مۇنداي كەلىسىمگە «قازاقستان حالىق بانكى» اق مەن «دامۋ» قورى اراسىندا قول قويىلدى. ەندى دامۋ بليس تەحنولوگياسى مولشەرلەمەسى 8،5 پايىزدان اسپايتىن بارلىق وڭىرلىك قارجىلاندىرۋ باعدارلامالارىنا ەنگىزىلەتىن بولادى دەپ حابارلايدى Qamshy.kz اقپارات اگەنتتىگى.   

«حالىق بانكىنىڭ دامۋ بليس تەحنولوگياسىنا قوسىلعانىنا قۋانىشتىمىز. مۇنىمەن قاتار بانك «دامۋ» قورىنىڭ باعدارلاماسىمەن شەكتەلىپ قالماي، شاعىن جانە ورتا بيزنەسكە نەسيە بويىنشا جىلدام شەشىم كەرەك ەكەنىن ەسكەرە وتىرىپ، نارىققا ءوز ءونىمى – «حالىق كاسىپكەر-35» جوباسىن دا شىعاردى. بۇل ءبىزدىڭ ماقساتىمىزبەن ۇندەس. ءقازىر نارىقتا باسەكەلەستىك جوعارى. بۇل تايتالاستا جىلدام ارەكەت ەتەتىن بانكتەر وزادى»،-دەدى «دامۋ» قورى باسقارما ءتوراعاسىنىڭ ورىنباسارى نۇرلان اقشانوۆ. 

«دامۋ بليس» تەحنولوگياسى 2016 جىلى قاڭتار ايىندا الماتى مەن الماتى وبلىسىندا  «بانك KassaNova» اق، «الفا بانك» اق جانە «بانك استانى» اق ارقىلى قاناتقاقتى جوبا رەتىندە ەنگىزىلگەن ەدى.  بۇل – «جىلدام نەسيە» بەرۋدىڭ جاڭا تەحنولوگياسى. نەگىزىنەن وڭاي راسىمدەپ، 7 كۇنگە جەتپەيتىن ۋاقىت ىشىندە قارجىنى قولعا تيگىزەدى. بۇل تەحنولوگيا بويىنشا جۇمىس ىستەيتىن بارلىق مەنەدجەرلەر كونسالتينگتىك كومپانيادا ارنايى سەميناردان وتكەن.

نەسيە تۇرلەرى:

ميكرو كرەديت – قازاقستاننىڭ وڭىرلەرى ءۇشىن 30 ملن تەڭگەگە دەيىن، استانا مەن الماتى ءۇشىن 60 ملن تەڭگەگە دەيىن بەرىلەدى. ينۆەستيسيا ءۇشىن 84 ايعا دەيىن، اينالىم قاراجاتىن تولتىرۋعا 36 ايعا دەيىن. كەم دەگەندە 6 اي جۇمىس ىستەپ تۇرعان بيزنەس بولۋى كەرەك.

ستارت كرەديت - 20 ملن تەڭگەگە دەيىن بەرىلەدى. ينۆەستيسيا ءۇشىن 84 ايعا دەيىن، اينالىم قاراجاتىن تولتىرۋعا 36 ايعا دەيىن بەرىلەدى. بيزنەستىڭ تىركەلگەنىنە 36 ايدان اسپاۋى كەرەك.

ەكى نەسيە بويىنشا دا ماقۇلداۋ ۋاقىتى ەكىنشى دەڭگەيلى بانككە ءوتىنىم بەرگەن ۋاقىتتان باستاپ 7 جۇمىس كۇنىنەن اسپايدى.

قازىرگى كەزدە دامۋ بليس تەحنولوگياسى 15 وڭىردەگى ەكىنشى دەڭگەيلى 14 بانكتە قولدانىلىپ كەلەدى. سالىنعان قاراجاتتىڭ جالپى سوماسى 29 ملرد تەڭگەگە جەتتى. بۇگىندە جالپى قۇنى 1،5 ملرد تەڭگە بولاتىن 116 جوبا ماقۇلدانعان.