الماتى كوپسالالى كلينيكالىق اۋرۋحاناسىندا دارىگەرلەر 1931 جىلى تۋعان، 95 جاستاعى ناۋقاسقا بىرەگەي جوعارى تەحنولوگيالىق وتا جاسادى. وعان اورتالىق قاقپاقشا ترانسكاتەتەرلىك ادىسپەن (TAVI) اۋىستىرىلدى. ەڭ باستىسى — وپەراسيا كەۋدە قۋىسى اشىلماي، جۇرەك توقتاتىلماي جۇرگىزىلدى.

اورتالىق ستەنوز – ەگدە جاستا ءجيى كەزدەسەتىن ءارى ومىرگە ءقاۋىپتى دەرتتەردىڭ ءبىرى. بۇل اۋرۋ ۋاقىتىندا ەمدەلمەسە، جۇرەك جەتكىلىكسىزدىگىنە اكەلىپ، ناۋقاستىڭ ءومىرىن قىسقارتادى. ال 90 جاستان اسقان ادامدارعا ءداستۇرلى اشىق وپەراسيا جاساۋ وتە ءقاۋىپتى.

وسىنى ەسكەرگەن دارىگەرلەر ناۋقاسقا ەڭ ءقاۋىپسىز ءارى ءتيىمدى ءادىستى — از ءينۆازيۆتى TAVI تەحنولوگياسىن تاڭدادى.

بۇل ءادىس كەزىندە جاڭا قاقپاقشا سان ارتەرياسى ارقىلى ەنگىزىلگەن جۇقا كاتەتەردىڭ كومەگىمەن جۇرەككە جەتكىزىلەدى. ياعني، كەۋدە سۇيەگى كەسىلمەيدى جانە جاساندى قان اينالىمى اپپاراتى قولدانىلمايدى. مۇنداي ءتاسىل اسىرەسە جاسى ۇلكەن ناۋقاستار ءۇشىن اسا ماڭىزدى.

TAVI ءادىسىنىڭ نەگىزگى ارتىقشىلىقتارى:

•اعزاعا تۇسەتىن جۇكتەمەنىڭ از بولۋى

•تەز قالپىنا كەلۋ

•اۋرۋحانادا جاتۋ مەرزىمىنىڭ قىسقارۋى

•وپەراسيالىق تاۋەكەلى جوعارى ناۋقاستارعا مۇمكىندىك بەرۋ

انگيوحيرۋرگ ارمان سادىقوۆتىڭ ايتۋىنشا، وپەراسيا ءساتتى وتكەن:

«ناۋقاستىڭ جاسى – ۇلكەن ءقاۋىپ فاكتورى. سوعان قاراماستان، قازىرگى مەديسينانىڭ مۇمكىندىكتەرى بىزگە وسىنداي كۇردەلى جاعدايلاردا دا ءتيىمدى كومەك كورسەتۋگە جول اشادى. TAVI – بۇل اۋىر وپەراسياسىز ءومىر سۇرۋگە بەرىلگەن مۇمكىندىك. ءبىز جاقسى ناتيجەگە قول جەتكىزدىك».

ال باسقارۋشى كومپانيانىڭ باس ديرەكتورى جۇماعالي يسمايلوۆ مۇنداي وتالاردىڭ ماڭىزدىلىعىنا توقتالدى:

«بۇل – وتاندىق مەديسينانىڭ دەڭگەيىن كورسەتەتىن ناقتى ناتيجە. ءبىزدىڭ ماقسات – پاسيەنتتىڭ جاسىنا قاراماي، بارلىعىنا ساپالى ءارى ءقاۋىپسىز مەديسينالىق كومەك قولجەتىمدى بولۋى».

ناۋقاستىڭ تۋىستارى دا دارىگەرلەرگە العىسىن ءبىلدىردى:

«ءبىز مۇنداي جاستا وسىنداي وتا جاساۋعا بولادى دەپ ويلامادىق. دارىگەرلەرگە كاسىبيلىگى مەن جاناشىرلىعى ءۇشىن، جاقىنىمىزدىڭ ءومىرىن ۇزارتقانى ءۇشىن شىن جۇرەكتەن العىس ايتامىز».

بۇگىندە TAVI – جۇرەك قاقپاقشاسى اۋرۋلارىن ەمدەۋدەگى ەڭ زاماناۋي ءارى ءتيىمدى ادىستەردىڭ ءبىرى. ول ەگدە جاستاعى ناۋقاستارعا جاڭا مۇمكىندىك بەرىپ، ولاردىڭ ءومىر ساپاسىن جاقسارتۋعا جول اشادى.