قاپشاعايداعى «ساۋلە» دەمالىس ايماعىندا ەكى جىگىت سۋعا باتىپ كەتتى. بۇل جايىندا ساعات 17:00 شاماسىندا سۋعا كەتكەن جىگىتتەردىڭ ارىپتەستەرى وپەراتيۆتى-قۇتقارۋ قىزمەتىنە حابارلاعان، دەپ جازادى Qamshy.kz اقپارات اگەنتتىگى Patrul.kz سايتىنا سىلتەمە جاساپ.

قۇتقارۋشىلار توبى وقيعا ورنىنا دەرەۋ جەتىپ، جەتى سۇڭگۋىر جان-جاققا ءبولىنىپ، ولاردىڭ دەنەسىن ىزدەي باستادى.

قۇتقارۋشىلار ەكى جىگىتتى ىزدەۋ بارىسىندا جاعاجايدا دەمالىپ جاتقان وزگە ادامداردىڭ بارلىعىنا سۋعا تۇسپەۋگە ەسكەرتۋ جاسالدى. كۋاگەرلەردىڭ ايتۋىنشا، ەكى جىگىت ەسكەرتۋدى تىڭداماي، رەزەڭكە قايىقتا ءجۇزىپ كەتكەن ەكەن. ولار شامامەن 300 مەترگە دەيىن ءجۇزىپ بارىپ، سۋعا سەكىرگەن، ال قايىق سول ساتتە اعىسپەن ولاردان ۇزاپ كەتكەن كورىنەدى.

21 جانە 20 جاستاعى ەكى جىگىتتىڭ شامامەن باتىپ كەتكەن جەرىنە كۋاگەرلەر جاقىنداپ، بوتەلكەمەن بەلگىلەپ كەتكەن. سونىمەن قاتار، ەكى جىگىت باتىپ بارا جاتقان كەزدە ءبىر ەر ادام سكۋتەرمەن ولاردىڭ جانىنا بارىپ، ءبىر اينالىپ، ارى قاراي ءوز جولىمەن ءجۇرىپ كەتە بەرگەن.

ىزدەۋ جۇمىستارى باستالعاننان سوڭ 20 مينۋتتان كەيىن جاندوس قۇماربەكوۆ ەسىمدى سۇڭگۋىر 4 مەتر تەرەڭدىكتە جاتقان ءمايىتتى بايقاعان. سۋدىڭ تۇنىق ەمەستىگىنە قاراماستان، جاندوس سۋدىڭ تۇبىنە دەيىن بارىپ، الماتىلىق جىگىتتىڭ دەنەسىن الىپ شىققان.

كەيىننەن، شامامەن ەكى ساعات وتكەننەن سوڭ جاندوس قۇماربەكوۆ تاعى ءبىر ادامنىڭ دەنەسىن كورىپ، الىپ شىققان. بەلگىلى بولعانداي، ول سۋعا باتىپ كەتكەن ەكىنشى جىگىت ەكەن.

قۇتقارۋشىلاردىڭ ايتۋىنشا، سۋعا تۇسۋگە كەلگەن ادامدار كوبىندە ەسكەرتۋلەرگە ءمان بەرمەي، بەلگىلەنگەن ايماقتان اسىپ كەتىپ جاتادى. سالدارىنان كوپشىلىگى زارداپ شەگىپ، قايعىلى وقيعالار كوپتەپ ورىن الادى ەكەن. بيىلعى جازدا قاپشاعايدا 15 ادام سۋعا باتىپ، كوز جۇمعان.