كىسى قايتىس بولعان ۇيدەگى اينانىڭ بەتىن جاۋىپ قويۋ – سوناۋ كونە سلاۆيان حالقىندا ورىن العان دەپ جازادى Qamshy.kz اقپارات اگەنتتىگى ihsan.kz-كە سىلتەمە جاساپ.

ونىڭ ءمانىسىن ءارتۇرلى ەتىپ تۇسىندىرەدى. سونىڭ بىرىندە، اينا ەكى جاقتىلىق نىشانى بوپ تابىلادى-مىس. ياعني، اينا و دۇنيە مەن بۇ دۇنيە اراسىنداعى جانە تىلسىم الەم مەن ماتەريالدىق دۇنيە اراسىنداعى بايلانىس قۇرالى، كوپىر ىسپەتتى. سوندىقتان ءمايىت شىققان ۇيدەگى اينالاردىڭ بەتىن ءۇش كۇن بويى جاۋىپ قوياتىن بولعان. ويتكەنى، مارقۇمنىڭ رۋحى ءۇش كۇن ىشىندە دەنەگە ورالۋى مۇمكىن ەكەن. ەگەر وسى ساتتە رۋحتىڭ بەينەسى اينادا كورىنسە، وندا ول دەنەسىنە قايتا ورالا الماي، ارعى ومىردە ماڭگىگە قالىپ قالادى-مىس.

الگىندەي ىرىم يسلامدا نەگىزسىز بولىپ تابىلادى. سوعان سەنىپ، ارنايى سول ءۇشىن قايتىس بولعان ۇيدەگى اينا بەتىن جابۋ دۇرىس ەمەس. ەشقانداي  زات (اتالمىش ماعىنادا) و دۇنيە مەن بۇ دۇنيە اراسىندا كوپىر بولا الماق ەمەس. جانە ولگەن كىسىنىڭ رۋحى و دۇنيەگە اتتانعاننان كەيىن وسى دۇنيەگە قايتا ورالمايدى. بۇنى قۇراندا بىلايشا بايان ەتكەن:

«ەگەر ولاردىڭ الدەبىرەۋىنە ءولىم كەلسە: «قۇدايىم! مەنى دۇنيەگە قايتارا گور! مۇمكىن مەن قالدىرعان دۇنيەدە ىزگى امال ىستەرمىن»، – دەپ (جالبارىنادى). استە (ولاي بولمايدى)! شىنىندا بۇل بوسقا ايتىلعان ءسوز (تىلەكتەرى جۇزەگە اسپايدى). ولاردىڭ ارتىندا قايتا تىرىلەتىن كۇنگە دەيىن بوگەت بار». [ءمۇ’مينۋن سۇرەسى، 99-100 ايات].

ابدۋسامات قاسىم