رەسەي پرەزيدەنتى ۆلاديمير ءپۋتيننىڭ مالىمدەۋىنشە، ماسكەۋ امەريكانىڭ وزىنە قارسى ۇيىمداستىرىلىپ جاتقان سانكسيالارىنا سابىرلىق تانىتىپ كەلدى، الايدا «شىدامنىڭ دا شەگى بار».

ونىڭ سوزدەرىنە قاراعاندا، ماسكەۋ اتالمىش زاڭناما ناقتى قابىلداعان سوڭ ءوزىنىڭ جاۋابىن مىندەتتى تۇردە بەرەدى، دەپ جازادى Qamshy.kz اقپارات اگەنتتىگى.

وتكەن بەيسەنبىدە اق ءۇيدىڭ كوممۋنيكاسيا جونىندەگى دەپارتامەنت جەتەكشىسى ەنتوني سكارامۋچچي پرەزيدەنت دونالد ترامپتىڭ زاڭناماعا ۆەتو قويۋى مۇمكىن ەكەنىن ايتقان. الايدا ونىڭ تۇبىندە رەسەيگە قارسى ودان دا سوراقى شارالاردىڭ جۇرگىزىلەتىنىن ەسكەرتتى.

بۇدان بۇرىن رەسەيلىك «كوممەرسانت» باسىلىمى زاڭناما قابىلدانعان جاعدايدا اتالمىش ماسەلەگە  ءوز بولجامدارىن جاساپ كوردى. باسىلىمنىڭ مالىمدەۋىنشە، زاڭ ماقۇلدانسا، ماسكەۋ 35 امەريكالىق ديپلوماتتى بوساتادى، سونداي-اق اقش-تىڭ رەسەيدەگى ەلشىلەرىنىڭ سانىن قىسقارتادى.

2016 جىلدىڭ جەلتوقسانىندا امەريكا بيلىگى 35 رەسەيلىك ديپلوماتتى جىبەرىپ، نيۋ-يورك پەن مەريلەندەگى ەكى ەلشىلىكتى جاپقان بولاتىن. ونىڭ سەبەبى، رەسەيدىڭ امەريكاداعى سايلاۋعا ارالاسۋى مەن امەريكالىق ديپلوماتتارعا قىسىم جاساۋى.