەرەرى جوق.
قاراشانىڭ «ۇلدارى» بار، «مەرگەنى» جوق.
ەرىككەن ەرتەلى كەش، ەرمەگى كوپ.
توپ باستايتىن «سەركەرلەرى» «سەلت» ەتكەندە،
سەركەلەردىڭ ارتىنان ەرەرى جوق.
قالاي عانا قاراشا قايعىرماسىن،
العانىنان «ۇرىعا» بەرگەنى كوپ. 
..................................................................................
بيلىك پەنەن بايلىقتىڭ بەرەرى كوپ.
«اتاق» ، «ءمانساپ» باسقا كورەرى جوق.
تاعىڭ التىن، «قىرىق قاتىنىڭ» بولساداعى،
اقىرەتتە «امالدان» باسقا ەرەرى جوق.
جەتىلمەگەن جەتىمدى، «جەبەۋشى» كوپ.
جەتىمنىڭ كوز جاسىمەن «جەبەسى وق».
قارعىسى قاراشانىڭ قاتتى بولسا،
جانازاڭدا «قىرىق مولدانىڭ» كەرەگى جوق.
....................................................................................
قاراشادا ءبىر ەل بار اۋ، بىرلىگى جوق. 
بىرلىگى جوق، كۇندە كۇيبەڭ، تىرلىگى كوپ.
كۇندەس بولىپ اڭدىسقان اعايىننىڭ،
ەركەگى «ەز» بولادى، ەرلىگى جوق.
التى الاشقا التى كۇندە اقىل كىرسە،
ارىستارى اتقا قونار تىرەگى بوپ.
اتا – بابا ءارۋاعى ءوزى قولدار،
بىرلىگى بار ەلىنىڭ، تىلەگى كوپ.

اۆتورى: كەنجەبەك جاقسىلىق ۇلى