كاچير اۋدانى تروفيموۆكا اۋىلىنىڭ تۇرعىنى بەرىك ءابدىراحمان «ەكسپو-2017» حالىقارالىق كورمەسىنە ۆەلوسيپەدپەن بارىپ كەلدى، دەپ جازادى Qamshy.kz اقپارات اگەنتتىگى.  

جەرگىلىكتى pavlodarnews.kz پورتالىنىڭ مالىمەتىنە سۇيەنسەك، 39 جاستاعى اۋىل تۇرعىنى 26-شىلدە كۇنى ەلورداعا اتتانىپ، 8-تامىزدا پاۆلودارعا ورالعان. وسىلايشا، 1013 شاقىرىمدى ۆەلوسيپەدپەن باعىندىرىپ، 13 كۇننىڭ ءتورت تاۋلىگى جول جۇرۋگە كەتكەن. قايتار جولدا عانا جۇمىسىنا ۇلگەرۋ ماقساتىندا استانادان پاۆلودارعا قاتىنايتىن پويىزعا وتىرعان. ۇستازدىڭ ايتۋىنشا، ساپارعا شىقپاس بۇرىن 1984 جىلى شىققان كەڭەستىك «ۋرال» ماركالى ۆەلوسيپەدىن اۋىستىرماق بولعان. دەگەنمەن سوڭعى ساتتە ۇزاق جىلدار بويى سىر بەرمەگەن كولىگىن الماستىرۋ تۋرالى ويدان باس تارتىپ، ارنايى ناۆيگاسياسى بار ۆەلوكومپيۋتەر جانە ۆەلوسيپەدشىنىڭ كيىمىن العان.

 «كورمە وتەتىنى جايلى ەستىگەن ساتتەن باستاپ وزىمە وسىنداي ماقسات قويدىم. بۇل مەنىڭ ۆەلوسيپەدپەن شىققان ەڭ ۇزاق ساپارىم. بۇعان دەيىن 2015 جىلدان باستاپ تەرەڭكولگە، تروفيموۆكاعا جانە اقسۋعا بارعان ەدىم. وسى ساپاردان العان اسەرىمدى سوزبەن ايتىپ جەتكىزۋ مۇمكىن ەمەس. حالىقارلىق كورمەنىڭ ءبىزدىڭ ەلىمىزدە ءوتىپ جاتقانى زور مارتەبە. جولدا اق جول تىلەپ، ءوز كومەگىن ۇسىنعان جاندار كوپ بولدى»، - دەيدى ول.

ايتا كەتەيىك، بەرىك ءابدىراحمان 17 جىلدان بەرى تروفيموۆكا اۋىلىنىڭ مەكتەبىندە قازاق ءتىلى مەن ادەبيەتى پانىنەن ساباق بەرەدى. سيرەك كەزدەسەتىن جۇرەك اۋىرۋىنا شالدىققان ۇستاز بويىنداعى دەرتىن جەڭۋ ءۇشىن 10 جىلدان استام ۋاقىتىن جاتتىعۋعا ارناپ، سپورتپەن ايلانىسۋعا بەت بۇرعان. الدىمەن ارنايى ءادىس بويىنشا 800 مەتر قاشىقتىقتان جۇگىرۋدى باستاسا، سوڭعى ەكى جىلدا بۇل كورسەتكىشتى توعىز شاقىرىمعا جەتكىزگەن. ءتىپتى، اپتاپ ىستىققا قاراماستان، رامازان ايىندا اۋىز بەكىتىپ، جاڭادان سالىنعان ورتا ازياداعى ەڭ ۇلكەن كوپىر ارقىلى ۆەلوسيپەدپەن ءجۇرىپ وتكەن.