اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا اكەسى مەن ءىنىسىن ولتىرگەن مەدەت تاپايەۆقا قاتىستى قىلمىستىق ءىس قارالىپ جاتىر. ول ىشىمدىك ءىشىپ، ءبىر كۇندە اكەسى مەن ءىنىسىن پىشاقتاپ ولتىرگەن، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

سوتتالۋشى مەدەت تاپايەۆ بۇرىن ءىستى بولعان. ءتىپتى 12 جىلعا باس بوستاندىعىنان ايىرۋ جازاسى تاعايىندالىپ، كەيىن مەرزىمىنەن بۇرىن شارتتى تۇردە بوستاندىققا شىعارىلعان. ءىس ماتەريالدارىنا سۇيەنسەك، مەدەت تاپايەۆ وسى جىلدىڭ ءساۋىر ايىندا اقتوبە قالاسىندا تۇراتىن اتا-اناسىنىڭ ۇيىنە بارىپ، ازاماتتىق نەكەدەگى جۇبايىنا تاماق ءپىسىرۋدى بۇيىرادى. كەيىن اتا-اناسى مەن باۋىرلارىنىڭ ۇيىقتاپ جاتقانىنا قاراماستان ولاردىڭ تىنىشتىعىن بۇزىپ، جۇبايىن بالاعاتتاعان. وسى كەزدە اكەسى سەرىك تاپايەۆ ويانىپ كەتىپ، «ىشىمدىك ىشكەنشە، تابىس تاۋىپ، وتباسىڭدى اسىرا» دەپ ۇلىنا ۇرىسىپ، ونى كوسەۋمەن ۇرادى. سول كەزدە اشۋعا بۋلىققان سوتتالۋشى مەدەت تاپايەۆ اكەسىنە پىشاق الا جۇگىرەدى. اكە مەن بالا اراسىنداعى جانجالعا ءىنىسى ماناس تاپايەۆ ارالاسىپ، اعاسىن توقتاتپاق بولعان ول بىرنەشە دەنە جاراقاتىن الادى. ءىنىسىن پىشاقتاپ، كەيىن شاينەكپەن باسىنان ۇرىپ، مەرت قىلادى. سول كۇنى وقيعا ورنىندا سەرىك تاپايەۆ قازا بولىپ، ءىنىسى ماناس تاپايەۆ ارادا 5-6 ساعات وتكەندە اۋرۋحانادا ەسىن جيماستان كوز جۇمدى. بۇل وقيعانىڭ ءبارى اناسىنىڭ، قارىنداسىنىڭ، ازاماتتىق نەكەدەگى ايەلىنىڭ كوز الىندا بولعان.

«ەكى ازاماتىمدى ءولتىردى. پىشاقتاپ، شاينەكپەن ۇردى. ۇلىم ماناستىڭ ارتىندا ەكى بالاسى قالدى. نەمەرەم اكەسىن سۇرايدى. ءبىز «جۇمىستا» دەپ الداپ كەلەمىز. مەدەتتى كەشىرمەيمىن. جاۋىزدىقپەن كوز الدىمدا ءولتىردى عوي. كەشىرىم جوق. ماڭگىلىككە كەتسىن، كوزىمە كورىنبەسىن. ءبىز قورقىپ، ۇرەيلەنىپ وتىرامىز»،- دەدى سوتتالۋشىنىڭ اناسى، جابىرلەنۋشى ر.تاپايەۆا.

ايتا كەتەيىك، مەدەت تاپايەۆ قىلمىستىق كودەكستىڭ «ادام ءولتىرۋ» بابى بويىنشا ايىپتالىپ جاتىر. مەملەكەتتىك ايىپتاۋشى ءجارىسسوز كەزىندە م.تاپايەۆتى 23 جىلعا باس بوستاندىعىنان ايىرۋ جازاسىن سۇرادى. ونى ءماجبۇرلى تۇردە ىشىمدىكتەن ەمدەتىپ، قاۋىپتىلىگى توتەنشە تۇزەۋ مەكەمەسىندە جازاسىن وتەۋدى سۇرادى.