«قازاقستان» ۇلتتىق ارناسىندا قوعامدىق ماسەلەلەردى تالقىلاپ، ءتۇيىنىن ىزدەيتىن باعدارلامالاردىڭ ءبىرى «ايتۋعا وڭاي» اياقتالدى دەپ حابارلايدى Qamshy.kz اقپارات اگەنتتىگى. تامىزدىڭ سوڭىنا دەيىن قايتالاۋلار بەرىلەدى. بۇل تۋرالى باعدارلاما جۇرگىزۋشىسى، جۋرناليست بەيسەن قۇرانبەك ءوزىنىڭ فەيسبۋكتەگى پاراقشاسىندا مالىمدەدى.

«بەس جىلدىڭ ىشىندە قوعامداعى قوردالانعان پروبلەمالار، قيۋى كەتىپ تۇرعان الەۋمەتتىك-تۇرمىستىق ماسەلەلەر، تالايلى تاعدىرلار تۋرالى ايتۋداي-اق ايتتىق. ءجاي عانا ايتىپ قويماي، قولدان كەلگەنشە سۇرىنگەنگە – سۇيەۋ، جىعىلعانعا – جاستىق بولدىق.

وسىلاي جالعاستىرا بەرسەك تە بولاتىن ەدى. قالىپتاسقان ەلدىڭ كوڭىلىنەن ورىن تاپقان برەند، فورماتتى ارى قاراي دا قولدانا بەرۋگە بولاتىن ەدى. ءبىراق ءار نارسەنىڭ ۋاقىتى بار، ءار نارسەنىڭ ولشەمى بار. ودان كەيىن قايتالاۋ، ۇساقتالۋ، كەرى كەتۋ باستالاتىنى بەلگىلى.

جەكە ءوزىم ءۇشىن دە بۇل شەشىم وڭايعا تۇسكەن جوق. قۇداي ءومىر بەرسە، ساعىنىشپەن ەسكەن الاتىن ءبىر كەزەڭ ارتتا قالىپ بارادى. مەن ءۇشىن «ايتۋعا وڭاي» – ۇيرەنۋ، ءوسۋ، قىزمەت ەتۋ مەكتەبى بولدى. كوپ نارسە جازعىم كەلەدى. ول ەندى ماقتانداي قابىلدانۋى مۇمكىن ەكەنىن ەسكەرىپ، قويا-قويعان ءجون بولار»، – دەپ جازدى جۋرناليست.

سونداي-اق، وسى جوبانى ومىرگە اكەلگەن، ۇجىمعا سەنىم بىلدىرگەن ازاماتتار مەن ازاماتشالارعا، «قازاقستان» تەلەراديوكورپاراسياسىنىڭ باسشىلىعىنا العىسىن ءبىلدىرىپ، «ۇلتتىق ارنانىڭ» جاڭعىرۋ كەزەڭىنە ءالى دە ۇلەسىن قوساتىنىن ايتتى.