«اناعا اپارار جول» ءفيلمى ۇستىمىزدەگى جىلى تامىزدىڭ 23ء-ى مەن 27ء-ى ارالىعىندا حورۆاتيادا وتكەن حالىقارالىق «ماركو پولو» كينوفەستيۆالىندە «ۇزدىك كوركەم فيلم» جۇلدەسىن الدى. سونىمەن قاتار اتالعان كينوتۋىندى «ەڭ ۇزدىك سەناريي» جانە «كورەرمەندەر كوزايىمى» جۇلدەلەرىمەن ماراپاتتالدى دەپ حابارلايدى Qamshy.kz اقپارات اگەنتتىگى.
ق ر مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» اق جانە «نوۆىي مير» جشس-سىمەن بىرلەسە تۇسىرىلگەن «اناعا اپارار جول» ءفيلمى ءومىردىڭ اۋىرتپالىعىنا توتەپ بەرگەن، قيىن قىستاۋ كۇندەرى سۇراپىل سوعىستىڭ مەحناتىن كورگەن باستى كەيىپكەردىڭ تاعدىرىن باياندايدى. كارتينانىڭ رەجيسسەرى – اقان ساتايەۆ.
حالىقارالىق «ماركو پولو» كينوفەستيۆالى جىل سايىن حورۆاتيا پرەزيدەنتى پاتروناتىمەن، الەمگە ايگىلى ساياحاتشى ماركو پولو دۇنيەگە كەلگەن كورچۋلا قالاسىندا وتكىزىلەدى. ەستەرىڭىزگە سالا كەتسەك، XIII عاسىردا ماركو پولو جىبەك جولى ارقىلى شىعىس تۇركىستانعا دەيىن بارعان. فەستيۆالدىڭ «جىبەك جولى – ديالوگقا اپارار جول» ۇرانى ازيا مەن ەۋروپا ەلدەرى اراسىنداعى مادەني-تاريحي بايلانىستاردىڭ ماڭىزدىلىعىن كورسەتەدى.
بيىل فەستيۆالگە ءازىربايجان، بولگاريا، ءۇندىستان، يندونەزيا، يران، قازاقستان، كورەيا، تۇركيا، حورۆاتيا جانە باسقا دا ەلدەردەن كەلگەن فيلمدەر قاتىستى. قازاقستاندىق دەلەگاسيا قۇرامىندا «اناعا اپارار جول» فيلمىندە باستى رولدەردى سومداعان اكتەرلەر ءادىل احمەتوۆ، التىناي نوگەربەك، كارتينانىڭ پروديۋسەرى جاراسحان كۇلپيەنوۆ، سونداي-اق، حورۆاتياداعى ق ر ەلشىلىگىنىڭ قىزمەتكەرلەرى بولدى.
– ءبىزدىڭ ءفيلمدى حورۆاتتىقتار جىلى قابىلدادى، كورسەتىلىم بارىسىندا كوزىنە جاس العاندار دا بولدى. فيلم سوڭىندا العىسىن ايتىپ، جىلى لەبىزدەرىن دە جەتكىزدى. كارتينانىڭ ءتۇسىرۋ توبىن كەزەكتى جەڭىستەرىمەن قۇتتىقتايمىن، – دەدى اكتريسا التىناي نوگەربەك.
ەستەرىڭىزگە سالا كەتسەك، اتالعان تاريحي تۋىندى 38ء-شى حالىقارالىق ماسكەۋ كينوفەستيۆالىندە جانە «ەۋرازيالىق كوپىر» اتتى فەستيۆالگە قاتىسىپ، باس جۇلدەنى، سونىمەن قاتار اكتريسا التىناي نوگەربەك «ۇزدىك ايەل ادام ءرولى» نوميناسياسىندا جەڭىسكە جەتتى. ودان بولەك، بۇل تۋىندى بيىل قازاقستان كينوسىنشىلار اسسوسياسياسى ۇيىمداستىرعان «سىنشىلار تاڭداۋى» جۇلدەسىندە ءۇش بىردەي جۇلدەنى يەمدەندى. اتاپ ايتساق، «ەڭ ۇزدىك اكتريسا» – التىناي نوگەربەك؛ «ەكىنشى پلانداعى ۇزدىك اكتريسا» ارۋجان جازىلبەكوۆا؛ «فيلمگە جازىلعان ۇزدىك مۋزىكا» نوميناسياسىن اتالمىش ءفيلمنىڭ كومپوزيتورلارى ءالىم زايروۆ پەن رومان ۆيشنيەۆسكيي يەمدەندى. ودان بولەك، كينوتۋىندى جاقىندا عانا بىشكەكتە وتكەن «اق ءىلبىرىس» اتتى VI ۇلتتىق كينوجۇلدەسىندە ورتالىق ازيانىڭ ۇزدىك ءفيلمى اتاندى. ال 2017 جىلى ماۋسىم ايىندا نيۋ-يوركتە وتكەن 5ء-شى ەۋرازيالىق كينوفەستيۆالدە تاريحي كينوتۋىندى «ۇزدىك كوركەم فيلم» جۇلدەسىن الدى. سونىمەن قاتار، ءفيلمنىڭ باس پروديۋسەرى ءاليا نازاربايەۆا «كينو الەمىندەگى ەۋرازيالىق ايەلدەر» جۇلدەسىمەن، ال كارتينادا انا ءرولىن سومداعان اكتريسا التىناي نوگەربەك «ۇزدىك اكتريسا» جۇلدەسىمەن ماراپاتتالعان.
