ءبىراز كۇن بۇرىن عالامتور جەلىسىندە تانىمال يمام ءابدىعاففار سمانوۆتىڭ نەسيە تۋرالى ايتقان ۋاعىزى تارالعان. مولدانىڭ «نەسيەنىڭ ءاربىر پايىزى اناڭمەن جەتى رەت زينا جاساعان كۇنامەن بىردەي» دەپ ايتقانى قازاق حالقىن ءدۇر سىلكىندىرگەن ەدى. وسىعان وراي بەلگىلى يسلامتانۋشى قايرات جولدىباي تانىمال ۋاعىزشىنىڭ ايتقاندارىن جوققا شىعارىپ، ونداي ۇكىمنىڭ دۇرىس ەمەستىگىن جازدى، دەپ حابارلايدى Qamshy.kz اقپارات اگەنتتتىگى.

«ءوسىم بەرۋدىڭ دە، الۋدىڭ دا كۇنا ەكەنى بەلگىلى. الايدا ونى كىسىنىڭ اناسىمەن زينا جاساعاننان دا اۋىر كۇنا دەگەن ۇكىم دۇرىس ەمەس. بۇل مازمۇندا كەلگەن ءحاديستى كوپشىلىك مۇحادديس عۇلامالار تىزبەك تۇرعىسىنان دا، ءماتىن تۇرعىسىنان دا دالەلگە جارامسىز ەكەندىگىن ايتقان. يسلامداعى زيناعا بەرىلەتىن جازانىڭ اۋىرلىعىنا قاراپ-اق، ونى كىسىنىڭ اناسىمەن، ءتىپتى، جالپى زينا اتاۋلىمەن سالىستىرۋعا كەلمەيتىنىن بايقاۋ قيىن ەمەس. ءوسىمنىڭ زينادان دا اۋىر ەكەندىگىن بىلدىرگەن حاديستەر ساحابا ابدۋللاھ يبن ءسالام، تابيعين كاعبۋل-احبار سەكىلدى يسلام ءدىنىن قابىلداعان وزگە ءدىن وكىلدەرىنىڭ (ەۆرەي) ريۋاياتى بولماق. بۇل كىسىلەر بۇرىنعى دىندەرىندەگى كەيبىر ۇكىمدەردى شاتاستىرىپ ريۋايات ەتكەندىگى بايقالادى. ءحاديستىڭ باسقا جولدارمەن كەلگەن (شاۋاھيد، تاۋابيع) ريۋاياتتارى دالەلگە جارامايتىنداي ءالسىز.
PS: ءابدىعاففار اعامىز تالاي جاستاردىڭ تۋرا جولعا تۇسۋىنە سەبەپ بولعان كىسى. مۇنى ەشكىم جوققا شىعارا المايدى. حاديس جيناقتارىندا كەزدەسكەن كەيبىر ريۋاياتتاردى جۇرتتى وسىمنەن ساقتاندىرۋ ماقساتىندا ايتقانى كورىنىپ تۇر. ءبىراق ءساتسىز ءھام قاتە. الايدا كىسىنى بىر-ەكى سوزىنە بولا مۇلدەم سىزىپ تاستاۋ دا دۇرىس ەمەس دەپ ويلايمىن»، – دەپ جازدى ءدىنتانۋشى ءوزىنىڭ فەيسبۋكتەگى پاراقشاسىنا.