ايگىلى ساكەن سەيفۋلليننىڭ قىزمەتتە جۇرگەن كەزىندە 16 جاستاعى قىزدى الداپ، پايدالانىپ كەتكەن كورىنەدى. وسى قورلىققا شىداماعان جاس ارۋ وز-وزىنە قول سالىپتى.

بۇل تۋرالى دراماتۋرگ سايا قاسىمبەكتىڭ "ادەبيەت پورتالىنداعى" "قىز قاسىرەتى. ساكەن تۋرالى 44 جىل ساقتالعان سىر" اتتى ماقالاسىندا ايتىلادى دەپ جازادى Qamshy.kz اقپارات اگەنتتىگى. 

اۆتور بۇل جاعداي جونىندە جازسام با، جازباسام با دەپ كوپ ويلانىپتى. 

"...سول تاۋ تۇلعالار عۇمىرىندا بولعان كەيبىر كولەڭكەلى، كىربىڭدى تۇستارعا كۋا بولعاندا، ەستىپ-بىلگەندە وز-وزىڭنەن قاراداي مۇڭعا باتىپ، وزەگىڭدى وكىنىش ورتەيتىن مەزەتتەر بولادى ەكەن. جاماندىققا قيمايسىڭ، ىشتەي ارپالىسىپ، سارساڭعا تۇسەسىڭ. قىرىق ءتورت جىل بويى سانامدا ساقتالىپ، وسىنداي ارپالىس كۇيگە ءتۇسىرىپ كەلە جاتقان سىردى ايتىپ، جاريالاۋ دا وڭاي بولمادى. ءبىر ويىم ايتادى: «جازىقسىز قۇربان بولعان بوزداقتاردىڭ تۇلعاسىن اسقاقتاتىپ جاتقان كەزەڭدە، وسى شىندىق قوعامعا قاجەت پە؟»، – دەسە، ەكىنشى ويىم: «ماحابباتقا سەنگەن ارۋدىڭ سۇراۋسىز كەتكەن كوز جاسىن، تىم قۇرىعاندا قاعاز بەتىندە جوقتاۋ كەرەك ەمەس پە؟ قىرشىن كەتكەن جاس ارۋدىڭ كوز جاسى سۇراۋسىز قالا بەرمەك پە؟ – دەيتىندەي" دەپ جازادى س.قاسىمبەك. 

سودان اۆتور ەكىنشى ويىنا قۇلاق اسۋدى ءجون ساناعان.

"بىردە، راديودان «تاۋ ىشىندە» ءانى بەرىلىپ جاتقان. اتام: «ەھ، زامان-اي دەسەڭشى؟!» – دەپ قاتتى كۇرسىندى. اتام ەكەۋىمىزدىڭ ارامىزداعى ديالوگ بىلايشا وربىگەن ەدى: – اتا، سونشا نەگە كۇرسىندىڭىز؟

– ە، مارقۇم ساكەن سەيفۋللين وسى ءانىن ءبىزدىڭ ەلگە كەلگەندە شىعارىپ ەدى. العاش بىزگە سالىپ بەرگەن.

– ساكەن سەيفۋللين؟ قالايشا؟ ءسىز ساكەن سەيفۋلليندى كورگەنسىز بە؟

– نەگە سونشا تاڭىرقادىڭ؟ – دەگەن اتام وسى وقيعانى بايانداپ بەرىپ ەدى: – وتىزىنشى جىلدارى تۇركىستان جەرىندە كولحوز پرەدسەداتەلى بولىپ تۇرعانىمدا، الماتىدان ساكەن سەيفۋللين باستاعان كوميسسارلىق توپ ەلگە كەلدى. سول جولى كولحوز تىرلىگىن قاتتى تەكسەردى. وزىمەن بىرگە قىزىل وتاۋ الا كەلىپتى. مۇرتى قياقتاي، ەركەك ىشىندە بەت بىتكەننىڭ سۇلۋى ەدى مارقۇم... سول جولى ايەلىن ەرتە كەلىپتى. ۇزىن شاشى توبىعىنا تۇسكەن، سۇلۋ ەكەن. اياعىنا بيىك وكشە توپىلي (تۋفلي دەگەنى) كيگەندىكتەن، تۇركىستاندا قالدىرىپ، وزگەمىز سوزاق، شولاققورعان ەلىنە ءاتۇستى كەتتىك. سول جولى ساكەن ەلدە ءبىر اي جاتتى. كۇندىز جۇمىس، كەشكىسىن جاستار قىزىل وتاۋعا جيىلىپ ساۋىق-سايران قۇرامىز. ەل ىشىندە تالانتتى جاستار جەتكىلىكتى ەدى عوي، شىركىن. سول ەلدەگى ءبىر شالدىڭ ءتورت ۇل ورتاسىندا جايقالىپ ءوسىپ كەلە جاتقان ۇكىدەي جاس قىزى بار ەكەن. جاسى 16-دا. بەت بىتكەننىڭ سۇلۋى. قىزدىڭ سۇلۋلىعىن ۇزىنقۇلاقتان ەستىگەن ساكەن الگى ارۋدى قىزىل وتاۋعا الدىرتتى. نە كەرەك، ءبىر اي بويى سول قىزبەن ويىن قۇردى. (وسى جەرىن تۇسىنبەي انىقتاپ سۇراعانىمدا، بىرگە تۇرعانىن بىلگەن ەدىم...) قىزدىڭ ءتورت اعاسى كەلىپ، ساكەندى قىستى. ساكەن، قىزدى الماتىعا الىپ كەتەتىنىن، ۇيلەنەتىنىن ايتىپ، انت-سۋ ءىشتى. اقىرى اعالارى سەنىپ، قىزدى ساكەنگە قالدىردى.

نە كەرەك، اي تاۋسىلىپ، ساكەن الماتىعا قايتاتىن بولدى. قىزدى ەرتىپ، اتتىلى توپ، تۇركىستانعا جول تارتتىق. قايتاردا اششىسايدىڭ تاۋ اراسى جولىمەن قايتتىق. مىنا ءاندى سول جولى، تاۋ ىشىمەن قايتىپ كەلە جاتىپ شىعارعان ەدى. شىرقاعانى سول ەكەن، جاستار جاعى قويسىن با، اۋىز-اۋىزدان جەرگە تيگىزبەي قاعىپ كەتتى عوي. قاس قارايا اتتىلى توپ، بۇلاق باسىنا تۇنەمەككە توقتالدىق. ساكەن: - جىگىتتەر، مىنا انىمە قۇلاق سالىڭدارشى؟! جاڭا ءان كەۋدەمدى جارىپ بارادى! -دەپ، وسى «تاۋ ىشىندە» ءانىن شىرقاپ جىبەردى. عاجاپ ءان ەكەن؟! دەلەبەسى قوزىپ كەلە جاتقان جىگىتتەر قويسىن با؟! ىشىپ-جەپ، ساكەننىڭ جاڭا ءانىن كەزەكپەن شىرقاپ وتىرمىز... ءتۇن اۋا ساكەن، قوسشى جىگىتكە بۇرىلىپ، قىزدى ەلگە اپارىپ تاستاۋىن بۇيىردى. ءبارىمىزدىڭ ءتىلىمىز بايلانىپ قالدى. قارسى ءسوز ايتارعا شاما بار ما؟! وتىزىنشى جىلداردىڭ قاسىرەتى كۇشىنە ەنىپ، ەلدى قىناداي قىرىپ جاتقان ناۋقان بولاتىن. ساكەننىڭ تۇكىرىگى جەرگە تۇسپەي، قىلىشىنان قانى تامىپ تۇرعان كەز. قىزدىڭ رۋلاس اعاسى داۋىس كوتەرىپ ەدى، ساكەن: "ۇرىم-بۇتاعىڭمەن ايدالىپ كەتكىڭ كەلە مە؟!" - دەپ ەدى، ءۇنى ءوشتى. قيىن زامان ەدى عوي. قويشى، ءبارىمىز قيسايىپ جاتا كەتتىك... تاڭمەن تۇرساق، قىز جوق. جابىلا ىزدەۋ سالدىق. سويتسەك، ەلگە قايتۋعا نامىسى جىبەرمەگەن بايعۇس قىز، توبىقتان تۇسەتىن شاشىمەن دولانا اعاشىنا اسىلىپ قالعان ەكەن! ءولى ءجۇزىنىڭ ءوزى اجارلانىپ كەتكەنى ءالى كوز الدىمنان كەتپەيدى. ساكەننىڭ قاتتىلىعى سونشا، ۇرىمدەي قىزعا دۇعا جاساماستان، اتىنا ءمىنىپ، بۇرىلماستان كەتە باردى. شىراعىم، ماحابباتتىڭ نالاسى جامان بولادى. قىز نالاسى اقىرى ساكەندى جىبەرمەدى عوي! - دەپ كۇرسىنگەن بولاتىن" دەپ اقتارىپتى سايا قاسىمبەك 44 جىلدان بەرى ساقتاپ كەلگەن سىرىن.