موسۋلدى دايش اسكەرلەرىنەن ازات ەتۋ سوعىسى قالانى قيراتىپ، مىڭداعان ادامنىڭ ءومىرىن جالمادى، دەپ جازادى Qamshy.kz اقپارات اگەنتتىگى.

9 ايعا جالعاسقان سوعىستىڭ اياقتالعانىنا قاراماستان، موسۋل گۋمانيتارلىق داعدارىستى باستان كەشۋدە. زارداپ شەككەن ادامداردىڭ سانى 10 مىڭعا جۋىقتاپ قالدى. 2016 جىلدىڭ قازانىندا قالانى اسكەرلەردەن ازات ەتۋ وپەراسياسى باستالعان شاقتان باستاپ ميلليونعا جۋىق تۇرعىن ءوز ۇيلەرىن تاستاپ كەتۋگە ءماجبۇر بولدى.

اۋداندار مەن كوشەلەردىڭ استاڭ-كەستەڭى شىقتى، بومبالاردىڭ جارىلۋى سالدارىنان ۇيىندىلەردىڭ استىندا قالعان ادامدار ءالى دە بار.

سپۋتنيك ارقىلى سۋرەتتى اقپاراتقا سايكەس، مىڭداعان ۇيلەر مەن 100 شاقىرىمداي جولدار تۇگەلدەي قيراتىلعان. قالانىڭ ۇلكەن بولىگى ۇيىندىگە اينالدى.

بۇۇ موسۋلدى قايتا وڭالتۋ وپەراسياسىن 1 ملرد. دوللارعا باعالاپ وتىر. ءارى ۇزاق جىلدار كەتەتىنىن ايتتى. ۇيىم مالىمەتتەرىنە سايكەس، سوعىس سالدارىنان موسۋلدىڭ بار اۋدانى زارداپ شەكتى. شىلدە ايىندا ازات بولعان قالانىڭ باتىسىنداعى 54 اۋداننىڭ 15ء-ى تولىعىمەن قيراپ، ءومىر سۇرۋگە جارامسىز دەپ تانىلعان.

سوعىس بارىسىندا ۇيلەرىنە جاسىرىنىپ، امان قالعان تۇرعىندار دا بولدى. ولار جارالى كۇيدە تابىلدى. جەرگىلىكتى جۋرناليستەر امان قالعان تۇرعىندارمەن تىلدەسىپ كورگەن. اراسىندا 10 جاستاعى اميرا دا بار. جارىلعىش زاتتىڭ سالدارىنان اميرانىڭ اناسى قايتىس بولدى، ال قىزدىڭ اياعى جاراقاتتاندى.

«مەن انامنان كومەك سۇرادىم، ايقايلادىم، ءبىراق ول جاۋاپ بەرمەدى. مەن دە قوزعالا المادىم». جارىلىس بولعان جەردە اميرا ءۇش كۇن بويى جاتقان.

«تاماق تا، سۋ دا بولعان جوق. ءۇش كۇن بويى جىلادىم، كومەككە شاقىردىم، ءبىراق مەنى ەشكىم ەستىمەدى. جانىمدا ءۇنسىز جاتقان انامنىڭ قايتىس بولىپ كەتكەنىن دە بىلگەن جوقپىن»، – دەدى اميرا. بۇگىندە اميرا اۋرۋحانادا ەمدەلىپ جاتىر. تۋىستارى مەن اكەسىنىڭ قايدا ەكەنى بەلگىسىز.

ءان نۋري مەشىتى، 2014 جىلدىڭ شىلدەسى 

ءان نۋري مەشىتى، 2017 جىلدىڭ شىلدەسى

ءال حادبا مۇناراسى، 2017 جىل، 20 شىلدە

ءال حادبا مۇناراسى، 20017 جىل، 22 شىلدە

2015 جىل، قاراشا - 2017 جىل، شىلدە

يراك قاۋىپسىزدىك كۇشتەرى قالانى تولىق باقىلاۋعا العان سوڭ بيلىك مەگاپوليستى قايتا ءتىرىلتۋ جۇمىستارىنا كىرىسىپ كەتكەن. الايدا بۇل – ۇلكەن ماسەلە، سەبەبى موسۋلدىڭ باتىس بولىگى قايتا جوندەۋگە كەلمەيدى.

قايتا قالپىنا كەلتىرۋ ۇزاق جىلدار مەن بىرنەشە ميلليارد دوللاردى تالاپ ەتەدى. ال ازىرگە يراك بيلىگى قالانى قاۋىپسىزدەندىرۋ جۇمىستارىمەن اينالىسۋدا.