بۇگىندە قانت ديابەتى اۋرۋىنىڭ قارقىندى ءوسۋى دەنساۋلىق ساقتاۋ ماماندارىنىڭ وزەكتى ماسەلەلەرىنە اينالىپ وتىر.  وبلىستىق دەنساۋلىق ساقتاۋ باسقارماسىنان تۇسكەن مالىمەتكە سۇيەنسەك، باتىس قازاقستان وبلىسى بويىنشا 8605 تۇرعىن  اتالمىش سىرقاتقا شالدىقسا، ونىڭ 3617ء-سى اۋىل تۇرعىندارى ەكەن.

-قانت ديابەتىمەن سىرقاتتاناتىن ناۋقاستارعا وبلىس كولەمىندە جەتى قالالىق جانە 12 اۋداندىق ەمحانادا مامانداندىرىلعان العاشقى كومەك كورسەتىلەدى. سىرقاتتانۋشىلاردىڭ 23ء-ى ءجاسوسپىرىم بولسا، 63ء-ى بۇلدىرشىندەر. قانت ديابەتىن ەرتە انىقتاۋ ماقساتىندا 40-64 جاس ارالىعىنداعى ءوڭىر تۇرعىندارى سكرينيگتىك تەكسەرىستەن ءوتىپ تۇرادى. سىرقاتتىڭ الدىن الۋ ءۇشىن ءار ادام بەلسەندى تۇردە سالاۋاتتى ءومىر ءسۇرۋ سالتىن ۇستانىپ، دەنە شىنىقتىرۋمەن شۇعىلدانىپ، دەنە سالماعىن قاداعالاپ تۇرۋى كەرەك. ەگەر بۇل دەرتكە شالدىقسا، ناۋقاستىڭ پسيحولوگيالىق-ەموسيالىق جاعدايى ءبىرقالىپتى بولۋى شارت. بيىل 40-64 جاس ارالىعىنداعى تۇرعىنداردىڭ 86،8%-ى سكرينينگتىك تەكسەرىستەن ءوتتى،- دەيدى وبلىستىق دەنساۋلىق ساقتاۋ باسقارما  باسشىسىنىڭ ورىنباسارى نۇردانات بەركىنعالي.

سالا ماماندارىنىڭ مالىمەتىنشە،  بۇل  دەرت قانداعى قانت  مولشەرىنىڭ شامادان تىس كوبەيىپ كەتۋىنەن پايدا بولادى ەكەن. ديابەت ءينسۋليننىڭ اسقازان استى بەزىنەن جەتكىلىكتى مولشەردە بولىنبەۋى سالدارىنان باستالادى. ءينسۋلينسىز اعزا قانت تۇيىرشىگىن وڭدەي المايدى. سودان سوڭ قاننىڭ قۇرامىندا قانت مولشەرى ارتادى. دەرتكە شالدىققاندارعا ستاتيستيكالىق مالىمەت جۇرگىزسەك، بۇل دەرت  جاس تاڭدامايتىن بولىپ شىقتى. سىرقاتتانۋشىلاردىڭ اراسىندا بۇلدىرشىندەر دە، كەمەل جاستاعىلار دا، اقساقالدار مەن اق جاۋلىقتى اجەلەر دە بار. ديابەتتىڭ 1-تيپتىك ءتۇرى ينسۋلين وندىرەتىن اسقازان بەزىنىڭ  رەاكسيالارى بۇزىلعان جاعدايدا پايدا بولادى ەكەن. وبلىستىق دەنساۋلىق ساقتاۋ باسقارما ماماندارىنىڭ ايتۋىنشا، دەرتتىڭ پايدا بولۋىنا  ادامنىڭ از قيمىلداۋى، شەكتەن تىس سالماق قوسۋى، ۇن ونىمدەرىن كوپ پايدالانۋ، مايلى جانە قۋىرىلعان تاماقتارعا قۇمارلىق، ءتۇرلى ۆيرۋستار، جەتكىلىكتى تۇردە انا ءسۇتىن ەمبەۋ، تاماق پەن سۋدا توكسيندەردىڭ بولۋى اسەر ەتۋدە. ايتا كەتەتىن ماسەلە، ديابەت دەرتى اسقىنىپ كەتسە، قان تامىرلارىنىڭ زاقىمدانۋىنا الىپ كەلەدى. كەيىن ادام اعزاسىنداعى بۇيرەك جۇمىس ىستەۋىن ناشارلاتادى ەكەن.

    گۇلىم اقاپ،

باتىس قازاقستان وبلىسى