بۇگىن، ماسكەۋ قالاسىندا  ەلشىلىكتىڭ مۇرىندىق بولۋىمەن ەلىمىزگە  تەڭدەسى جوق اقىن سارا بەينەسىن سومداعان قىلقالام  تۋىندىلارى مەن مۇسىنشەلەرى جىبەرىلدى. بۇل تۋرالى Qamshy.kz اقپارات اگەنتتىگى قازاقستاننىڭ رەسەيدەگى ەلشىلىگىنە سىلتەمە جاساپ حابارلايدى.

12 تۋىندىنىڭ اۆتورى - 1907- 2005 جىلدار ارالىعىندا ءومىر سۇرگەن رەسەيلىك ءمۇسىنشى، ارحيتەكتور مارگاريتا ۆاششەنكو.  ول الماتى وبلىسىندا ەڭبەك ەتكەن 1955-1960 جىلدار ارالىعىندا وسى سۋرەتتەردى سومداعان.  قۇندى تۋىندىلارمەن بىرگە ونەر يەسىنىڭ قازاقستاندا ەڭبەك ەتكەن جىلدارى جينالعان ارحيۆ قۇجاتتارى، حاتتار مەن گازەت ۇزىندىلەرى جولداندى.

مارگاريتا ۆاششەنكو، قازاقستاندا ەڭبەك ەتكەن جىلدارى الماتى وبلىسى اقسۋ اۋدانىنىڭ جانسۇگىروۆ جانە كوشكەنتال اۋىلدارىندا اقىن سارانىڭ مۇسىندەرىن، جانسۇگىروۆ اۋىلىندا يلياس جانسۇگىروۆتىڭ ءمۇسىنىن جانە تالدىقورعان وبلىستىق مۇراجايىندا عاني مۇراتبايەۆتىڭ بەينەسىن تاسقا تۇسىرگەن اتاقتى ارحيتەكتور.

وسى كۇنگە دەيىن سۋرەتتەر توپتاماسىن كوزدىڭ قاراشىعىنداي ساقتاپ كەلگەن گەليا تيموفەيەۆا،  بۇل انامنىڭ ماعان قالدىرعان اماناتى، سونى بۇگىن ورىنداۋدىڭ رەتى ءتۇستى دەيدى.  

"ناق-بىرلىك" قوعامدىق ۇيىمنىڭ ءتورايىمى، الماتى وبلىسى انالار القاسىنىڭ مۇشەسى سالتانات مەڭلىبايەۆانىڭ ايتۋىنشا، اقىن سارانىڭ عاسىرلىق تويىن تويلاعان كەزدە گەليا تيموفەيەۆا اناسىنىڭ قالدىرىپ كەتكەن مۇراسىن سىيعا تارتپاق نيەتىن حاتى ارقىلى بىلدىرگەن. سول كەزدەن بەرى گەليا اپايمەن حات جازىسىپ كەلگەن قوعام باسشىسى، ەندى  قۇندى مۇرالار الماتى وبلىسى  اقسۋ اۋدانى  قاپال اۋىلىندا ورىن تەپكەن  اقىن سارانىڭ مۇراجايىندا ساقتالاتىنىن ايتادى.

گەليا تيموفەيەۆانىڭ ايتۋىنشا، اناسى سارا اقىننىڭ بەينەسىن تۋعاندارى مەن جاقىندارىنىڭ سۋرەتتەۋىنشە قاعاز بەتىنە تۇسىرگەن ەكەن.

ەستەرىڭىزگە سالا كەتەيىك، سارا  تاستانبەك قىزى (1853-1907) – اتاقتى سۋىرىپ سالما اقىن، ءسوز مايتالمانى، ايتىس ونەرىنىڭ قايتالانباس شەبەرى. الماتى وبلىسىنىڭ قاپال اۋدانىندا دۇنيەگە كەلگەن.

1906 جىلى ويلاماعان جەردەن نايمان ەلىن ارالاپ، سەرىلىك جاساپ جۇرگەن اتاقتى ءبىرجان سالمەن كەزدەسىپ، شارشى توپتىڭ الدىندا ونىمەن ايتىسۋى ۇلكەن سەبەپشى بولادى.

سارا تاستانبەك قىزىنىڭ ءبىرجان سالمەن ايتىسى عاسىردان عاسىرعا ۇزىلمەي جالعاسىپ كەلە جاتقان قازاقتىڭ ايتىس ونەرىنىڭ شوقتىعى بيىك، كوركەم ۇلگىسى بولىپ سانالادى. سوزگە تاپقىرلىعىمەن، كەسىپ ايتار شەشەندىگىمەن ەلدى سۇيسىنتكەن، ايتىس ونەرگە ابدەن توسەلگەن سارا ارسالاڭ، نيازبەك سال، ت.ب. اقىنداردى ونەر جارىسىندا جەڭگەن.